نعت رسول اکرمﷺ

وہ کون سی منزل تھی کل رات جہاں میں تھا

ہر چیز ہی بسمل تھی ، کل رات جہاں میں تھا

کس شان کی محفل تھی ، کل رات جہاں میں تھا

کونین کا حاصل تھی ، کل رات جہاں میں تھا

ذروں کی جبینوں پر تاروں کا گماں گرا

ہر شے مہِ کامل تھی ، کل رات جہاں میں تھا

خود دل کا دھڑکنا بھی جب دل پہ گراں گزرے

وہ کیفیتِ دل تھی ، کل رات جہاں میں تھا

دریائے محبت کی طغیانی کا کیا کہنا

ہر موج ہی ساحل تھی ، کل رات جہاں میں تھا

ہر نقشِ کفِ پا پر سجدوں کا مزا آیا

عرفان کی منزل تھی ، کل رات جہاں میں تھا

اْس کیف حضوری میں ، اْس عالمِ نوری میں

ہر شے مجھے حاصل تھی ، کل رات جہاں میں تھا

آنکھوں میں سرور آیا ، ہونٹوں پہ درود آیا

وہ نعت کی محفل تھی ، کل رات جہاں میں تھا

بطحا کے تصور میں اک نور کی چادر سی

دل پر مرے نازل تھی ، کل رات جہاں میں تھا

وہ قرب کی اک ساعت جو سرو وہاں گْزری

اک عمر کا حاصل تھی ، کل رات جہاں میں تھا

حکیم سرو سہارنپوری

Suay'haram