کبھی وہ دن بھی ہوتے تھے
سکوں سے ہم بھی سوتے تھے
بہاریں مسکراتی تھیں
وفا کے گیت گاتی تھیں
وہ چشمے گنگناتے تھے
پپیہے چہچہاتے تھے
یہ خطہ تھا حسیں ایسا
کسی ایک نازنین جیسا
نگاہیں دیکھتی رہتیں
مگر کچھ سوچتی رہتیں
وہ منظر دل لبھا جاتے
نظر سے دل میں آجاتے
عجب وادی کی خوشبو تھی
عجب لوگوں کو خُو بُو تھی
ہر ایک تھا جاں نثار ان میں
مکیں سارے نمازی تھے
مجاہد اور غازی تھے
محبت تھی چلن ان کا
عجب تھا بانکپن ان کا
یہ وادی تھی دلہن جیسی
گلاب نسترن جیسی
یہاں جگنو اترتے تھے
چراغاں خوب کرتے تھے
حسیں پریاں اترتی تھیں
جو شب بھر رقص کرتی تھیں
یہ وادی تھی کہ جنت تھی
ہر ایک پل جس میں راحت تھی
جو اس کو دیکھنے آتا
اسی کا ہو کے رہ جاتا
ہجوم عاشقاں ایسا
کبھی دیکھا کہاں ایسا
یہاں جو ایک بار آیا
وہ مڑ کے بار بار آیا
نظر تھکتی نہ دل بھرتے
چلے جاتے سفر کرتے
ہر ایک منظر سہانا تھا
دیوانہ سب زمانہ تھا
مکیں سارے مکاں سارے
خوشی سے شادماں سارے
اچانک پھر دن پھرے ایسے
غموں میں ہم گھرے ایسے
نظر اس کو لگی ایسی
کسی کو کب لگی ایسی
کوئی ایسا گیا ہو کر
دلوں میں نفرتیں بو کر
نہ کوئی باپ سے خوش ہے
نہ اپنے آ پ سے خوش ہے
نہ ماؤں کی رہی عزت
نہ بیٹی کی بچی عصمت
یہ انساں کھو گیا کیونکر
یہ حیواں ہو گیا کیونکر
یہ کیوں خوں خوار بن بیٹھا
کھلی تلوار بن بیٹھا
کرے سب کام مرضی سے
دکھائی دیں جو فرضی سے
خدا کا نام لے لے کر
پیے اسلام لے لے کر
ہمیں کافر بتاتا ہے
عجب فتوے سناتا ہے
لیے بندوق آتا ہے
ہماری جاں کو آتا ہے
بنا ہے پیکر نفرت
عجب ہے دیدنی حالت
کہیں خود کش دھماکے ہیں
یہ بندے کس خدا کے ہیں
اِدھر دیکھو اِدھر لاشیں
اُدھر دیکھو اُدھر لاشیں
کہیں گردن کٹے لاشے
کہیں ٹکڑے کٹے لاشے
بڑھی لوگوں میں یوں نفرت
ہوئی عنقا یہاں الفت
بنام مذہب و ملت
وہ پھیلائی گئی دہشت
کہ رشتے چیخ اٹھے ہیں
فرشتے چیخ اٹھے ہیں
لہو میں تر بہ تر وادی
لہو ہے سر بہ سر وادی
درندے دندناتے ہیں
قیامت سب پہ ڈھاتے ہیں
ستم کی انتہا یہ ہے
الم کی انتہا یہ ہے
گھروں سے کر دیا بے گھر
پھریں انساں سبھی در در
کرم مالک کرم ہم پر
رحم مالک رحم ہم پر
نبی کا واسطہ تجھ کو
دکھا دے راستہ مجھ کو
نوائے بے نوا سن لے
صدا میرے خدا سن لے
اسے آباد کر دے تو
ہمیں پھر شاد کر دے تو
یہاں اتریں نہ میزائل
یہاں کوئی نہ ہو گھائل
وہ چشمیں گنگنائیں پھر
پپیہے چہچہائیں پھر
چمن میں پھر بہار آئے
گلوں پر بھی نکھار آئے
خطائیں معاف کر مالک
دلوں کو صاف کر مالک
بنا دے پھر ہمیں بھائی
کہ ہیں اسلام کے داعی
دلوں میں پیار یوں بھر دے
بہم شیر و شکر کر دے
محبت کی امیں کر دے
وفا کی سرزمیں کر دے
اسے پھر سے حسیں کر دے
سوات دل نشیں کر دے ……!!!
