ہم اگر ہم صدا نہیں ہوتے
طَیر بھی لب کُشا نہیں ہوتے
جُرم ثابت ہے گل پرستی کا
خار پر ہم فدا نہیں ہوتے
جب کوئی دوسرا نہیں ہوتا
آپ ہم سے جُدا نہیں ہوتے
فصلِ ابر و تبسمؔ گل میں
محتسب! یوں خفا نہیں ہوتے
ق
وقت کے خسرو و جَم و دارا
وقت سے ماورا نہیں ہوتے
ہر نوا بانگِ شہ سروش نہیں!
غار سارے حرا نہیں ہوتے
مقتلِ زندگی میں لالہ بکف
ہم ہراساں ذرا نہیں ہوتے
دل دھڑکتا ہے تار کے اندر
ساز نغمہ سرا نہیں ہوتے
زیست نذرِ تبسمِؔ جاناں!
ایسے دعوے روا نہیں ہوتے
