ازل ، ابد ہیں سرود تیرے
نظام ہست اور بود تیرے
ہر ایک جا ہے وجود تیرا
تمام اہل وجود تیرے
یہ خاک و باد اور یہ آب و آتش
ہیں تیرے شاہد ، شہود تیرے
میری عبادت ہے تیرا احساں
جبینیں تیری ، سجود تیرے
ستارے ہوں یا ہوں چاند سورج
چراغِ بے نقص دُود تیرے
تیری ہی قدرت کا ہے نمونہ
یہ سائباں بے عمود تیرے
یہ جاں تیری ، یہ روح تیری
یہ جسم اور یہ غدود تیرے
بشر پہ کب منکشف ہوئے ہیں
رموز تیرے ، عقود تیرے
خیال کی ہر اڑان عاجز
پرے ہیں حد سے حدود تیرے
صفات ساری ہیں تجھ کو زیبا
ہیں نام تیرے ، نمود تیرے
