یہ اضطراب کا ماحول چار سُو کیا ہے
کوئی بتائے کہ کِس کِس کی آرزو کیا ہے
سُلگ رہی ہے مرے گھر کے گوشے گوشے میں
یہ آگ کیا ہے، بپا شور ہاؤ ہو کیا ہے
گلی گلی میں جنوں پوچھتا ہے لوگوں سے
خرد کے جسم سے بہتا ہوا لہو کیا ہے
ہزار قرب کے باوصف اجنبی ہیں ہم
یہ زندگی ہے تو پھر خواہشِ نمو کیا ہے
اساتذہ اسے کہتے نہیں فریب نظر
غزل نہیں ہے اگر پھر وہ شعلہ رو کیا ہے
مجازؔ چل کسی صحرا سے دوستی کر لیں
اب آدمی کی یہاں یار آبرو کیا ہے
مصنف: مشیر کاظمی
