اے مرے مرغے’ مرے سرمایہ تسکین جاں
تیری فرقت میں ہے بے رونق مرا جہاں
کون دے گا رات کے بارہ بجے اٹھ کر اذاں
تیری فرقت میں یہ دل تڑپا’ جگر نے آہ کی
کھاگئی تجھ کو نظر شاید کسی بد خواہ کی
تجھ کو لایا تھا کراچی سے کہ پالوں گا تجھے
مشرقی آداب کے سانچوں میں ڈھالوں گا تجھے
مفت خوروں کی نگاہوں سے بچالوں گا تجھے
تجھ پہ لیکن موت کے دلدوز سائے چھا گئے
‘‘حسرت ان غنچوں پہ ہے جو بن کھلے مرجھا گئے’’
تیرے غمزے زندگانی بھر نہ بھولیں گے مجھے
پھول سی کلغی ملائم’ پر نہ بھولیں گے مجھے
تیرے انداز حسیں یکسر نہ بھولیں گے مجھے
چھوڑ کر مجھ کو تو دست داور محشر میں ہے
تیرا ڈربہ تجھ سے بہتر ہے کہ میرے گھر میں ہے
میں ‘‘وبائے عام’’ سے تجھ کو بچاتا رہ گیا
تجھ کو کتنے قیمتی شربت پلاتا رہ گیا
تجھ کو رانی کھیت کے ٹیکے لگاتا رہ گیا
میرے انجکشن تجھے لطف فنا دینے لگے
جن پہ تکیہ تھا وہی تنکے ہو ا دینے لگے
داستانِ مرغ اک دردِ نہاں ثابت ہوئی
یہ پریشانی نشاطِ دشمناں ثابت ہوئی
دوستوں کی ہر تسلی رائیگاں ثابت ہوئی
‘‘دوست غمخواری میں میری سعی فرمائیں گے کیا’’
ایک اک مرغا اٹھا کر گھر سے لے آئیں گے کیا؟
اے مرے مرغے تمہارے تذکرے ہوں گے یہاں
میں بنا دوں گا تمہاری ہر اک ادا کو جاوداں
ہو مبارک تم کو مرغے’ گوشہ باغِ جناں
میں تمہاری یاد سے قلب حزیں بہلاؤں گا
گھر کے آگے میں تمہارا مقبرہ بنواؤں گا
مصنف: مشیر کاظمی
