تجھ کو پانے کی تمنا نے سمجھائے رستے
جب بھی الجھے ہیں مرے ذوقِ سفر سے رستے
منزلیں عزمِ مصمّم پہ فدا ہوتی ہیں
میں بھٹکتا تو مجھے راہ دکھاتے رستے
سادگی دیکھ کے منزل کے تمنّائی کی
قریہ قریہ لیے پھرتے رہے اندھے رستے
ختم ہوتی ہی نہیں دشتِ جنوں کی وحشت
ہر نیا موڑ جنم دیتا ہے کتنے رستے
خیر مقدم کے لیے رہتے ہیں جو چشم براہ
خوش نصیبوں کو ملا کرتے ہیں ایسے رستے
کتنی راہوں پہ لگائے گا زمانہ قدغن
تیرے کوچے کی طرف جاتے ہیں سارے رستے
ہمسفر پہ بھی لٹیرے کا گماں ہوتا ہے
پیش خیمہ ہیں قیامت کا یہ دھندلے رستے
جن پہ چل کر ہمیں چلنے کا سلیقہ آیا
زندگی بھر نہیں بُھولیں گے وہ کچّے رستے
لُٹ گئی عصمتِ اقدار وشرافت ازہرؔ
کاش جاتے نہ مرے گاؤں کو پکّے رستے
مصنف: مشیر کاظمی
