بہار میں جو جُنوں کا وقار ٹھہرے گا
مرے ہی چاک گریباں کا تار ٹھرے گا
جو لمحہ لمحہ - تِرا انتظار ٹھہرے گا
تو کِس طرح یہ دلِ بے قرار ٹھہرے گا
کسی جگہ تو گُل و لالہ خیمہ زن ہوں گے
‘‘کہیں تو قافلۂ نَو بہار ٹھہرے گا ’’
یہی تو ٹھرے ہیں شاید حُدودِ مُختاری
کہ جبرِ غم ہی مِرا اختیار ٹھہرے گا
چمک اُٹھے گا گُہر بن کے پر توِ خُور سے
جو ایک قطرہ سرِ نوکِ خار ٹھہرے گا
رہا اگر یہی اپنا جُنونِ حق گوئی !
یہ سر ضرور سزاوارِ دار ٹھہرے گا
کبھی تو ہم بھی سبکدوش ہوں سرِ مقتل
ہمارے شانوں پہ کب تک یہ بار ٹھہرے گا
عجیب حال ہے دل کا کہ ان کی محفل کو
چلے گا ’ چل کے مگر باربار ٹھہرے گا
کہاں تک اشک بہائے گا دیدۂ خُونّبار
برس برس کے یہ ابرِ بہار ٹھہرے گا
نہ یُوں تڑپ دلِ ناداں کہ ان کی نظروں میں
تِرا بھرم نہ مِرا اعتبار ٹھہرے گا
بہ فیضِ مصحفیؔ بزمِ سخن میں یزدانیؔ
مِرا بھی نام بصد افتخار ٹھہرے گا
یزدانیؔ جالندھری ۔ بشکریہ :اُردو ڈائجسٹ ۔ شمارہ : مئی ۹۱ء
