قبر اوراعمال صالحہ

میںریاض جانے کے لیے ایک گھنٹہ پہلے گھر سے نکلا۔ لیکن راستے میں رش اور چیکنگ کی وجہ سے میں ائیرپورٹ لیٹ پہنچا۔جلدی سے گاڑی پارکنگ میں کھڑی کی، اور دوڑتے ہوئے کاؤنٹرپر جا پہنچا۔ کاؤنٹر پرموجودملازم سے میں نے کہا۔ مجھے ریاض جانا ہے، اس نے کہا ریاض والی فلائٹ تو بند ہو چکی ہے، میں نے کہا پلیز مجھے ضرور آج شام ریاض پہنچنا ہے۔ اُس نے کہا زیادہ باتوں کی ضرورت نہیں ہے۔ اس وقت آپکو کوئی بھی جانے نہیں دے گا۔میں نے کہا اللہ تمھارا حساب کردے۔اس نے کہا اس میں میراکیاقصور ہے؟بہرحال میں ائیرپورٹ سے باہر نکلا۔حیران تھا کیا کروں۔ ریاض جانے کا پروگرام کینسل کر دوں؟یا اپنی گاڑی اسٹارٹ کر کے روانہ ہو جاؤں۔یا ٹیکسی میں چلا جائوں۔بہرحال ٹیکسی میں جانے والی بات پر اتفاق کیا۔ائیرپورٹ کے باہر ایک پرائیوٹ گاڑی کھڑی تھی۔میں نے پوچھا ریاض کے لیے کتنا لو گے۔اُس نے کہا 500ریال، بہرحال 450ریال میں بڑی مشکل سے راضی کیا۔اور اس کے ساتھ بیٹھ کر ریاض کے لیے روانہ ہو گیا۔بیٹھتے ہی میں نے اُس سے کہا کہ گاڑی تیز چلانی ہے،اُس نے کہا فکر مت کرو۔واقعی اس نے خطرناک حدتک گاڑی دوڑانا شروع کر دی۔راستے میں اس سے کچھ باتیں ہوئیں۔اُس نے میری جاب اور خاندان کے متعلق کچھ سوالات کیے۔اور کچھ سوال میں نے بھی پوچھ لیے۔
اچانک مجھے اپنی والدہ کا خیال آیا۔ کہ اُن سے بات کرلوں۔ میں نے موبائل نکالا۔ اور والدہ کو فون کیا۔ اُنہوں نے پوچھا بیٹے کہاں ہو۔ میں نے جہاز کے نکل جانے اور ٹیکسی میں سفر کرنے والی بات بتادی۔ ماں نے دُعا دی۔ بیٹے اللہ تمہیں ہر قسم کے شرسے بچادے۔ میں نے کہا۔ ان شاء اللہ جب میں ریاض پہنچ جاؤ ں گا۔ تو آپکو اطلاع دے دونگا۔قدرتی طورپر میرے دل پر ایک پریشانی چھا گئی۔ اور مجھے ایسا لگ رہا تھا جیسے کوئی مصیبت میرا انتظار کر رہی ہو۔ اُس کے بعد میں نے اپنی بیوی کو فون کیا۔ میں نے اُسے بھی ساری بات بتا دی، اور اُسے ہدایت کی، کہ بچوں کا خیال رکھے، بالخصوص چھوٹی بچی کا اُ س نے کہا جب سے تم گئے ہو مسلسل آپ کے بارے میں پوچھ رہی ہے۔ میں نے کہامیری بات کرواؤ۔بچی نے کہا بابا آپ کب آئیں گے؟ میں نے کہا۔ ابھی تھوڑی دیر میں آجاؤں گا۔ کوئی چیز چاہیے؟ وہ بولی ہاں میرے لیے چاکلیٹ لے آنا۔ میں ہنسا اور کہا ٹھیک ہے۔اس کے بعد میں اپنی سوچوں میں گم ہو گیا۔ کہ اچانک ڈرائیور کے سوال نے مجھے چونکا دیا۔ پوچھا کیا میں سگریٹ پی سکتا ہوں۔ میں نے کہا۔ بھائی تم مجھے ایک نیک اور سمجھدار انسان لگ رہے ہو۔ تم کیوں خود کو اور اپنے مال کونقصان پہنچارہے ہو۔ اُس نے کہا۔ میں نے پچھلے رمضان میں بہت کوشش کی کہ سگریٹ چھوڑ دوں، لیکن کامیاب نہ ہو سکا۔ میں نے کہا۔ اللہ تعالیٰ نے تمہیں بڑی قوت دی ہے تم سگریٹ چھوڑنے کا معمولی سا کام نہیں کر سکتے۔ بہرحال اُس نے کہا آج کے بعد میں سگریٹ نہیں پیوں گا۔ میں نے کہا اللہ تعالیٰ آپ کو ثابت قدمی عطافرمائے (آمین)مجھے یاد پڑتا ہے کہ  اس کے بعد میں نے گاڑی کے دروازے کے ساتھ سر لگایا کہ اچانک گاڑی سے زوردار دھماکہ کی آواز آئی۔ اور پتا لگا کہ گاڑی کا ایک ٹائر پھٹ گیا ہے۔ میں گھبرایااور ڈرائیور سے کہا۔ سپیڈ کم کردواور گاڑی کو قابو کرو۔ اُس نے گھبراہٹ میں کوئی جواب نہیں دیا۔گاڑی ایک طرف نکل گئی اور قلابازیاں کھاتی ہوئی ایک جگہ رُک گئی۔ مجھے اُس وقت اللہ نے توفیق دی کہ میں نے زورزور سے کلمہ شہادت پڑھا۔مجھے سر میں چوٹ لگی تھی۔ اور درد کی شدت سے ایسا محسوس ہورہا تھا۔ کہ سر پھٹاجارہا ہے۔ میں جسم کے کسی حصے کو حرکت نہیں دے سکتا تھا۔ میں نے اپنی زندگی میں اتنا درد کبھی نہیں دیکھا تھا۔ میں بات کرنا چاہ رہا تھا لیکن بول نہیں سکتا تھا جب کہ میری آنکھیں کھلی تھیں۔ لیکن مجھے کچھ نظر نہیں آرہا تھا۔ اتنے میں لوگوں کے قدموں کی آوازیں سُنیں، جو ایک دوسرے سے کہہ رہے تھے کہ اسے ہلاؤ نہیں سر سے خون نکل رہا ہے۔ اور ٹانگیں ٹوٹ چکی ہیں میری تکلیف میں اضافہ ہوتا چلا جارہا تھا۔ اور سانس لینے میں شدیددشواری محسوس کررہا تھا۔ مجھے اندازہ ہوا کہ شائد میری موت آگئی ہے۔ اُس وقت مجھے گزری زندگی پر جو ندامت ہوئی، میں اُسے الفاظ میں بیان نہیں کر سکتا۔ مجھے پتا چلا کہ اب مجھے موت سے کوئی نہیں بچا سکتا۔
اس کے بعد لوگوں کی آوازیں آنا بند ہو گئیں۔ میری آنکھوں کے سامنے مکمل تاریخی چھاگئی۔ اور میں ایسا محسوس کررہا تھا۔ جیسے میرے جسم کوچھریوں سے کاٹا جارہا ہو۔ اتنے میں مجھے ایک سفید ریش آدمی نظر آیا۔ اُس نے مجھے کہا بیٹے یہ تمھاری زندگی کی آخری گھڑی ہے۔ میں تمہیں نصیحت کرنا چاہتاہوں کیونکہ اللہ تعالیٰ نے مجھے تمھارے پاس بھیجا ہے۔ میں نے پوچھا کیا ہے نصیحت؟اُ س نے کہا۔ عیسائیت کی ترغیب ۔یہ لو صلیب ،خدا کی قسم اس میں تمھاری نجات ہے۔ اگر تم اس پر ایمان لائے تو تمہیں اپنے گھروالوں کو لوٹا دوں گا اور تمھاری روح واپس لے آؤں گا۔ جلدی سے بولو۔ ٹائم ختم ہوا جارہا ہے۔ مجھے اندازہ ہوا یہ شیطان ہے۔ مجھے اْس وقت جتنی بھی تکلیف تھی اور جتنا بھی اذیت سے دوچارتھا لیکن اْس کے باوجود اللہ اور اْس کے رسول پر پکا ایمان تھا۔ میں نے اْسے کہا جاؤاللہ کے دشمن۔ میں نے اسلام کی حالت میں زندگی گزاری ہے اور مسلمان ہو کر مروں گا۔ اْس کا رنگ زرد پڑگیا۔ بولا تمہاری نجات اسی میں ہے کہ تم یہودی یا نصرانی مر جاؤ۔ ورنہ میں تمھاری تکلیف بڑھا دوں گا۔ اور تمہاری رْوح قبض کر دوں گا۔ میں نے کہا موت تمھارے ہاتھ میں نہیں ہے جوبھی ہو میں اسلام کی حالت ہی میں مروں گا۔اتنے میں اْس نے اوپردیکھا اور دیکھتے ہی بھاگ نکلا۔ مجھے لگا جیسے کسی نے اْسے ڈرایا ہو۔ اچانک میں نے عجیب قسم کے چہروں والے اور بڑے بڑے جسموں والے لوگ دیکھے۔ وہ آسمان کی طرف سے آئے اورکہا۔ السلام علیکم میں نے کہا وعلیکم السلام۔اْس کے بعد وہ خاموش ہوگئے اورایک لفظ بھی نہیں بولے۔ اْن کے پاس کفن تھے مجھے اندازہ ہوا کہ میری زندگی ختم ہوگئی۔ اْن میں سے ایک بہت بڑا فرشتہ میری طرف آیا۔ اور کہا یایتھا النفس المطمئنۃ اْخرجی الی مغفرۃ من اللہ ورضوان (اے نیک رْوح اللہ کی مغفرت اور اْس کی خوشنودی کی طرف نکل آ)یہ بات سْن کر میری خوشی کا ٹھکانہ نہیں رہا۔ میں نے کہا اللہ کے فرشتے میں حاضر ہوں۔اْس نے میری روح کھینچ لی۔ مجھے اب ایسا محسوس ہورہا تھا۔ جیسے میں نیند اور حقیقت کے مابین ہوں۔ ایسا لگا کہ مجھے جسم سے آسمان کی طرف اْٹھایا جارہا ہے۔ میں نے نیچے دیکھا تو پتا چلا کہ لوگ میرے جسم کے اردگرد کھڑے ہیں اور انہوں نے میرے جسم کو ایک کپڑے سے ڈھانپ دیا۔ اْن میں سے کسی نے کہا۔ انا للہ وانا الیہ راجعون۔میں نے دوفرشتوں کو دیکھا۔ کہ وہ مجھے وصول کر رہے ہیں۔ اور مجھے کفن میں ڈال کر اوپر کی طرف لے جارہے ہیں۔ میں نے دائیں بائیں دیکھا۔ تو مجھے افق کے علاوہ کچھ نظر نہیں آیا۔ مجھے بلندی سے بلندی کی طرف لے جایا جا رہا تھا۔ ہم بادلوں کو چیرتے چلے گئے۔ جیسے کہ میں ایک جہاز میں بیٹھا ہوں۔ یہاں تک کہ پوری زمین مجھے ایک گیند کی طرح نظرآرہی تھی۔ میں نے اْن دو فرشتوں سے پوچھا کیا اللہ مجھے جنت میں داخل کرے گا؟ انہوں نے کہا اس کا علم اللہ تعالیٰ کی ذات کو ہے۔ ہمیں صرف تمہاری رْوح لینے کی ذمہ داری سونپی گئی ہے اور ہم صرف مسلمانوں پر مامْور ہیں۔ ہمارے قریب سے کچھ اور فرشتے گزرگئے جن کے پاس ایک رْوح تھی۔ اور اْس سے ایسی خوشبو آرہی تھی۔ کہ میں نے اپنی زندگی میں اتنی زبردست خوشبو کبھی نہیں سونگھی تھی۔ میں نے حیرانگی کے عالم میں فرشتوں سے پوچھا کہ یہ کون ہے۔ اگر مجھے معلوم نہ ہوتا کہ اللہ کے رسْول ﷺ دنیا سے رحلت کر گئے ہیں تو میں کہتا کہ یہ اْن کی رْوح ہو گی۔ انہوں نے کہا کہ یہ ایک فلسطینی کی رْوح ہے جسے یہودیوں نے تھوڑی دیر پہلے قتل کیاجبکہ وہ اپنے دین اور وطن کی مدافعت کررہا تھا۔میں نے کہا کاش میں شہید ہو کر مرتا۔اْس کے بعد کچھ اور فرشتے ہمارے قریب سے گزرے اور اْن کے پاس ایک رْوح تھی جس سے سخت بدبو آرہی تھی میں نے پوچھا کہ کون ہے؟ اْنہوں نے کہا یہ بتوں اور گائے کو پوجنے والا ایک ہندو ہے جسے تھوڑی دیر پہلے اللہ تعالیٰ نے اپنے عذاب سے ہلاک کردیا۔ میں نے شکر کیا کہ شکر ہے میں کم ازکم مسلمان مرا ہوں۔ میں نے کہا میں نے آخرت کے سفر کے حوالے سے بہت پڑھا ہے لیکن یہ جو کچھ ہورہا ہے میں نے کبھی اس کا تصور نہیں کیا۔ انہوں نے کہا شکر کرو مسلمان مرے ہو۔ لیکن ابھی تمہارے سامنے سفر بہت لمبا ہے اور بے شمار مراحل ہیں۔اْس کے بعد ہم فرشتوں کے ایک بہت بڑے گروہ کے پاس سے گزرگئے۔ اور ہم نے انہیں سلام کیا۔ اْنہوں نے پوچھا یہ کون ہے؟میرے ساتھ والے دوفرشتوں نے جواب دیا، کہ یہ ایک مسلمان ہے جو تھوڑی دیر پہلے حادثے کا شکارہو گیا۔ اور اللہ نے ہمیں اس کی رْوح قبض کرنے کا حکم دیا۔ اْنہوں نے کہا مسلمانوں کے لیے بشارت ہے کیونکہ یہ اچھے لوگ ہیں۔ میں نے فرشتوں سے پوچھا یہ کون لوگ ہیں اْنہوں نے کہا یہ وہ فرشتے ہیں جو آسمان کی حفاظت کرتے ہیں اور یہاں سے شیطانوں پر شہاب پھینکتے رہتے ہیں۔ میں نے کہا یہ تو اللہ تعالیٰ کی بہت عظیم مخلوق ہے۔ اْنہوں نے کہا ان سے بھی زیادہ عظیم فرشتے ہیں۔ میں نے پوچھا کون ہیں؟ وہ بولے جبرائیل اور عرش کو اٹھانے والے فرشتے اور یہ سب مخلوق ایسی ہے کہ اللہ تعالیٰ کے حکم کی سرتابی نہیں کیا کرتے۔
لا یعصون اللہ ما امرھم و یفعلون ما یومرون۔ التحریم(وہ اللہ کے دیے ہوئے کسی حکم کی نافرمانی نہیں کرتے اور جو حکم دیا جاتا ہے اسے بجا لاتے ہیں)۔
اْ سکے بعد ہم مزید اوپر چڑھتے گئے یہاں تک کہ آسمان دْنیا پر پہنچ گئے۔ میں اْس وقت ایک خوف اور کرب کے عالم میں تھا کہ نہ معلوم آگے کیا ہوگا۔میں نے آسمان کو بہت بڑا پایا اور اس کے اندر دروازے تھے جوبند تھے اور اْن دروازوں پر فرشتے تھے۔ جن کے جسم بہت بڑے تھے۔ دو فرشتوں نے کہا۔ السلام علیکم ورحمۃاللہ اور اْن کے ساتھ میں نے بھی یہی الفاظ دہرائے۔ دوسرے فرشتوں نے جواباًکہا وعلیکم السلام ورحمۃ اللہ وبرکاتہ۔ اور انہوں نے کہا۔ رحمت کے فرشتوں اھلاً وسھلًا ضرور یہ مسلمان ہی ہو گا۔ میرے ساتھ والے فرشتے نے کہا ہاں یہ مسلمان ہے۔ اْنہوں نے کہا تم اندر آسکتے ہو کیونکہ آسمان کے دروازے صرف مسلمانوں کے لیے کھلتے ہیں۔ کافروں کے بارے میں اللہ تعالیٰ کا حکم ہے۔ (لا تفتح لھم ابواب السمائ) کافروں کے لیے آسمان کے دروازے نہیں کھلیں گے۔
