اے رسول امیںﷺ، خاتم المرسلیںﷺ، تجھ سا کوئی نہیں ، تجھ سا کوئی نہیں
ہے عقیدہ یہ اپنا بصدق و یقیں ، تجھ سا کوئی نہیں ، تجھ سا کوئی نہیں
اے ابراہیمی و ہاشمی خوش لقب ، اے تو عالی نسب! اے تو والا حسب
دُودمانِ قریشی کے دُرِّ ثمیں، تجھ سا کوئی نہیں ، تجھ سا کوئی نہیں
دست قدرت نے ایسا بنایا تجھے ، جملہ اوصاف سے خود سجایا تجھے
اے ازل کے حسیں ، اے ابد کے حسیں ، تجھ سا کوئی نہیں ، تجھ سا کوئی نہیں
بزم کونین پہلے سجائی گئی ، پھر تری ذات منظر پہ لائی گئی
سید الاولیں ، سیدالآخریں ، تجھ سا کوئی نہیں ، تجھ سا کوئی نہیں
تیرا سکہ رواں کُل جہاں میں ہوا ، اس زمیں میں ہوا ، آسماں میں ہوا
کیا عرب، کیا عجم ، سب ہیں زیر نگیں ، تجھ سا کوئی نہیں ، تجھ سا کوئی نہیں
تیرے انداز میں وُسعتیں فرش کی ، تیری پرواز میں رِفعتیں عرش کی
تیرے اَنفاس میں خُلد کی یاسمیں ، تجھ سا کوئی نہیں ، تجھ سا کوئی نہیں
‘‘سِدرَۃُ المنتہی’’ رہگزر میں تری ، ‘‘قابَ قوسَین’’ گرد سفر میں تری
تو ہے حق کے قریں ، حق ہے تیرے قریں ، تجھ سا کوئی نہیں ، تجھ سا کوئی نہیں
کہکشاں ضَو ترے سَرمدی تاج کی ، زُلفِ تاباں حَسِیں رات معراج کی
‘‘لَیلَۃُ القدر’’ تیری مُنور جبیں، تجھ سا کوئی نہیں ، تجھ سا کوئی نہیں
مصطفی مجتبی ، تیری مدح وثنا ، میرے بس میں نہیں ، دَسترس میں نہیں
دل کو ہمت نہیں ، لَب کو یارا نہیں ، تجھ سا کوئی نہیں ، تجھ سا کوئی نہیں
کوئی بتلائے کیسے سَراپا لکھوں ، کوئی ہے ! وہ کہ میں جس کو تجھ سا کہوں
تَوبہ تَوبہ ! نہیں کوئی تجھ سا نہیں ، تجھ سا کوئی نہیں ، تجھ سا کوئی نہیں
چار یاروں کی شانِ جلی ہے بھلی ، ہیں یہ صدیقؓ ، فاروقؓ ، عثمانؓ ، علیؓ
شاہدِ عَدل ہیں یہ ترے جانشیں، تجھ سا کوئی نہیں ، تجھ سا کوئی نہیں
اے سراپا نفِیسﷺ اَنفَس دو جہاں ، سَرورِ دِلبراں دلبرِ عاشقاں
ڈھونڈتی ہے تُجھے میری جانِ حزیں، تجھ سا کوئی نہیں ، تجھ سا کوئی نہیں
مصنف: افتخار عارف
مصنف: مظفر وارثی