اصلاح و دعوت
كاموں ميں نفاست
توصيف اكرم
آپ نے کبھی دوسروں کے لیے سیب کاٹے ھیں ؟ کچھ لوگ سیب سادہ طریقے سے کاٹ کر سامنے رکھ دیتے ھیں ، کچھ لوگ سیب کاٹنے کے دوران ان کے بیج والے حصے کو بھی علیحدہ کر دیتے ہیں -اس بیج کو علیحدہ کرنے میں کچھ سیکنڈ زیادہ لگتے ھیں لیکن کھانے والے کو اطمینان ملتا ہے اور وہ زیادہ مزے سے سیب کھا لیتا ہے -اسی کو نفاست کہتے ہیں
آپ نے کبھی ھاف فرائی انڈہ بنایا ھے ؟ کچھ لوگ ھاف فرائی انڈہ عام طریقہ سے بناتے ہیں جبکہ ھاف فرائی انڈہ بنانے کے لیے آگ نسبتاً کم رکھی جاتی ہے ( تاکہ زردی کچی رھے ) لیکن سفیدی پوری طرح پَک جائے ، ھاف فرائی انڈے کو پلٹایا بھی نہیں جاتا صرف ڈھکن کے زریعے دَم دیا جاتا ھے اور آئل ، مکھن وغیرہ کم استعمال کیا جاتا ہے ، ایسے طریقہ سے بہت کم لوگ انڈہ بناتے ہیں ، اصلی طریقے اور روایتی طریقہ میں صرف تکنیک کا فرق ھے اور ھو سکتا ھے کہ کچھ سیکنڈ زیادہ لگ جائیں ، روایتی طریقہ میں انڈے کے کنارے سرخ ھو جاتے ہیں اور زردی بھی پک جاتی ھے جس کی وجہ سے اصلی ھاف فرائی کا مزہ نہیں ملتا جبکہ صحیح طریقہ سے پکانے پر لطف دوبالا ھو جاتا ہے-اسی کو نفاست کہتے ہیں
میرے کام میں سٹین لیس سٹیل کے پائپ استعمال ھوتے ہیں ، یہ بیس فٹ لمبے ھوتے ہیں جن کو کاٹنا پڑتا ھے ، میں اس کو مزدوری پر باھر سے ھی کٹواتا ھوں ، ایک بندے سے ڈسک کٹر مشین سے پائپ کٹوائے ، اس نے مزدوری طے ھونے کے بعد پائپ کاٹنے شروع کیے لیکن اس میں دو مسئلے آ رھے تھے ، ایک تو پائپ کے سائز میں سوتر تک کا فرق آ رہا تھا اور دوسرا پائپ کے کاٹنے کے بعد اس کے کناروں پر سٹیل کی باریک بُر آگئی تھی جس کی وجہ سے ھاتھ زخمی ھونے کا شدید اندیشہ رھتا ھے اور اس کاریگر نے اس کو صاف نہیں کیا -اگلی دفعہ ایک اور کاریگر سے اتنی ھی مزدوری پر کام کروایا ، اس نے اطمینان سے پہلے اڈا سیٹ کیا اور پچھلے والے کاریگر سے کچھ زیادہ وقت لگا کر پائپ کاٹا ( ایک پائپ میں تقریباً بیس سیکنڈ زیادہ لگائے ) اور کاٹنے کے بعد اس پائپ کے کناروں کو اطمینان سے ڈسک کے ساتھ ھی رگڑ دیا تاکہ بُر ختم ھو جائے ،میں پہلے والے کے پاس دوبارہ کبھی نہیں گیا اور اب دوسرے والے سے ھی اپنا کام کرواتا ہوں -اسی کو نفاست کہتے ہیں -کام میں نفاست صرف اس وقت آتی ھے جب آپ اپنے کام سے مخلص ھوں گے اور شوق سے کریں گے -پوری دنیا میں سب سے نفیس اور اچھا کام کرنے والی قوم جاپان کی ھے ، جس چیز پر میڈ ان جاپان لکھا ھو گا وہ کبھی گھٹیا نہیں ھو سکتی ، ایک ھی چیز کے ریٹ مختلف ھو سکتے ہیں ، ان کے معیار میں فرق ھو سکتا ہے لیکن پھر بھی ادھر کی سب سے ھلکی کمپنی بھی گھٹیا چیز نہیں بناتی -اس کی سب سے بڑی وجہ یہ ھے کہ وہ لوگ اپنے کام سے مخلص ھیں ، اپنے گاھک سے مخلص ھیں -کیا ھم اپنے کام سے مخلص ھیں ؟؟
جو لوگ انڈسٹری کا کام سمجھتے ہیں وہ یہ بات جانتے ہیں کہ پاکستان کی اکثر بنی ھوئی چیزیں عالمی معیار کی نہیں ھوتیں ، اگر کسی چیز کا آرڈر آ بھی جائے تو دوسری تیسری دفعہ میں معیار پر سمجھوتے کی وجہ سے آرڈر بند ھو جاتا ھے -کاش یہ بات ھمیں شروع سے ھی سکھائی جاتی ، ھماری تربیت کا حصہ ھوتی ، ھمارے گھروں ، سکولوں میں اس کو سکھانے کا رواج ھوتا کہ ھم اپنے کام سے مخلص ھو جائیں ، ترقی یافتہ ممالک کی کامیابی کا یہی راز ھے !
میری یہ بات ھر بندے تک نہیں پہنچ سکتی لیکن اگر آپ یہ پڑھ رھے ھیں تو پہلے اپنی ذات سے اس کو شروع کرنا ھے اور دوسرا جو بھی بندہ ملے اس کو یہ تبلیغ کرنی ھے کہ کم از کم ھم اپنے کام سے مخلص ھو جائیں-
