وہ باتیں تری وہ فسانے ترے

وہ باتیں تری وہ فسانے ترے
شگفتہ شگفتہ بہانے ترے
 

بس اک داغِ سجدہ مری کائنات
جبینیں تری ، آستانے ترے
 

بس اک زخمِ نظّارہ ، حصّہ مرا
بہاریں تری ، آشیانے ترے
 

فقیروں کا جمگھٹ گھڑی دو گھڑی
شرابیں تری ، بادہ خانے ترے
 

ضمیرِ صدف میں کرن کا مقام
انوکھے انوکھے ٹھکانے ترے
 

بہار و خزاں کم نگاہوں کے وہم
برے یا بھلے ، سب زمانے ترے
 

عدم بھی ہے تیرا حکایت کدہ
کہاں تک گئے ہیں فسانے ترے