میرے آفِس والی گاڑی
سات بج کر بیس مِنٹ پر
راوی پُل کے اُوپر سے روز گزر کے جاتی ہے
چند لمحوں کے اِس منظر میں
اِتنا ہی بس جان پڑا ہے
یہ جو عین بھنور کے اندر
دریا بیچ اِک پیڑ کھڑا ہے
میری طرح ہے
جیون کے اِس پُل نیچے سے
کِتنے لمحے پانی بن کر
کُچھ حاصل
کُچھ فانی بن کر
وقت کی بہتی ریت کے ہمرا ہ
بہت ہی آگے نکل گئے ہیں
لیکن تیرے پیار کا پودا
آج بھی دریا بِیچ کھڑا ہے
عُمر کی ٹہنی سُوکھ گئی ہے
لیکن دل کا پیڑ ہرا ہے
آج بھی دریا بیچ کھڑا ہے
