حمد باری تعالیٰ
رائی ہو یا جبل ہو سب میں کمال تیرا
ہر کام اے الٰہی ہے بے مثال تیرا
ٹوٹے گلاب جتنے بھی شاخسارِ کُن سے
سب میں تری مہک ہےسب میں جمال تیرا
تاجِ انا فنا کی لَو سے پگھل اٹھے گا
باقی رہے گا بس تو جاہ و جلال تیرا
پھر اُس غزال جاں کی کیا اورجستجو ہو
ہوجاۓ جس کو حاصل مشکِ وصال تیرا
کیا اہل کفر جانیں ہم کو یقیں ہے اک دن
بس ہوگی چال تیری بس ہوگا جال تیرا
ہوتی ہےضرب کاری جب یاس کی جگر پر
تسکین بخشتا ہے اس کو خیال تیرا
جانا ہے ہم نے آکر رحمٰن کی ضیا میں
واجب ہے شکر ہر دم اے ذوالجلال تیرا
صدقے میں مصطفٰی کے آسان تر ہو مولا
احمدؔ سے روز محشر جو ہو سوال تیرا
احمدؔ سکندر پوری یوپی انڈیا
