کٹے گی اک نہ اک دن یہ شبِ غم دیکھتے رہنا
خوشی کے ساز سے نکلیں گے سر گم دیکھتے رہنا
قبولے گا خطا اپنی کبھی دل کی عدالت میں
بنے گا ایک دن انسان یہ آدم دیکھتے رہنا
وہ جس کے دم سے زخموں نے بہار جاوداں پائی
ہمیں سے مانگنے آئے گا مرہم دیکھتے رہنا
چراغِ آرزو بن کر ہر اک دل کو اجا لیں گے
بدل دیں گے سحر میں ہر شب ِغم دیکھتے رہنا
نگاہِ وقت دیکھے گی محبت کی جہانگیری
مٹائیں گے ستم کا ہر نشاں ہم دیکھتے رہنا
کسی بھی گل کی حق تلفی نہ ہوگی اب گلستاں میں
ملے گی خشک پھولوں کو بھی شبنم دیکھتے رہنا
اگرچہ بے سرو ساماں ہیں ازہرؔ پھر بھی ہمت سے
بدل دیں گے نظامِ زندگی ہم دیکھتے رہنا
مصنف: مشیر کاظمی
