آپؐ آئے تو اندھیروں کا ہے چکر ٹوٹا
گمرہی اور جہالت کا ہے امبر ٹوٹا
ٹوٹنا تھا جسے وہ کفر بھی آخر ٹوٹا
بت کدے ٹوٹ گئے تیشہء بت گر ٹوٹا
بات مظلوم کی بن آئی بطفیل آقاؐ
ظلم کی رات ڈھلی دست ستم گر ٹوٹا
جس سے صد چاک ہوا تھا کبھی حمزہ ؓ کا بدن
بوجھ سے بار ندامت کے وہ خنجر ٹوٹا
فتح مکہ میں کوئی سر نہیں تن سے اترا
نہ ہی اغیار کی دیواروں کا کنکر ٹوٹا
اے خدا کفر کا غلبہ تیری نصرت کے طفیل
دین والوں کی امیدوں سے ہے بڑھ کا ٹوٹا
رزاق افسر
(انتخاب، خضر حیات ناگپوری)
رزاق افسر بھارت کی ریاست کرناٹک کے شہر میسور میں ۱۹ دسمبر۱۹۲۸ کو پیدا ہوئے اور اسی تاریخی شہر میں بچپن سے جوانی اور جوانی سے بڑھاپے میں داخل ہوئے ۔ گزشتہ تیس برس سے بینائی جیسی عظیم نعمت سے محروم ہو چکے ہیں۔ نابینائی کے باوجود تخلیقی عمل کا سلسلہ جاری ہے ۔اردو شعر وادب کے معروف ادبی مراکز سے دور میسور میں انہوں نے تن تنہا شعرو ادب کی شمع روشن کر رکھی ہے ۔ا ن کے تین شعری مجموعے شائع ہو چکے ہیں اور ایک نثری تصنیف ‘حرف آب دیدہ’ کے نام سے منصہ شہود پر آ چکی ہے ۔ انہوں نے اردو شاعری کی تمام قدیم و جدید اصناف سخن میں طبع آزمائی کی ہے ۔ حمد ، نعت، مناجات، مناقب اور دیگر دینی موضوعات پر کثرت سے لکھا ہے ۔ صالح فکر ، پاکیزہ نظر ،سوچتا ہوا ذہن ، اور کسی قدر دکنی اثرات سے مملو صاف ستھری زبان افسر کا سرمایہ امتیاز ہیں۔
مصنف: افتخار عارف
مصنف: مظفر وارثی