قرآن كی ايك آيت كی غيبی تشريح

 قرآنيات

قرآن كی ايك آيت كی غيبی تشريح

ثناء اللہ حسين

وہ آیت جس نے امام التفسیر شیخ شعراوی کو حیرت میں ڈال دیا...

شیخ محمد متولی الشعراوی رحمہ اللہ اللہ تعالیٰ کے اس فرمان کی تفسیر میں حیران رہ گئے:

﴿ وَهُوَ الَّذِي فِي السَّمَاءِ إِلَٰهٌ وَفِي الْأَرْضِ إِلَٰهٌ وَهُوَ الْحَكِيمُ الْعَلِيمُ﴾ [الزخرف : ٨٤]

(ترجمہ: اور وہی ہے جو آسمان میں بھی معبود ہے اور زمین میں بھی معبود ہے، اور وہی حکمت والا، علم والا ہے۔)

شیخ الشعراوی نے (اپنے دل میں) کہا: علمِ نحو (Arabic Grammar) کا ایک قاعدہ ہے کہ:"جب کوئی نکرہ (Common Noun) لگاتار دو بار دہرایا جائے، تو پہلا دوسرے سے الگ ہوتا ہے (یعنی دونوں سے مراد الگ الگ چیزیں ہوتی ہیں)۔"

مثال کے طور پر اگر ہم کہیں: "میں نے گھر میں ایک آدمی کا اکرام کیا اور بازار میں ایک آدمی کا۔" تو اس کا مطلب یہ ہوگا کہ جو آدمی گھر میں تھا، وہ اس آدمی سے الگ ہے جو بازار میں تھا۔

نکرہ سے مراد وہ لفظ ہے جس پر "الف اور لام" (ال) نہ ہو۔ چنانچہ جب یہ دہرایا جائے تو معنی بدل جاتا ہے۔اور اللہ تعالیٰ فرما رہا ہے: ﴿ وَهُوَ الَّذِي فِي السَّمَاءِ إِلَٰهٌ وَفِي الْأَرْضِ إِلَٰهٌ ﴾ یہاں لفظ "إِلَٰهٌ" نکرہ ہے اور دو بار دہرایا گیا ہے!تو نحوی قاعدے کے مطابق، جو معبود آسمان میں ہے، وہ اس معبود سے الگ ہے جو زمین میں ہے؟ یعنی کیا (معاذ اللہ) دو خدا ہیں؟!

شیخ کی پریشانی اور اپنے استاد کی طرف سفر--شیخ شعراوی یہ سوچ کر انتہائی غمگین کھڑے ہو گئے اور کہنے لگے: "یہ میں کیا کہہ رہا ہوں؟ میں اللہ عظیم سے استغفار کرتا ہوں، لیکن اس کا جواب کیا ہے؟ مجھے اپنے اساتذہ اور بھائیوں سے اس بارے میں پوچھنا ہوگا۔"

چنانچہ امام شعراوی فوراً تیزی سے اپنے استاد کی طرف روانہ ہوئے، جو اس وقت اپنے گاؤں میں اپنے اہل خانہ کے ساتھ چھٹیاں گزار رہے تھے۔ شیخ شعراوی وہاں پہنچے اور اپنا یہ اشکال (الجھن) اپنے استاد کے سامنے رکھا۔ان کے استاد نے کہا: "آؤ پہلے ہم عصر کی نماز کی تیاری کر لیں کیونکہ وقت قریب ہے " شیخ شعراوی نے اپنے استاد کے ساتھ گاؤں کے آخر میں واقع ایک سادہ سی مسجد میں نماز ادا کی۔ نماز کے بعد دونوں بیٹھ کر اس مسئلے پر بحث کرنے لگے، لیکن افسوس کہ وہ کسی نتیجے پر نہ پہنچ سکے!

