یہ کس نے کہہ دیا تم سے
کہ اب کچھ بھی نہیں باقی
ابھی ہے حوصلہ زندہ
ابھی امید باقی ہے
کہ بے شک اس قیامت میں
بہت سے خواب ٹوٹے ہیں
مگر آنکھیں سلامت ہیں
بہت سے ساتھ چھوٹے ہیں
مگر سانسیں سلامت ہیں
تو آؤ فیصلہ کرلیں
کہ ان ویران آنکھوں میں
نئے کچھ خواب رکھ دیں گے
محبت کے حسیں جذبے سے دل پھر شادکر دیں گے
ہم اس تاریک شب سے پھر نئی صبحیں نکالیں گے
ہم اس ملبے کے نیچے سے حیاتِ نو نکالیں گے
نئے امکاں تراشیں گے
خدا کے فضل سے کچھ بھی تو نا ممکن نہیں ہے
کہ اب دشوارراہوں میں کوئی تنہا نہیں ہے
تو پھر کس نے کہا تم سے
کہ اب کچھ بھی نہیں باقی
ابھی ہے حوصلہ زندہ ، ابھی امید باقی ہے