ہم اندر آگئے تو بہت ساری عجیب چیزیں دیکھیں۔ پھر ہم آگے بڑھے اور اوپر چڑھنا شروع کیا۔ یہاں تک کہ دوسرے تیسرے چوتھے پانچویں چھٹے اوربالآخر ساتویں آسمان پر جا پہنچے۔ یہ آسمان باقی تمام آسمانوں سے بڑا نظر آیا جیسے ایک بہت بڑا سمندر۔ فرشتے کہہ رہے تھے: اللھم انت السلام و منک السلام تبارکت یا ذوالجلال والاکرام
مجھ پرایک بہت بڑی ہیبت طاری ہوئی۔ سر نیچے کیا اور آنسو جاری ہوئے۔ اللہ تعالیٰ نے میرے بارے میں حکم صادرفرمایا۔ کہ میرے اس بندے کا عمل نام علیین میں لکھدو۔ اور اْسے زمین کی طرف واپس لے جاؤ کیونکہ میں نے انہیں زمین سے پیدا کیا اسی میں ان کی واپسی ہو گی۔ اور ایک بارپھر اسی زمین سے انہیں اٹھاؤنگا۔ شدیدرْعب۔ ہیبت اور خوشی کے ملے جلے جذبات میں ، میں نے کہا۔ پروردگار تو پاک ہے۔ لیکن ہم نے تیری وہ بندگی نہیں کی۔ جو ہونی چاہیے تھی۔ سبحانک ما عبدناک حق عبادتک
فرشتے مجھے لے کر واپس زمین کی طرف روانہ ہوئے۔ اور جہاں جہاں سے گزرتے گئے دوسرے فرشتوں کوسلام کرتے گئے۔ میں نے راستے میں اْن سے پوچھا۔ کیا میں اپنے جسم اور گھروالوں کے متعلق جان سکتا ہوں؟اْنہوں نے کہا اپنے جسم کو عنقریب تم دیکھ لوگے۔ لیکن جہاں تک تمہارے گھر والوں کا تعلق ہے۔ اْن کی نیکیاں آپ کو پہنچتی رہیں گی۔ لیکن تم اْنہیں دیکھ نہیں سکتے۔اْس کے بعد وہ مجھے زمین پر لے آئے۔ اور کہا اب تم اپنے جسم کے ساتھ رہو۔ ہمارا کام ختم ہو گیا۔
اب قبر میں تمہارے پاس دوسرے فرشتے آئیں گے، میں نے کہا۔ اللہ تعالیٰ آپکو جزائے خیر دے۔ کیا میں پھر کبھی آپکو دیکھ سکوں گا؟ اْنہوں نے کہا قیامت کے دن۔ اور اس کے ساتھ اْن پر ہیبت طاری ہوئی۔ پھر اْنہوں نے کہا۔ اگر تم اہل جنت میں سے نکلے تو ہم ساتھ ساتھ ہوں گے۔ ان شاء اللہ ۔میں نے پوچھا جو کچھ میں نے دیکھا۔ اور سْنا۔ کیا اس کے بعد بھی میرے جنت جانے میں کوئی شک رہ گیا ہے؟ اْنہوں نے کہا۔ تمہارے جنت جانے کے بارے میں اللہ ہی بہتر جانتا ہے۔تمہیں جو عزت و اکرام ملا وہ اسلئے کہ تم مسلمان مرے ہو لیکن تمہیں اعمال کی پیشی اور میزان سے ضرور سابقہ پیش آنا ہے۔مجھے اپنے گناہ یاد آئے اورکہا کہ زور زور سے روؤں۔انہوں نے کہا اپنے رب سے نیک گمان کرو۔ کیونکہ وہ کسی پر ظلم ہر گز نہیں کرتا۔ اس کے بعد انہوں نے سلام کیا۔ اور بڑی تیزی سے اوپر کی طرف اْٹھ گئے۔
میں نے اپنے جسم پر نظر دوڑائی میری آنکھیں بند تھیں۔ اور میرے اردگرد میرے بھائی اور والد صاحب رو رہے تھے۔ اْس کے بعد میرے جسم پر پانی ڈالا گیا تو مجھے پتہ چلا کہ مجھے غسل دیا جا رہا ہے۔ اْن کے رونے سے مجھے تکلیف ملتی تھی۔ اور جب میرے والددْعا کرتے کہ اللہ تعالیٰ تم پر رحم فرمائے تو اْن کی یہ بات مجھے راحت پہنچاتی تھی۔اْس کے بعد میرے جسم کو سفید کفن پہنچایا گیا۔میں نے اپنے دل میں کہا۔ افسوس میں اپنے جسم کو اللہ کی راہ میں ختم کرتا کاش میں شہید مرتا۔ افسوس میں ایک گھڑی بھی اللہ کے ذکر یا نماز یا عباد ت کے بغیر نہ گزارتا، کاش میں شب و روز اللہ کی راہ میں مال خرچ کرتا۔ افسوس ھائے افسوس۔ اتنے میں لوگوں نے میرا جسم اٹھایا۔ میں اپنے جسم کو دیکھ رہا تھا لیکن نہ تو اس کے اندر جا سکتا تھا اور نہ دور ہو سکتا تھا۔ ایک عجیب سی صورتحال سے دوچار تھا۔مجھے جب اْٹھایا گیا تو جو چیز میرے لئے اْس وقت تکلیف دہ تھی وہ میرے گھر والوں کا رونا تھا۔ میرا دل چاہ رہا تھا میں اپنے ابا سے کہدوں ابا جان پلیز رونا بند کردیں بلکہ میرے لئے دْعا کریں کیونکہ آپ کا رونا مجھے تکلیف دے رہا ہے۔ میرے رشتے داروں میںسے اْس وقت جو کوئی میرے لئے دْعا کرتا تو اْس سے مجھے راحت مل جاتی تھی۔مجھے مسجد پہنچایا گیا۔ اور وہاں اْتارا گیا اور میں نے سْنا کہ لوگ نماز پڑھنے لگے ہیں مجھے شدید خواہش ہوئی کہ میں بھی اْن کے ساتھ نماز میں شریک ہو جاؤں۔ میں نے سوچا کتنے خوش قسمت ہیں یہ لوگ کہ نیکیاں کمارہے ہیں جبکہ میرا عمل نامہ بند ہوگیا ہے۔نماز ختم ہوئی تو موذن نے اعلان کیا (الصلوٰۃ علی الرجل یرحمکم اللہ ) امام میرے قریب آیا اور نماز جنازہ شروع کی۔ میں حیران ہوا کہ وہاں بہت سارے فرشتے آگئے جو ایک دوسرے سے باتیں کر رہے تھے کہ نماز پڑھنے والے کتنے لوگ ہیں؟ اور ان میں کتنے موحد ہیں جو اللہ کے ساتھ شرک نہیں کرتے؟چوتھی تکبیر میں ، میں نے دیکھا کہ فرشتے کچھ لکھ رہے ہیں مجھے اندازہ کہ وہ لوگوں کی دْعائیں لکھ رہے ہوں گے۔اْس وقت میرے دل میں خواہش پیدا ہوئی کہ امام اس رکعت کو مزید لمبی کردے۔ کیونکہ لوگوں کی دْعاؤں سے مجھے عجیب سی راحت اور سرور مل رہا تھا۔ نماز ختم ہوئی اور مجھے اْٹھا کر قبرستان کی طرف لے گئے ۔راستہ میں کچھ لوگ دْعائیں مانگ رہے تھے اور کچھ رو رہے تھے اور میں حیران و پریشان تھا کہ نہ معلوم میرے ساتھ کیا ہونے والا ہے۔ مجھے اپنے تمام گناہ اور غلطیا ں اور ظْلم اور جو غفلت کی گھڑیاںجو میں نے دْنیا میں گزاری تھیں ایک ایک چیز سامنے آرہی تھی۔ ایک شدید ہیبت کا عالم تھا جس میں گزررہا تھا۔الغرض قبرستان پہنچا کر مجھے اْتارا گیا۔ اْس وقت مختلف قسم کی آوازیں سننے میں آئیں کوئی کہہ رہا ہے۔ جنازے کو راستہ دیدو۔ کوئی کہہ رہا ہے اس طرف سے لے جاؤ۔ کوئی کہتا ہے قبر کے قریب رکھ دو۔ یا اللہ میں نے کبھی اپنے بارے میںایسی باتیں نہیں سوچی تھیں۔ مجھے قبر میں رْوح اور جسم کے ساتھ اْتارا گیا۔ لیکن اْنہیں صرف میرا جسم نظر آرہا تھا۔ رْوح نہیں نظر آرہی تھی۔اْسکے بعد لحد کو بند کرنا شروع کر دیا۔ میرا دل چاہا کہ چیخ چیخ کے کہدوں، کہ مجھے یہاں نہ چھوڑیں پتہ نہیں میرے ساتھ کیا ہو گا لیکن میں بول نہیں سکتا تھا۔الغرض مٹی ڈالنی شروع ہوئی اور قبر میں گھپ اندھیرا چھا گیا۔ لوگوں کی آوازیں بند ہوتی چلی گئیںلیکن میں اْ ن کے قدموں کی آوازیں سْن رہا تھا۔ اْ ن میں سے جو کوئی میرے لئے دْعا کرتا تو اْس سے مجھے سکون مل جاتا تھا۔اچانک قبر مجھ پر تنگ ہوگئی اور ایسا لگا کہ میرے پورے جسم کو کچل دے گی اور قریب تھا کہ میں ایک چیخ نکال دوں لیکن پھر دوبارہ اصلی حالت پر آگئی۔اْس کے بعد میں نے ایک طرف دیکھنے کی کوشش کی کہ اچانک دو ہیبت ناک قسم کے فرشتے نمودار ہوئے جن کے بڑے بڑے جسم، کالے رنگ، اور نیلی آنکھیں تھیں۔ اْن کی آنکھوں میں بجلی جیسی چمک تھی۔ اور اْن میں سے ایک کے ہاتھ میں گرز تھا اگر اْس سے پہاڑ کو مارے تو اْسے ریزہ ریزہ کر دے۔اْ ن میں سے ایک نے مجھے کہا بیٹھ جاؤ تومیں فوراً بیٹھ گیا۔ پھر اْس نے کہا (من ربک ) تمھار رب کون ہے۔ جس کے ہاتھ میں گرز تھا وہ مجھے بغور دیکھ رہا تھا۔ میں نے جلدی سے کہا۔ (ربی اللہ ) میرا رب اللہ ہے۔ جواب دیتے وقت مجھ پر کپکپی طاری تھی۔ اس لئے نہیں کہ مجھے جواب میں کوئی شک تھا بلکہ اْ ن کے رْعب کی وجہ سے۔ پھر اْس نے مزید دو سوال کئے کہہ تمھارا نبی کون ہے اور تمھارا دین کونسا ہے اور الحمدللہ میں نے ٹھیک جوابات دیدئیے۔اْنہوں نے کہا۔ اب تم قبر کے عذاب سے بچ گئے میں نے پوچھا کیا تم منکر و نکیر ہو؟اْنہوں نے جواباً کہا ہاں۔ اور بولے کہ اگر تم صحیح جوابات نہ دیتے تو ہم تمہیں اس گرز سے مارتے اور تم اتنی چیخیں نکالتے کہ اْ سے زمین کی ساری مخلوق سْن لیتی۔ سوائے انسانوں اور جنوں کے۔ اور اگر جن و انس اْسے سن لیں تو بے ہوش ہوجائیں۔ میں نے کہا اللہ کا شکر ہے کہ اْس نے مجھے اس مصیبت سے بچا لیا۔ اْسکے بعد وہ چلے گئے اور اْن کے جانے سے مجھے قدرے اطمینان حاصل ہوا۔
اْ ن کے چلے جانے کے ساتھ ہی مجھے سخت گرمی محسوس ہوئی اور مجھے لگا کہ میرا جسم جلنے والا ہے جیسے کہ جہنم سے کوئی کھڑکی کھولی گئی ہو۔ اتنے میں دواور فرشتے نمودار ہوئے اور کہا السلام علیکم ورحمۃ اللہ وبرکاتہ میں نے جواب دیا وعلیکم السلام ورحمۃ اللہ وبرکاتہ۔ اْنہوں نے کہا ہم فرشتے ہیںہم قبر میں تمہارے اعمال تمہیں پیش کرنے آئے ہیں تاکہ قبر میں قیامت تک تمہیں اپنی نیکیوں کا جو بدلہ ملنا چاہیے وہ بدلہ مل جائے۔ میں نے کہا اللہ کی قسم جس سختی اور اذیت سے میں دوچار ہوں۔ میں نے کبھی اس کے متعلق سوچا نہیں تھا۔پھر میں نے پوچھا۔ کیا میں ایک سوال کر سکتا ہوں؟ اْنہوں نے کہا۔ کرلو میں نے پوچھا کیا میں اہل جنت میں سے ہوں۔ اور کیا اتنی ساری تکلیفیں جھیلنے کے بعد بھی میرے لئے جہنم جانے کا خطرہ ہے؟اْنہوں نے کہا تم ایک مسلمان ہو۔ اللہ اور اْس کے رسول صلی اللہ علیہ وآلہ وسلم پر ایمان لائے ہو۔ لیکن جنت جانے کا علم ایک اللہ کے علاوہ کسی کونہیں ہے۔ بہرحال اگر تم جہنم چلے بھی گئے تو وہاں ہمیشہ نہی رہوگے۔ کیونکہ تم موحد ہو۔
یہ سن کر میری آنکھوں سے آنسو جاری ہوگئے اور میں نے کہا اگر اللہ نے مجھے دوزخ بھیج دیا تو پتہ نہیں میں وہاں کتنا عرصہ رہوں گا؟اْنہوں نے کہا۔ اللہ تعالیٰ سے اْمید رکھو کیونکہ وہ بہت کریم ہے۔ اور اب ہم تمہارے اعمال پیش کر رہے ہیں۔ تمہارے بلوغت سے وقت سے تمہارے ایکسیڈنٹ کے وقت تک۔اْنہوں نے کہا۔ سب سے پہلے ہم نماز سے شروع کرتے ہیں کیونکہ کافر اور مسلمان کے مابین فرق کرنے والی چیز نماز ہے۔ لیکن فی الحال تمہارے سارے اعمال مْعلق ہیں۔میں نے حیرانگی سے پوچھا۔ میں نے اپنی زندگی میں بہت سارے نیک اعمال کئے ہیں۔ آخر میرے اعمال مْعلق کیوں ہیں؟ اور اس وقت جو میں اپنے جسم میں دْنیا جہاں کی گرمی محسوس کررہا ہوں۔ اس کی کیا وجہ ہے؟اْنہوں نے کہا۔ اس کی وجہ یہ ہے۔ کہ تمہارے اْوپر قرض ہے جو تم نے مرنے سے پہلے ادا نہیں کیاہے۔میں روپڑا۔ اور میں نے کہا۔ کیسے ؟ اور یہ جو میرے اعمال مْعلق ہیں کیا اس کی وجہ بھی یہی ہے؟میرا سوال ابھی پورا نہیں ہوا تھاکہ میری قبرمیں اچانک روشنی آگئی اور ایک ایسی خوشبو پھیل گئی کہ ایسی خوشبو نہ میں نے اپنی زندگی میں کبھی سونگھی اور نہ مرنے کے بعد۔اْس روشنی سے آواز آئی السلام علیکم ورحمۃ اللہ وبرکاتہ میں نے کہا وعلیکم السلام ورحمۃ اللہ وبرکاتہ میں نے پوچھا تم کون ہو؟اْس نے کہا میں سورۃ المْلک ہوںمیں اس لئے آئی ہوں کہ اللہ سے تیرے لئے مدد طلب کردوںکیونکہ تم نے میری حفاظت کی تھی۔ اور تمہارے رسول صلی اللہ علیہ وآلہ وسلم نے تمہیں بتا دیا تھاکہ جو کوئی سورۃ المْلک پڑھے گاقبر میں وہ اْس کے لئے نجات کا ذریعہ ہوگی۔میں بہت خوش ہوا۔ میں نے کہا میں نے بچپن میں تمہیں حفظ کرلیا تھا۔ اور میں ہمیشہ نماز میں اور گھر میں تیری تلاوت کیا کرتا تھا۔ مجھے اِس وقت تمہاری اشد ضرورت ہے۔اْ س نے کہا اس لئے تو میں آئی ہوں کہ اللہ تعالیٰ سے دْعا کر لوں کہ وہ تمہاری تکلیف کو آسانی میں تبدیل کر دے لیکن تم سے ایک غلطی ہوئی ہے۔ کہ تم نے لوگوں کے قرضے ادا نہیں کئے ہیں۔ میں نے کہا نجات کا کوئی طریقہ ہے؟اْس نے کہا تین باتوں میں سے کوئی ایک تمہارا مسئلہ حل کر سکتا ہے۔میں نے جلدی سے کہا۔ وہ کونسے کام ہیں؟اْس نے کہا۔ پہلے یہ بتادوکہ تم نے کوئی کاغذ لکھ کر چھوڑا ہے۔جسے دیکھ کر تمہارے ورثا وہ قرضہ ادا کر دیں؟ورثا کا نام سْن کر میرے آنسو نکل آئے۔مجھے تمام گھروالے امی ، ابو، بیوی، بہن، بھائی اور بچے یاد آئے۔ پتہ نہیں میرے بعد اْن کا کیا حال ہوگا؟ میری چھوٹی بچی جس کے ساتھ میں نے چاکلیٹ کا وعدہ کیا تھا۔ اب کون اسکے لئے چاکلیٹ لے کر دے گا؟میری بیوی کو لوگ بیوہ کہیں گے۔ کون ان کا خیال رکھے گا؟
سورۃ المْلک نے پوچھا لگ رہا ہے تم کوئی چیز یاد کر رہے ہو؟میں نے کہا مجھے اپنے اہل و عیال اور بچے یاد آئے کہ میرے بعد اْن کا کیا حال ہوگا۔سورۃ المْلک نے کہا۔ جس نے اْنہیں پیدا کیا ہے وہی روزی بھی دے گا اور وہی نگہبان بھی ہے۔سورۃ المْلک کی اس بات سے مجھے کافی تسلی حاصل ہوئی۔اْ سکے بعد میں نے پوچھا۔ کیا میں جان سکتا ہوں کہ میرے اوپر ٹوٹل کتناقرضہ ہے؟سورۃ المْلک نے کہا۔ کہ میں نے فرشتے سے پوچھا تواْ س نے بتایا کہ ایک ہزار سات سو ریال۔ 1000 آپ کے دوست کے ہیں جس کا نام ابوحسن ہے۔ اور باقی مختلف لوگوں کے ہیں۔میں نے کہا مختلف لوگ کون ہیں؟
اْ س نے کہا دراصل بلوغت سے لیکر آخری دن تک تم سے کئی بار اس بارے میں کوتاہی ہوئی ہے اس طرح قرضہ بڑھ گیا ہے۔ مثلاَپانچ ریال اْس دکاندار کے ہیں جس سے آپ نے کوئی چیز خریدی تھی جبکہ آپکی عمر 15 سال تھی۔ آپ نے اْس سے کہا پیسے کل دیدوں گا۔ اور پھر آپ نے نہیں دئیے۔ اس طرح لانڈری والے سے آپ نے کپڑے دْھلوائے اور اْس کو ادائیگی کرنا بھول گئے ، کرتے کرتے اْس نے سارے لوگوں کے نام بتا دئیے اور سارے مجھے یاد آئے۔سورۃ المْلک نے کہا۔ کہ لوگوں کے حقوق کو معمولی سمجھنے اور اْ ن سے تساہل برتنے کی وجہ سے بہت سارے لوگوں پر قبر میں عذاب ہوتا ہے۔کیا تمہیں اپنے رسول صلی اللہ علیہ وآلہ وسلم نے خبر نہیں دی تھی۔ کہ شہید کے اعمال بھی روک لئے جائیں گے جب تک اْ س کا قرض ادا نہیں ہوا ہو۔
میں نے کہا نجات کا کوئی طریقہ ہو سکتا ہے؟
اْ س نے کہا پہلا حل تو یہ ہے جس کا قرض ہے وہ اپنا قرض معاف کر دے۔میں نے کہا اْن میں سے اکثر تو ان قرضوں کو بھول گئے ہیںجس طرح میں بھول گیا تھا۔ اور اْن کو میرے مرنے کی خبر بھی نہیں ہو گی۔
اْس نے کہا پھر دوسرا حل یہ ہے کہ تمہارے ورثا تمہاری طرف سے ادائیگی کر دیں۔ میں نے کہا۔ اْ ن کو میرے قرضوں کی اور میری تکلیف کی کہاں خبر ہے؟ جب کہ میں نے کوئی وصیت نام بھی نہیں چھوڑا۔ کیونکہ مجھے موت اچانک آگئی۔ اور مجھے ان ساری مشکلات کا علم نہیں تھا۔سورۃ المْلک نے کہا کہ ایک اور حل ہو سکتا ہے۔ لیکن میں تھوڑی دیر بعد تمہیں بتا دوں گی۔ اور اب میں جاتی ہوں۔ میں نے کہا خدارا مت جائیے۔ کیونکہ تمہارے جانے سے تاریکی ہو جائے گی۔ جو میری موجودہ تکلیف میں اضافے کا باعث ہوبنے گی۔سورۃ المْلک نے کہامیں زیادہ دیر کے لئے نہیں جارہی بلکہ تمہارے لئے کوئی حل نکالنے کے لئے جارہی ہوں۔ اْ س کے بعد سورۃ المْلک چلی گئی اور میں گھپ اندھیرے میں اکیلا رہ گیا۔ ہیبت اور تکلیف کے باوجود میں نے کہا۔ یا ارحم الراحمین۔ اے اجنبیوں کے مولیٰ اور اے ہر اکیلے کے ساتھی۔ اس قبر کی تاریکی میں میری مدد کر۔ لیکن فوراً مجھے خیال آیا کہ میں تو دارالحساب میں ہوں۔ اب دْعاؤں کا کیا فائدہ۔زیادہ دیر نہیں گزری تھی۔ کہ میں نے ایک مانوس آواز سْن لی۔ میں نے آواز پہچان لی۔ یہ میرے والدبزرگوار کی آوازتھی جو کہہ رہے تھے۔ السلام علیکم ورحمۃ اللہ وبرکاتہ میں نے کہا وعلیکم السلام ورحمۃ اللہ وبرکاتہ لیکن میرا جواب انہیں کون پہنچائے۔ پھر اْنہوں نے کہا۔ (اللھم اغفرلہ اللہم ارحمہ اللھم وسع مْدخلہ اللھم آنس وحشتہ) پھر انہوں نے روتے ہوئے کہا۔ اے اللہ میں اس بیٹے سے راضی ہوں۔ تو بھی اس سے راضی ہوجا۔میرے والد صاحب جب دْعامانگ رہے تھے۔ تو دْعا کے دوران ایک زبردست روشنی میری قبرمیں آئی یہ دراصل رحمت کا فرشتہ تھا جومیرے والد کی دْعا کو نوٹ کر رہا تھا۔ اور جب تک میرے والد نہیں گئے تھے میرے ساتھ رہا۔میرے والد صاحب جب واپس ہوئے تو فرشتے نے کہا کہ تیرے والد کی دْعا آسمانوں تک جائے گی۔ اوران شااللہ ، اللہ تعالیٰ اس کو قبول کرے گا۔ کیونکہ والد کی دْعا اپنے بیٹے کے لیے مستجاب ہوتی ہے۔میں نے تمنا کی کہ کاش میرے والد میری قبر پر زیادہ دیر کے لئے ٹھہرتے اور دْعا مزید لمبی کرتے کیونکہ اْن کی دعا کی وجہ سے مجھے کافی آرام ملا۔ میں نے فرشتے سے پوچھاکیا میں ایک سوال کر سکتاہوں۔کہا پوچھو۔میں نے کہاجب سے میں مراہوں اب تک کتنا عرصہ گزرگیا؟اْ س نے کہا۔ جب سے تمہاری وفات ہوئی۔ آج تیسرا دن ہے۔ اور اس وقت ظہر کا وقت ہے۔ میں نے حیرانگی سے کہا تین دن اور اتنے سارے معاملات اور واقعات؟ اور یہ قبر کی تاریکی جبکہ باہر دْنیا روشن ہے؟فرشتے نے کہا۔ تمہارے سامنے بہت لمبا سفر ہے۔ اللہ اسے تمہارے لئے آسان کر دے۔
