قرآنيات
قرآن اور روایات
ڈاكٹر عمار الحريری ( عربی سے ترجمہ طفيل ہاشمی)
ہم روایات پر قرآن کریم کی حاکمیت (معیاریت) کو کیوں مسترد کرتے ہیں؟
اولاً: کیونکہ ہم نے اپنی عملی زندگی میں اللہ کی کتاب پر ویسا بھروسہ نہیں کیا جیسا کہ کرنے کا حق تھا، اور نہ ہی ہم نے اس کے کمال و تمام ہونے کے مفاہیم کو پیشِ نظر رکھا؛ کہ یہ سب سے سیدھی ہدایت ہے، ہر چیز کا بیان ہے، اللہ نے اس میں کوئی کمی نہیں چھوڑی، اور یہ شریعت کی بنیاد اور حکمت کا سرچشمہ ہے۔
دوئم: کیونکہ ہم نے عملی طور پر قرآن کے دین کو روایات کے دین سے بدل دیا، یہاں تک کہ "سند" کو تقدس کا رنگ دے دیا گیا اور اسے تقلید و آباؤ اجداد کی پیروی کا راستہ بنا لیا گیا۔ یہ صورتحال اللہ تعالیٰ کے اس فرمان کے مفہوم سے دور نہیں ہے: (بلکہ ہم تو اس کی پیروی کریں گے جس پر ہم نے اپنے باپ دادا کو پایا)۔
سوئم: کیونکہ ہم نے اپنی عقلوں اور توجہ کو روایات کی طرف موڑ دیا، ان کے لیے مجلسیں سجائیں اور اجازت نامے (اجازات) جاری کیے، گویا یہ قرآن کے متوازی کوئی دین ہو۔ اس کے مقابلے میں قرآن پر غور و فکر کرنے، اس سے انقلاب برپا کرنے اور اسے ایک اعلیٰ ترین مرجع (Authority) اور اللہ کا کبھی نہ ختم ہونے والا کلام سمجھ کر مطالعہ کرنے کے رجحان میں کمی آئی۔
چہارم: کیونکہ ہمیں منہجی طور پر یہ سکھایا گیا کہ اللہ کی کتاب روایات کی محتاج ہے، اور یہ کہ روایات قرآن پر حاکم ہیں، اسے منسوخ کرتی ہیں، اس کی قید لگاتی ہیں، اسے مخصوص کرتی ہیں اور اس کے معانی و تفسیر پر قابض ہیں۔ نتیجہ یہ نکلا کہ قرآن کا مقام کمزور ہو گیا اور اس کا کام صرف جنازوں، خوش الحانی سے تلاوت، مقابلوں اور رسمی عبادات تک محدود ہو کر رہ گیا۔
پنجم: کیونکہ ہم اسی تحریف اور تبدیلی کی آفت میں مبتلا ہو گئے جس میں سابقہ امتیں مبتلا ہوئی تھیں، چنانچہ ہم نادانستہ طور پر قرآن کو چھوڑ دینے (ہجرِ قرآن) کے زمرے میں آ گئے۔
ششم: کیونکہ ہم نے روایت کو مطلق طور پر "سنتِ نبوی" کے مفہوم میں داخل کر دیا، حالانکہ سنت اپنی اصل میں رسول اللہ ﷺ کی جانب سے قرآن کریم کی عملی تطبیق (Application) کا نام ہے۔ جہاں تک روایات، اخبار یا احادیث کا تعلق ہے، تو یہ ظنی (Guesstimate) نقولات ہیں جنہیں راوی اور نقاد نقل کرتے ہیں؛ جن کے الفاظ میں اختلاف پایا جاتا ہے، کبھی وہ مرفوع ہوتی ہیں کبھی موقوف، کبھی متصل اور کبھی مرسل، اور کبھی مقبول تو کبھی مردود۔ ان کی بنیاد صرف سند اور حسنِ ظن پر ہے، اس سے زیادہ کچھ نہیں۔
ہفتم: کیونکہ قرآن کی حاکمیت کو فعال کرنے کا لازمی نتیجہ ان بہت سی روایات کے سقوط (ختم ہونے) کی صورت میں نکلے گا جو قرآنی آیات کی مخالفت، ان کی تحدید، تخصیص یا ان کی منسوخی کے دعوے کے لیے گھڑی گئی تھیں۔
قرآنی حاکمیت ایک ہمہ گیر اور کلی معیار ہے، جو ایک ایسے نظام پر قائم ہے جس میں تضاد یا تقسیم کی گنجائش نہیں۔ اس لحاظ سے قرآن ہر دوسری چیز پر حاکم ہے؛ لہذا ہر وہ روایت جو اس نظام کے خلاف ہو، وہ اپنی بنیاد سے ہی باطل قرار پائے گی۔
ان تمام باتوں کی روشنی میں یہ کہا جا سکتا ہے کہ مسلم عقل—روایات کے ڈھیر اور تقلید کے غلبے کی وجہ سے—نادانستہ طور پر قرآن سے دشمنی کے لیے تیار ہو چکی ہے۔ یہاں تک کہ اب قرآن کی مرکزیت پر اصرار کرنا ایک الزام بن گیا ہے، قرآن کا حوالہ دینا (بعض کے نزدیک) باعثِ عار ہے، اور اسے دوسری چیزوں پر مقدم رکھنا شک کی نگاہ سے دیکھا جاتا ہے۔ (اور جو شخص رحمٰن کے ذکر سے تغافل برتتا ہے، ہم اس پر ایک شیطان مسلط کر دیتے ہیں، پھر وہ اس کا ساتھی بن جاتا ہے)۔