ایک اجنبی شخص کی آمد:وہ دونوں اسی الجھن میں تھے کہ اچانک مسجد میں ایک دیہاتی (سادہ سا کسان) داخل ہوا اور کہا: "السلام علیکم۔"انہوں نے سلام کا جواب دیا۔

پھر اس شخص نے اچانک انتہائی فصیح وبلیغ عربی زبان میں (جس سے اس کا لہجہ بالکل بدل چکا تھا) کہا: "کیا آپ لوگ اللہ تعالیٰ کے اس فرمان کے بارے میں سوال کر رہے ہیں: ﴿ وَهُوَ الَّذِي فِي السَّمَاءِ إِلَٰهٌ وَفِي الْأَرْضِ إِلَٰهٌ ۚ﴾ ؟"یہ سن کر شیخ شعراوی اور ان کے استاد دنگ رہ گئے! اس شخص کو کیسے معلوم ہوا کہ ہم کس موضوع پر بات کر رہے ہیں؟ جبکہ اس نے ہماری ایک بات بھی نہیں سنی تھی!اس اجنبی شخص نے اپنی بات جاری رکھتے ہوئے کہا: "کیا آپ لوگ اسمِ موصول (Relative Pronoun) یعنی لفظ "(الَّذِي)" کو بھول گئے؟"آپ لوگ سب سے اہم قاعدہ بھول گئے جو کہتا ہے کہ: "اسمِ موصول نکرہ کو معرفہ (Definite) بنا دیتا ہے۔" اللہ تعالیٰ نے یہ نہیں فرمایا: "(هو في السماء)" [وہ آسمان میں ہے]، بلکہ فرمایا: ﴿وَهُوَ الَّذِي﴾ [اور وہی ہے جو...]۔ آپ لوگ لفظ "الَّذِي" کو کیوں بھول گئے؟پھر اس شخص نے اسمِ موصول کی موجودگی کا راز اور آیت کے اس خاص انداز میں آنے کی حکمت بیان کرنا شروع کی، جبکہ شیخ شعراوی اور ان کے استاد حیرت اور استعجاب سے گم صم بیٹھے سنتے رہے۔ جیسے ہی اس شخص نے مسئلے کی پوری وضاحت مکمل کی، وہ اچانک خاموش ہوا اور خاموشی سے باہر نکل گیا۔شیخ شعراوی نے اپنے استاد سے پوچھا: "یہ عظیم عالم کون تھے؟"استاد نے جواب دیا: "میں تو انہیں نہیں جانتا، یہ ہمارے گاؤں کے نہیں ہیں۔"شیخ شعراوی جلدی سے اٹھے اور مسجد سے باہر نکلے، تو وہاں کچھ لوگ مسجد کے دروازے کے پاس بیٹھے ہوئے تھے۔ شیخ نے ان سے پوچھا: "وہ شخص جو ابھی ابھی باہر نکلا ہے، کہاں گیا؟ کیا آپ لوگ اسے جانتے ہیں؟"لیکن آگے سے جو جواب ملا وہ انتہائی چونکا دینے والا تھا!لوگوں نے کہا: "آپ لوگوں کے پاس نہ تو کوئی اندر گیا ہے اور نہ ہی کوئی باہر آیا ہے!"شیخ نے کہا: "یہ کیسے ہو سکتا ہے؟ شاید وہ اندر گیا ہو اور باہر آیا ہو اور آپ نے اسے نہ دیکھا ہو؟"انہوں نے کہا: "یہ کیسے ممکن ہے؟ ہم تو یہاں اپنے شیخ (آپ کے استاد) کا انتظار کر رہے ہیں تاکہ ان سے کچھ سوالات پوچھ سکیں۔ ہماری پوری توجہ آپ دونوں کی طرف ہی تھی، وہاں کوئی ایک شخص بھی داخل نہیں ہوا۔"

تب شیخ شعراوی رحمہ اللہ نے فرمایا: "بے شک اللہ تعالیٰ اپنے دین کی مدد کرتا ہے اور اپنی کتاب کی حفاظت ایسے لشکروں سے کرتا ہے جنہیں جاننے کی ہمارے اندر سکت نہیں"۔اور سچ فرمایا اللہ العظیم نے:﴿ إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ ۚ﴾

(ترجمہ: بیشک ہم نے ہی اس ذکر (قرآن) کو نازل کیا ہے اور ہم ہی اس کے محافظ ہیں۔)