حمد رب جليل

حمد باری تعالیٰ

اک عہدِ بے مثال ہے اِیّاکَ نَعْبُدُ
تمجیدِ ذوالجلال ہے اِیّاکَ نَعْبُدُ
اِیّاک نستعین ہے مقصودِ اہلِ دل
منشورِ اہلِ حال ہے اِیّاکَ نَعْبُدُ
دیباچۂ کتابِ الہٰی ہے فاتحہ
اور مرکزی خیال ہے اِیّاکَ نَعْبُدُ
تقریب وصلِ عابد و معبود ہے نماز
کیفیتِ وصال ہے اِیّاکَ نَعْبُدُ
پوشیدہ ان حروف میں ہے روحِ بندگی
قرآن کاجمال ہے اِیّاکَ نَعْبُدُ
وردِ زبانِ بوذر و سلمان و مرتضیٰ
ذوقِ دلِ بلال ہے اِیّاکَ نَعْبُدُ
بندہ ہوا ہے فائزِ معراجِ بندگی
کیا خوب اشتغال ہے اِیّاکَ نَعْبُدُ
دل سے نکالتا ہے غمِ روزگار کو
ہاں دافعِ ملال ہے اِیّاکَ نَعْبُدُ
شہزاد کو نصیب ہو مولا وہ بندگی
جس بندگی پہ دال ہے اِیّاکَ نَعْبُدُ

شہزاد مجددی