جی چاہتا ہے فلک پہ جاؤں
سورج کو غروب سے بچاؤں
 
بس میرا جو چلے گردشوں پر
دن کو بھی نہ چاند کو بجھاؤں
 
میں چھوڑ کے سیدھے راستوں کو
بھٹکی ہوئی نیکیاں کماؤں
 
میں شب کے مسافروں کی خاطر
مشعل نہ ملے تو گھر جلاؤں
 
اشعار ہیں میرے استعارے
آؤ تمہیں آئینے دکھاؤں
 
یوں بٹ کے بکھر کے رہ گیا ہوں
ہر شخص میں اپنا عکس پاؤں
 
آواز جو دوں کسی کے در پر
اندر سے بھی خود نکل کے آؤں
 
اے چارہ گران عصر حاضر
فولاد کا دل کہاں سے لاؤں
 
ہر رات دعا کروں سحر کی
ہر روز نیا فریب کھاؤں
 
ہر جبر پہ صبر کر رہا ہوں
اس طرح کہیں اجڑ نہ جاؤں
 
گھر ڈوب رہے ہیں تیرگی میں
قبروں پہ مگر دیے جلاؤں
 
رونا بھی تو طرز گفتگو ہیں
آنکھیں جو رکیں تو لب ہلاؤں
 
خود کو تو ندیم آزمایا
اب مر کے خدا کو آزماؤں

(قرآن مجید نے کہا والشعرا یتبعھم الغاؤن الم تر انھم فی کل واد یھیمون وانھم یقولون مالا تفعلون، دیکھیے احمد ندیم قاسمی نے کتنی اچھی باتیں کرتے کرتے آخر میں کیسی عجیب بات کہہ دی ہے یہ بات وہی کہہ سکتا ہے کہ جو خدا کی عظمت سے ناواقف ہواور انسان کی حیثیت سے نابلد ہو۔ اس کو شاعرانہ تعلی یا شعری انداز بیاں کہہ کر نظر انداز کرنا خود ایک جہالت ہے ۔اللہ وہ ہستی نہیں کہ جس کو آزمایا جائے ۔ادارہ)