نعت رسول كريمﷺ
سبوئے جاں میں چھلکتا ہے کیمیا کی طرح
کوئی شراب نہیں عشقِ مصطفیٰ کی طرح
وہ جس کے لطف سے کھِلتا ہے غنچہء ادراک
وہ جس کا نام نسیمِ گرہ کشا کی طرح
طلسمِ جاں میں وہ آئینہ دارِ محبوبی
حریمِ عرش میں وہ یارِ آشنا کی طرح
وہ جس کا جذب تھا بیداریِ جہاں کا سبب
وہ جس کا عزم تھا دستورِ ارتقا کی طرح
سوادِ صبحِ ازل جس کے راستے کا غبار
طلسمِ لوحِ ابد جس کے نقشِ پا کی طرح
خزاں کے حجلہء ویراں میں وہ شگفتِ بہار
فنا کے دشت میں وہ روضہء بقا کی طرح
وہ عرش و فرش و زمان و مکاں کا نقشِ مراد
وہ ابتدا کے مطابق وہ انتہا کی طرح
بسیط جس کی جلالت حمل سے میزاں تک
محیط جس کی سعادت خطِ سما کی طرح
شرف ملا بشریت کو اس کے قدموں میں
یہ مشتِ خاک بھی تاباں ہوئی سُہا کی طرح
اسی کے حسنِ سماعت کی تھی کرامتِ خاص
وہ اک کتاب کہ ہے نسخہء شفا کی طرح
بغیرِ عشقِ محمد کسی سے کھل نہ سکے
رموزِ ذات کہ ہیں گیسوئے دوتا کی طرح
ریاضِ مدحِ رسالت میں راہوارِ غزل
چلا ہے رقص کناں آہوئے صبا کی طرح
نہ پوچھ معجزہء مدحتِ شہِ کونین
مرے قلم میں ہے جنبش پرِ ہما کی طرح
جمالِ روئے محمد کی تابشوں سے ظفر
دماغِ رند ہوا عرشِ کبریا کی طرح
سراج الدين ظفر