میں اپنے آپ کو قابو نہ کر سکا اور رونے لگا۔ اور ایسا رویا کہ مجھے یاد نہیں پڑتا کہ میں کبھی زندگی میں اتنا رویا ہوں۔ میں نے دل میں سوچا کہ اتنا خطرناک سفر اور دْنیا میں میری اِس قدر اس سفر کے لیے غفلت!فرشتے نے جاتے وقت بتا دیا کہ قبر میں موجودہ روشنی تیرے والد کی دْعا کی وجہ سے ہے۔ اور یہ اسی طرح رہے گی۔ جب تک اللہ چاہے۔ مجھے پتہ چلا کہ والد کا آنا میرے لئے باعث رحمت ہے۔میں نے تمنا کی کہ کاش میرے ابو میری آواز سْن لیں۔ اور میں اْنہیں بتادوں۔ ابو میرے قرضوں کی ادائیگی کر دیں۔ اور میری طرف سے صدقہ کر دیں۔ اللہ کے واسطے! میرے لئے دْعا کریںلیکن کون ہے جو اْنہیں بتا دے۔
میں نے محسوس کیا کہ بعض اوقات میرے جسم کی گرمی کم ہو جاتی تھی لیکن اچانک پھر سے بڑھ جاتی تھی میں نے اندازہ لگایا۔ کہ اس کا تعلق میرے حق میں لوگوں کی دْعائیں ہیں۔اچانک میری قبر میں پھر وہی روشنی آئی جو اس سے پہلے میں دیکھ چکا تھا۔ یعنی سورۃ المْلک کی۔سورۃ المْلک نے کہا تمہارے لئے دو خوشخبریاں ہیں۔میں نے اشتیاق کے ساتھ فوراًکہا ، کیا ہیں؟ تمہارے دوست نے اللہ کی خاطر تمہارا قرضہ معاف کر دیاہے۔ میں نے اللہ تعالیٰ کا شکر ادا کیا اور مجھے پتہ تھا کہ میری گرمی کم ہوجانے کی وجہ شائد یہی تھی۔میں نے کہا دوسری بشارت کیا ہے؟اْس نے کہا میں نے اللہ سے بہت درخواستیں کیں لیکن انسانوں کے حقوق وہ معاف نہیں کرتا۔ البتہ اللہ نے ایک فرشتہ بھیج دیا جو تیرے رشتہ اروں میں سے کسی کو خواب میں آئے گا تاکہ وہ تمہارے قرضوں کے متعلق سمجھ جائیں۔پھر اس نے پوچھا: تمہارے خیال میں کون بہترہے۔ جس کو خواب میں فرشتہ کسی شکل میں آئے اور پھر وہ اْس کو سچا سمجھ کر قرض کی ادائیگی کرے۔میں نے اپنی امی کے بارے میں سوچا لیکن پھرسوچا، کہ اگر اْس نے مجھے خواب میں دیکھا تو رونا شروع کر دے گی اور خواب کی تعبیر نہیں سمجھ سکے گی۔ پھر میں نے تمام رشتہ د اروں کے متعلق سوچا اور جو بندہ مجھے بہتر لگا وہ میری بیوی تھی۔ کیونکہ وہ ہمیشہ خوابوں کو اہمیت دیا کرتی تھی۔ میں نے کہا میری بیوی اگر مجھے خواب میں دیکھ لے تو ہو سکتا ہے۔ وہ اْس کی تعبیر سمجھ جائے۔سورۃ المْلک نے کہا میں متعلقہ فرشتے کو اطلاع دیتی ہوں اور اللہ سے دْعا کرتی ہوں کہ وہ آپ کی مشکل کو آسان کر دے۔اس کے بعد سورۃ المْلک چلی گئی اور میری قبر میں بدستور وہ روشنی باقی تھی جو میرے والد کی دْعا کی برکت سے آئی تھی۔ اور میں انتظار کرتا رہا جیسے کہ جیل کے اندر ہوں۔ مجھے ٹائم کا کوئی اندازہ نہیں تھا کیونکہ یہاں گھڑی نہیں تھی۔ نہ نماز، نہ کھاناپینا، نہ اور کوئی مصروفیات۔ دْعائیں مانگنا اور ذکرو اذکار بھی بے کار۔ بعض اوقات لوگوں کے قدموں کی آوازیں سْن لیتا تو اندازہ کر لیتا کہ شائد کسی کا جنازہ ہے۔ بعض اوقات لوگوں کے ہنسنے کی آوازیں آجاتی تھیں تو مجھے تعجب ہوتا تھا۔ کہ ان کو اندازہ نہیں ہے کہ ہم کس صورت حال سے دوچار ہیں۔کافی وقت گزرنے کے بعد اچانک میرے جسم کی گرمی بڑھنی شروع ہوئی اور میں چیخنے لگا تھا۔ ایسا لگ رہا تھا جیسے میں ایک تندور کے اندرہوں۔ میرے خوف میں اضافہ ہوتا چلاجارہا تھا۔ لیکن پھر اچانک گرمی کم ہونی شروع ہوئی۔ یہاں تک کہ بالکل غائب ہو گئی۔ سمجھ میں نہیں آرہا تھا۔ کہ ایسا کیوں ہو جاتا ہے۔
اْ س کے بعد ایک بار پھر سورۃ المْلک کی روشنی آگئی۔ اور مجھے کہا تمہیں مبارک ہو۔ میں نے کہا وہ کیسے؟اْس نے کہا خوابوں کا فرشتہ تمہاری بیوی کو خواب میں گیا۔ اور تمہاری بیوی نے خواب میں تمہیں ایک سیڑھی پر چڑھتے دیکھا۔ اور دیکھا کہ سات سیڑھیاں باقی ہیں۔ اور تم پریشان کھڑے ہو کیونکہ آگے نہیں چڑھ سکتے۔ پھر وہ فجر کی نماز سے پہلے اْٹھی تمہاری یاد میں روئی۔ اور صبح ہوتے ہی ایک عورت سے رابطہ کیا۔ جو خوابوں کی تفسیر کرتی ہے۔ اور اْسے اپنا خواب سنایا۔ اْس عورت نے کہا ، اے بیٹی تمہاری شوہرقبر میں تکلیف میں مبتلا ہے۔ کیونکہ اْس پر کسی کا 1700ریال قرض ہے۔تیری بیوی نے پوچھا۔ کس کا قرض ہے۔ اور ہم کیسے ادا کریں؟اْ س نے کہا مجھے نہیں معلوم اس بارے میں علماء سے معلوم کرو۔پھر تیری بیوی نے ایک شیخ کی اہلیہ سے رابطہ کیا۔ اور اْسے ساری بات بتا دی تاکہ وہ شیخ سے جواب پوچھ لے۔ الغرض شیخ نے کہا کہ میت کی طرف سے صدقہ کر دے ہو سکتا ہے۔ اللہ تعالیٰ اْ سے قبول کر کے میت کا عذاب ہٹا دے۔ تیری بیوی کے پاس سونا تھا۔ جس کی قیمت 4000 ریال تھی۔ اْس نے وہ سونا تیرے والد کو دیااور تیرے والد نے اْس کے ساتھ کچھ رقم مزید لگا کر صدقہ کر دیا اور یوں تیر ا مسئلہ حل ہو گیا۔میں نے کہا الحمدللہ مجھے اس وقت کوئی تکلیف نہیں ہے۔ اور یہ سب کچھ اللہ تعالیٰ کے فضل اور تیرے تعاون سے ہوا۔سورۃ المْلک نے کہا اب اعمال والے فرشتے تمہارے پاس آجائیں گے۔میں نے پوچھا کیا اس کے بعد بھی میرے لئے کوئی خطرہ ہے؟اْس نے کہا سفر بہت لمبا ہے۔ ہو سکتا ہے۔ اس میں کئی سال لگ جائیں۔ لہذا ْس کے لئے تیاررہو۔کئی سال والے جواب نے میری پریشانی میں اضافہ کر دیا۔سورۃ المْلک نے کہا۔ بہت سارے لوگ صرف اس وجہ سے قبروں میں عذاب جھیل رہے ہیں کہ وہ بعض باتوں کو معمولی سمجھتے تھے۔ جبکہ اللہ کے نزدیک وہ معمولی نہیں ہیں۔میں نے کہا۔ مثلاً کون سے اعمال؟اْس نے کہا بہت سارے لوگوں پر قبرو ںمیں اسلئے عذاب ہے کہ وہ پیشاب سے نہیں بچتے تھے اور گندگی کی حالت میں اللہ کے سامنے کھڑے ہوتے تھے۔ اس طرح چغلی، چوری، سوداور مال یتیم کی وجہ سے بہت سارے لوگوں پر عذاب ہورہا ہے۔پھر اْس نے کہا کہ کچھ لوگوں پر عذاب قبر اس لئے ہے تاکہ قیامت آنے سے پہلے اْن کا کھاتہ صاف ہو جائے اور کچھ لوگوں پر قیامت تک عذاب رہے گا۔ اور پھر جہنم میں داخل کئے جائیں گے۔میں نے کہا۔ اللہ تعالیٰ کی سزا سے بچنے کی کوئی سبیل ہے؟سورۃ المْلک نے کہا کہ عمل تو تمہارا منقطع ہوچکا ہے۔ البتہ تین کام ایسے ہیںجو تمہیں اب بھی فائدہ پہنچاسکتے ہیں۔میں نے پوچھا وہ کیاہیں؟اْ س نے کہا۔ اہل وعیال کی دْعا اور نیک عمل۔ اس کے علاوہ کوئی کام اگر تم نے دْنیا میں کیا ہے جو انسانوں کے لئے نفع بخش ہو مثلاً مسجد کی تعمیر تو اْس سے تم مرنے کے بعد بھی مستفید ہو گا۔ اس طرح اگر علم کی نشرو اشاعت میں تم نے حصہ لیا ہو تو وہ اب بھی تمہارے لئے نفع بخش ہے۔میں نے کہا میں کتنا بدبخت ہوں کہ دنیا میں کتنے عمل کے مواقع تھے جس سے میں نے کوئی فائدہ نہیں اْٹھایا۔ اور آج بے یارومددگار قبر میں پڑاہوں۔میرا دل چاہا میں چیخ چیخ کر لوگوں کو پکارْوں کہ اے لوگوقبر کے لئے تیاری کر لو۔ خدا کی قسم اگر تم لوگوں نے وہ کچھ دیکھاجو میں نے دیکھا تو مسجدوں سے باہر نہیں نکلو گے،اور اللہ کی راہ میں سارا مال لگا دو گے۔سورۃ المْلک نے کہا مردہ لوگوں کی نیکیاں عام طور پر شروع کے دنوں میں بہت ہوتی ہیں لیکن اس کے بعد رفتہ رفتہ وہ کم ہوتی چلی جاتی ہیں۔میں نے پوچھا کیا یہ ممکن ہے۔ کہ میرے گھر والے اور میرے رشتے دار مجھے بھول جائیں گے۔ مجھے یقین نہیں آرہا ہے کہ وہ اتنی جلدی مجھے بھول جائیں گے۔اْ س نے کہا ضرور ایسا ہوگا۔ بلکہ تم دیکھوگے کہ شروع میں تمہاری قبر پر تمہارے اہل و عیال زیادہ آئیں گے۔ لیکن جب دن ہفتوں میں ہفتے مہینوں میں اور مہینے سالوں میں تبدیل ہوں گے تو تمہاری قبر پر آنے والا ایک بندہ بھی نہیں ہوگا۔مجھے یاد آیا کہ جب ہمارے دادا کا انتقال ہوا تھاتو ہم ہر ہفتے اْن کی قبر پر جایا کرتے تھے۔ پھر ہر مہینے میں ایک بار اور پھر ہم اْنہیں بھول گئے۔جب میں زندہ تھا تو مردوں کو بھول جاتا تھا۔ لیکن آج میں خود اْس حالت کو پہنچ چکا ہوں۔ دن ہفتے اور مہینے گزرتے گئے اور میری مدد کے لئے کوئی نہ تھا۔ سوائے چند اعمال کے جو مجھے پہنچتے تھے۔ یا میرے والد، بھائیوں اور دوسرے رشتے داروں کا میری قبر پر آنا جو رفتہ رفتہ کم ہوتا گیا۔ زیادہ تر مجھے اپنی والدہ کی دْعا پہنچتی رہی۔ جو وہ تہجد میں میرے لئے کرتی رہی۔ بخدا وہ دْعا میرے لئے طمانیت کا باعث ہوتی تھی۔نیک اعمال کا آنا کم ہوتاچلا گیا۔ نہ معلوم کیا وجہ تھی۔ کہ سورۃ المْلک کا آنا بھی بندہو گیا۔ میری قبر میں پھر اندھیرا چھا گیا۔ مجھے بعض گناہ یاد آئے جو میں نے کئے تھے۔ ایک ایک دن اور ایک ایک گھڑی یاد آرہی تھی۔ مجھے اپنے گناہ پہاڑ کے برابر لگ رہے تھے۔ اپنے آپ کو ملامت کررہا تھا۔ کتنے گناہ ہیں جو میں نے بڑی دلیری سے کئے تھے۔ کتنی نمازیں ہیں جو میری فوت ہو گئی تھیں۔ کتنی فجر کی نمازیں ہیں جو میں نے غفلت کی وجہ سے نہیں پڑھی تھیں۔یہ سارے گناہ یاد کر کے میں اتنا رویا کہ مجھے ٹائم کا چونکہ اندازہ نہیں تھا۔ اس لئے اگر میں کہدوں، کہ مہینوں رویا ہوگا تو مبالغہ نہیں ہو گا۔ایک دن اچانک ایسی روشنی آئی جیسے سورج نکل چکا ہو۔ اور میں نے فرشتوں کی آوازیں سنیں کہ وہ ایک دوسرے کو مبارکباد دے رہے ہیں۔ میری سمجھ میں نہیں آرہا تھا کہ کیا ہو چکا ہے کہ میرے پاس سورۃ المْلک آئی اور خوشخبری سْنا دی۔سورۃ المْلک نے بتایا کہ رمضان المبارک کا مہینہ شروع ہو گیا اور یہ رحمت اور
 معافی کا مہینہ ہے۔ اور اس میںبہت سارے مْردے مسلمانوں کی دْعاؤں کی برکت سے نجات پالیتے ہیں۔ میں بہت خوش ہوا۔ اللہ تعالیٰ انسانوں پر کتنا مہربان ہے۔ لیکن انسان ہے کہ گمراہی پر تْلاہوا ہے۔سورۃالمْلک نے بتایا۔ کہ اللہ تعالیٰ کسی کو آگ میں نہیں ڈالنا چاہتا لیکن یہ انسانوں کی اپنی حماقت ہوتی ہے کہ وہ ایسے گنا ہ کر جاتے ہیں جو اْن کی سزا کا موجب ہوتے ہیں۔پھر اْس نے کہا کہ اب تھوڑی دیر بعد مسلمان نماز پڑھیں گے اور تم اْن کی آوازیں سنوگے۔سورۃ المْلک چلی گئی اور میری قبر میں بدستور روشنی تھی۔ اور میں نے پہلی بار مسجد سے آنے والی آواز سْن لی۔ اپنی زندگی کو یاد کیا اور تراویح کو یاد کیا تو بہت رویا۔ میں نے سْنا کہ لوگ نماز پڑھ رہے ہیں۔ اور پھر میں نے امام کی دْعا سن لی کہ وہ پڑھ رہا تھا۔اللھم لا تدع لنا فی مقامنا ھذا ذنبا الا غفرتہ ولاھما الا فرجتہ ولا کربا الا نفستہ ولا مریضا الا شفیتہ ولا مبتلیئً الا عافیتہ ولا میتا الا رحمتہ برحمتک یا ارحم الراحمین۔
