حمد رب جليل
مرا ہے خدا تو ہی آسرا ،تری شان جل جلالهٗ
ترا لطف حد سے ہے ماورا، تری شان جل جلالهٗ
تجھے واسطہ ہے رسول کا ،تجھے واسطہ ہے بتول کا
مجھے خود سے کر دے تو آشنا، تری شان جل جلالهٗ
تو حکیم ہے تو بصیر ہے ،تو علیم ہے تو خبیر ہے
ترے علم کی نہیں انتہا ،تری شان جل جلالهٗ
میں خدا خدا ہی کروں سدا ،تری یاد میں ہی جیوں سدا
ترا عشق ہی ہے مری بقا ،تری شان جل جلالهٗ
ترا تذکرہ ہے گلی گلی ،تری بات دل کو لگے بھلی
تو ہے دل میں مومنوں کے بسا، تری شان جل جلالهٗ
مجھے اپنے رنگ میں ڈھال دے ،مجھے تیرگی سے نکال دے
تری دسترس میں ہے سب خدا، تری شان جل جلالهٗ
ہوئے خلق جس سے یہ دوجہاں ،ترا نور جس سے ہوا عیاں
وہ ہے حرف کُن ترا معجزہ ،تری شان جل جلالهٗ
تری حمد کرتے ہیں وہ سدا، جنہیں تو نے خود سے قریں کیا
ہیں وہ لوگ کتنے ہی خوش نوا، تری شان جل جلالهٗ
اسے مغفرت کی نوید دے ،اسے ذوق حمد مزید دے
ہے بلالؔ واصف بے نوا ،تری شان جل جلالهٗ
بلال رشيد
