تیری آرزو مری زندگی
مری بندگی تری جستجو
یہ ہے روز و شب مرا مشغلہ
مرے سلسلے یہی کو بکو
تری ذات منبع نور ہے
ترا نور کل کا ظہور ہے
تو مجیب اسود و طور ہے
تو نہاں کہیں کہیں روبرو
تری راہ صبح کے رابطے
ترے فاصلے مرے رت جگے
یہ نیاز و ناز کے مرحلے
کہیں تشنہ لب کہیں آبجو
تری عظمتوں کے سرور سے
ہوئی فکر میری نہال جب
تو ملا کمال سخن مجھے
بنی آئینہ مری گفتگو
ہو بیان کیا تری برتری
ترا نام جب بھی لیا کوئی
تو زبان خلق ہے کہہ اٹھی
تری شان جل جلالہ
رزاق افسر
(انتخاب ، خضر حیات ناگپوری)
