ایسا کوئی محبوب نہ ہو گا نہ کہیں ہے
بیٹھا ہے چٹائی پہ مگر عرش نشیں ہے
ملتا نہیں کیا کیا دو جہاں کو ترے در سے
اک لفظ ‘‘نہیں’’ ہے کہ ترے لب پہ نہیں ہے
تو چاہے تو ہر شب ہو مثالِ شبِ اسریٰ
تیرے لیے دو چار قدم عرشِ بریں ہے
ہر اک کو میسر کہاں اُس در کی غلامی
اُس در کا تو دربان بھی جبریلِ امیں ہے
رکتے ہیں یہاں آکے قدم اہلِ نظر کے
اس کوچے سے آگے نہ زماں ہے نہ زمیں ہے
اے شاہِ زمن اب تو زیارت کا شرف دے
بے چین ہیں آنکھیں مری ، بے تاب جبیں ہے
دل گریہ کناں اور نظر سوئے مدینہ
اعظمؔ ترا اندازِ طلب کتنا حسیں ہے
مصنف: افتخار عارف
مصنف: مظفر وارثی