نعتِ رسولِ مقبول ﷺ
ہر دور کا ہادی ہے تو پیکرِ قرآنی
تو رحمتِ عالم ہے تو جلوۂ رحمانی
یہ بات زمانے میں ہے باعثِ حیرانی
کی تیرے فقیروں نے عُسرت میں جہاں بانی
ہر ذرہ چمک اٹھا خاکِ عربستاں کا
صحراؤں نے دیکھی ہے ایثار کی طغیانی
آمد تری، انساں کی تاریخ کا سرمایہ
ممنونِ کرم تیری درویشی و سلطانی
ڈھایا ہے نہتوں نے شاہوں کے عزائم کو
تھی قوتِ ربانی وہ بے سرو سامانی
رستے پہ ترے چل کر ہر شخص نے دیکھا ہے
دنیا کے سفر میں ہے آسانی ہی آسانی
بنیاد جو اس کی ہے نامِ شہِؐ بطحا پر
ہے میرے گلستاں میں خوشبو کی فراوانی
اس نورِ مجسم کے جلوؤں میں نظر گم ہے
ہے جوہرِ آئینہ حسرت مری حیرانی
حسرت حسین حسرت