اس دْعا سے مجھے بہت سکون ملا۔ اور میں نے تمنا کی۔ کہ امام دْعا کو طول دیدے۔اور میں نے محسوس کیا ، کہ وہ دعا سیدھی قبول ہورہی ہے۔ کیونکہ مجھے اْس سے کافی خوشی اور راحت مل رہی تھی۔ میں روتا جا رہا تھا۔ اور ساتھ ساتھ آمین پڑھتا جارہا تھا۔اس طرح رمضان کا سارا مہینہ بہت سکون اور راحت سے گزرا۔اور پھر ایک دن میری قبرمیں انسان کی شکل میں ایک آدمی آیا۔ جس سے بہت تیز خوشبو آرہی تھی۔ میں حیران ہوا کیونکہ مرنے کے بعد یہ پہلا انسان تھا جو میں دیکھ رہا تھا۔ اْس نے مجھے سلام کیا اور میں نے جواب میں وعلیکم السلام کہا۔ اْس نے کہا میں تمہیں بشارت دیتا ہوں کہ اللہ تعالیٰ نے تمہارے گناہ معاف کئے ہیں۔میں نے کہا اللہ آپ کو جزائے خیر دے۔ آپ کون ہیں؟ میں پہلی دفعہ قبر میں انسان کی شکل دیکھ رہا ہوں۔ اْس نے کہا میں انسان نہیں ہوں۔ میں نے پوچھا تو کیا آپ فرشتے ہیں بولا نہیں میں دراصل تمہارا نیک عمل ہوں۔ تمہاری نمازیں، تمہارے روزے، حج، انفاق فی سبیل اللہ اور صلہ رحمی وغیرہ وغیرہ کو اللہ تعالیٰ نے اس شکل میں تمہارے پاس بھیجا ہے۔میں بہت خوش ہوا۔ اور اللہ کا شکر ادا کیا۔ میں نے پوچھا تم اتنے لیٹ کیوں آئے؟اْسنے کہا تمہارے گناہ اور تمہارے قرضے میری راہ میں رکاوٹ تھے۔ اور جب اللہ تعالیٰ نے معافی کا اعلان کردیا تو میرے لئے راستہ کھل گیا۔میں نے پوچھا تو کیا اس معافی کے بدلے میں اللہ تعالیٰ مجھے جنت دے گا؟اْس نے کہا یہ بات اللہ تعالیٰ کے علاوہ کوئی نہیں جانتا۔ پھر اْس نے کہا قیامت کے دن میزان سے تمہارے جنت اور دوزخ جانے کا پتہ چلے گا۔اْس کے بعد عمل صالح نے کہا کہ تمہارے کچھ نیک اعمال بالکل زندگی کی آخری گھڑیوں میں کام آگئے۔ میں نے پوچھا وہ کیا ہیں؟
اْس نے کہا اگر تمہیں یاد ہو تو مرتے وقت اللہ تعالیٰ نے تمہیں توفیق دی اور تم نے کلمہ تشہد پڑھا۔تمہیں اندازہ نہیں ہے کہ فرشتوں کو کتنی خوشی ہوئی کہ تمہاری زندگی کا خاتمہ توحید پر ہوا۔ جبکہ شیطان تمہیں نصرانیت اور یہودیت کی تلقین کررہا تھا۔اْس وقت تمہارے اردگرد دوقسم کے فرشتے موجود تھے۔ ایک وہ جو مسلمانوں کی روحیں قبض کرتے ہیں اور کچھ وہ جو کافروں کی روحیں قبض کرتے ہیں۔جب تم نے کلمہ پڑھا تو وہ فرشتے چلے گئے جو کافروں کی روحیں قبض کرتے ہیں اور پھر اْنہوں نے تمہاری رْوح قبض کر لی۔میں نے پوچھا۔ اس کے علاوہ بھی کوئی نیکی ہے؟اْ س نے کہا۔ ہاں جب تم نے ڈرائیور کو سگریٹ چھوڑنے کی نصیحت کی تو آج جو خوشبو تم سونگھ رہے ہواْس نصیحت کی بدولت ہے۔ اس کے علاوہ اپنی والدہ کو تمہاری کال اور اْس کے ساتھ جو بھی تم نے باتیں کیں اللہ تعالیٰ نے ہر بات کے بدلے تمہارے لئے نیکیاں لکھ دیں۔مجھے یاد آیا جو باتیں میں نے والدہ سے کی تھیں۔ مجھے پتا ہوتا تو میں اْن باتوں میں گھنٹہ لگا دیتا۔پھرعمل صالح نے بتایا کہ زندگی کے آخری وقت میں ایک گناہ بھی تمہارے کھاتے میں لکھا گیا۔ میں حیران ہوا۔ اور پوچھا وہ کیسے؟عمل صالح بولا۔ تم نے بچی سے کہا میں تھوڑی دیر میں آجاؤنگا۔ اس طرح تم نے اْسے جھوٹ بول دیا۔ کاش مرنے سے پہلے تم توبہ کر لیتے۔ میں رویا میں نے کہا اللہ کی قسم میراارادہ جھوٹ کا نہیں تھا۔ بلکہ میرا خیال یہ تھا کہ اس طرح وہ میرے آنے تک صبر کرلے گی۔اْس نے کہا جو بھی ہو۔ آدمی کو سچ بولنا چاہیے کیونکہ اللہ تعالیٰ سچے لوگوں کو پسند کرتا ہے۔ اور جھوٹ بولنے والوں کو
 ناپسند کرتا ہے۔ لیکن لوگ اس میں بہت تساہل اور غفلت کا مظاہرہ کرتے ہیں۔
پھر اْس نے کہا۔ تمہاری وہ بات بھی گناہ کے کھاتے میں لکھدی گئی ہے۔ جو تم نے ائیرپورٹ میں کاؤنٹر پر بیٹھے ہوئے شخص سے کہدی کہ اللہ تمہاراحساب کردے۔ اس طرح تم نے ایک مسلمان کا دل دْکھادیامیں حیران ہو گیا۔ کہ اتنی اتنی معمولی باتیں بھی ثواب اور گناہ کا باعث بنی ہیں۔
عمل صالح نے مزیدبتایا: کہ یہ انسانوں پر اللہ تعالیٰ کا بہت بڑا احسان ہے۔ کہ جب وہ ایک نیکی کریں۔ تو اللہ تعالیٰ اْسے 10گناہ بلکہ 700 گناہ بڑھا دیتا ہے۔اور بہترین اعمال وہ ہیں۔ جو اللہ تعالیٰ کو زیادہ محبوب ہیں۔میں نے کہا۔ پنج وقتہ نمازکے بارے میں کیا خیال ہے؟عمل صالح نے کہا۔ کہ نماز، زکوۃ، صیام، حج وغیرہ تو فرائض ہیں میں ان کے علاوہ بھی تمہیں ایسے اعمال بتادوں گا جو اللہ تعالیٰ کو بہت محبوب ہیں۔میں نے کہا۔ وہ کیا ہیں؟
بولا تمہاری عمر جب 20سال تھی۔ تم عمرے کے لئے رمضان کے مہینے میں گئے تھے۔تم نے وہاں 100 ریال کی افطاری خرید کر لوگوں میں بانٹ دی۔ اس کا بہت اجر تم نے کمایا ہے۔اس طرح ایک بار بوڑھی عورت کو کھانا کھلایا تھا وہ بوڑھی ایک نیک عورت تھی اْس نے تمہیں جو دْعائیں دی۔ اْس کے بدلے اللہ تعالیٰ نے تمہیں بہت نیکیاں اور اجردیا ہے۔میں تمہیں ایک اور بات بتادوں ایک بار تم مدینہ جارہے تھے۔ کہ راستے میں تمہیں ایک آدمی کھڑا ملا جس کی گاڑی خراب ہوئی تھی تم نے اْس کی جو مدد کی ، اللہ تعالیٰ کو تمہاری وہ نیکی بہت پسند آئی اور تمہیں اْس کا بہت بڑا اجرملا ہے۔
اْس کے بعد میری قبر کھل گئی۔اوراْس میں بہت زیادہ روشنی آگئی۔ اور فرشتوں کے گروہ درگروہ آتے ہوئے نظرآئے اور  عمل صالح بھی. ذرا سوچئے!یہ کہانی عبرت کے لئے لکھی گئی ہے۔ لیکن احادیث مبارکہ کے بیان کیمطابق ہے۔کیا اس کہانی کے سننے کے بعد بھی ہم آخرت کے لئے فکرمند نہیں ہوں گے؟ کیا اس کہانی کے بعد بھی ہم گناہ کریں گے؟
٭٭٭