مانا کہ زندگی سے ہمیں کچھ ملا بھی ہے
اس زندگی کو ہم نے بہت کچھ دیا بھی ہے
محسوس ہو رہا ہے کہ تنہا نہیں ہو ں میں
شاید کہیں قریب کوئی دوسرا بھی ہے
قاتل نے کس صفائی سے دھوئی ہے آستیں
اسکو خبر نہیں کہ لہو بولتا بھی ہے
غرقاب کر دیا تھاہمیں ناخدا نے آج
وہ تو کہو کہ ایک ہمارا خد ا بھی ہے
ہو تو رہی ہے کوشش آرائش چمن
لیکن چمن غریب میں اب کچھ رہا بھی ہے
اے قافلے کے لوگو ذرا جاگتے رہو
سنتے ہیں قافلے میں کوئی رہنما بھی ہے
یہ حسن اتفاق ہے یا حسن اہتمام
ہے جس جگہ فرات وہاں کربلا بھی ہے
ہم پھر بھی اپنے چہرے نہ دیکھیں تو کیاعلاج
آنکھیں بھی ہیں چراغ بھی ہے آئنہ بھی ہے
اقبال شکر بھیجو کہ تم دیدہ ور نہیں
ورنہ دیدہ وروں کو آج کوئی پوچھتا بھی ہے
مصنف: مشیر کاظمی
