نعت رسول كريم

نعت رسول كريم ﷺ

طلوعِ شمس و قمر سے پہلے میں تجھ پہ آقا درود بھیجوں
ہر ایک شام و سحر سے پہلے میں تجھ پہ آقا درود بھیجوں
سفر کا آغاز جب کروں میں , میرے لبوں پر ہو نام تیرا
پلٹ کے آؤں تو گھر سے پہلے میں تجھ پہ آقا درود بھیجوں
خدا کی بھیجی کتاب تو ہے میرا تو سارا نصاب تو ہے
حصولِ علم و ہنر سے پہلے میں تجھ پہ آقا درود بھیجوں
ہے رونقِ کائنات تجھ سے ہرا ہے نخلِ حیات تجھ سے
شجر پہ برگ و ثمر سے پہلے میں تجھ پہ آقا درود بھیجوں
میں اپنے بچوں میں بیٹھ کر بھی سناؤں بدر و احد کی باتیں
کشاکشِ خیر و شر سے پہلے میں تجھ پہ آقا درود بھیجوں
بس ایک حبِ رسول فخری میں اپنے ورثہ میں چھوڑ جاؤں
اس اختتامِ سفر سے پہلے میں تجھ پہ آقا درود بھیجوں

زاہد فخری