رات کی تاریکی میں مدینے کی ایک گلی میں دو دوست باتیں کرتے ہوئے جا رہے تھے۔ایک نے دوسرے سے کہا، عمرؓ نے خالدؓ کو معزول کر کے اچھا نہیں کیا۔ دوسرے نے کہا ،ہاں، میرا بھی یہی خیال ہے ۔انہیں معلوم نہ تھا کہ ان کے پیچھے عمرؓ بھی آرہے ہیں اورانہوں نے ان دونوں کی باتیں سن لی ہیں۔ حضرت عمرؓ نے اپنی آواز بدل کر کہا، تو پھر آپ کے خیال میں اب عمرؓ سے کیا سلوک کرناچاہیے؟ دونوں نے بلا کسی توقف کے کہا ، عمرؓ سے کیا سلوک کرنا؟ کیا مطلب؟ وہ امیر المومنین ہیں ، بات تو ہم انہی کی مانیں گے ، یہ توہماری ذاتی رائے ہے۔ اس پر عمرؓ آگے بڑھے ، اپنا تعارف کروایا اور ان سے کہا کہ میں اللہ کا شکر ادا کرتا ہوں کہ جس نے تم لوگوں جیسے ساتھی عطا کیے ۔ عمر ؓنے کہا جب تک تم جیسے لوگ موجود ہیں ، مسلمان شکست نہیں کھا سکتے ۔
سید نا عمرؓ نے حضرت خالدؓ بن ولید کو فوج کی سپہ سالاری سے عین اس وقت معزول کر دیا تھا جب کہ ان کی شہرت بام عروج پر تھی اور و ہ ہر معرکے میں کامیابی پہ کامیابی حاصل کیے جا رہے تھے ۔ عوام میں یہ خیال جڑ پکڑ رہا تھا کہ کامیابی خالد کی وجہ سے حاصل ہوتی ہے ۔اس خیال کے رد اور اس بات کو ثابت کرنے کے لیے کہ کامیابی صرف اللہ کی مدد سے حاصل ہوتی ہے، عمرؓ نے خالدؓ کو معزول کر دیا۔ عمرؓ کے اس اقدام پر عوا م میں اختلاف رائے پا یا گیا جس کے اظہار کی ایک صورت وہ گفتگو تھی جو اوپر نقل ہوئی ۔ سیدنا عمرؓ نے اس اختلاف رائے کی نہ صرف تحسین فرمائی بلکہ اللہ کا شکر بھی ادا کیا کیونکہ یہ اختلاف رائے کی وہ مثبت اور صحت مندصورت تھی جو معاشرے کو صحیح راہ پر گامزن رکھنے میں ایک اہم کردار ادا کرتی ہے۔
کسی نظام یا سسٹم سے وابستہ رہتے ہوئے اس سے اختلاف رکھنا، یا اختلاف رکھتے ہوئے بھی اس سے وابستہ رہنا اور اس کی ترقی میں اپنا کردا ر ادا کرتے رہنا ،ایک ایسی خوبصورت روایت ہے جو اسلامی معاشرے کا لازمی جزورہی ہے۔کسی بھی سسٹم سے اختلاف کی اجازت نہ دینا اصل میں اس کو الہامی ثابت کرنا ہے ۔یہ عمل جلد یا بدیر خودسسٹم کی تباہی کا باعث بن جاتا ہے۔جس معاشرے یا ادارے میں یہ بات رواج پا جائے وہاں کے افراد میں بد ترین قسم کی منافقت جنم لیتی ہے جو غیبت ، چغلی سے ہوتی ہوئی حسد ، کینے اور بغض تک جا پہنچتی ہے اور بالآخر سازشوں کوجنم دیتی ہے ،جس سے نہ صرف ان افراد کا نقصان ہوتا ہے بلکہ ادارے اور معاشرے بھی رو بہ زوال ہوجاتے ہیں۔ یہی وہ نقصان تھا جس سے اپنے معاشرے اور افرا د کو بچانے کے لیے اسلامی معاشرے کے بانی اور قائد سید ِدوعالم محمد ِعربیﷺ نے نہ صرف اختلاف رائے کی اجازت دی بلکہ اس کی حوصلہ افزائی بھی فرمائی۔ حضورﷺ نے ایک جماعت کو ایک مہم پر اس ہدایت کے ساتھ روانہ فرمایا کہ عصر کی نماز نہیں پڑھنی جب تک کہ تم فلاں مقام پر نہ پہنچ جاؤ۔ وہاں پہنچنے میں دیر ہوئی او رراستے ہی میں عصر کاوقت ہو گیا۔ اس موقع پر صحابہ کی اس جماعت میں اختلاف ہوا ۔ ایک گروپ نے کہا کہ چونکہ عصر کی نماز کا وقت ہو گیا ہے اس لیے ہمیں یہیں نماز ادا کر لینی چاہیے ۔ دوسرے گروپ نے کہا کہ حضورﷺ نے کہا تھا کہ عصر کی نماز نہیں پڑھنی اس لیے ہم تونہیں پڑھیں گے ۔ اور وہاں جا کر پڑھیں گے چاہے قضا ہی کیوں نہ ہو جائے ۔پہلے گروپ نے کہا کہ اصل میں حضور کی ہدایت کا مطلب یہ تھا کہ تم کوشش کر کے عصر تک وہاں پہنچ جاؤ ۔ اب چونکہ ہم لیٹ ہو گئے ہیں اس لیے ہمیں یہیں نماز ادا کر لینی چاہیے ۔ لیکن دوسرا گروپ نہ مانا۔ اس لیے جن کی رائے نماز ادا کر لینے کی ہوئی، انہوں نے وہاں نماز ادا کر لی جبکہ باقی صحابہ نے وہا ں جاکر قضا ادا کی۔ واپسی پر جب اختلاف رائے کا یہ معاملہ حضور کے سامنے پیش ہوا تو آپ نے دونوں کی تصویب فرمائی۔ معلوم ہو ا کہ اخلاص کے ساتھ کسی حکم کا منشا سمجھنے میں بھی اختلاف ہو سکتا ہے اور اس کی ادائیگی کے طریق کا رمیں بھی ۔ لوگ اگر سسٹم کے ساتھ مخلص ہیں تو ان کی عقل پر پہرے بٹھانے کے بجائے ان کی حوصلہ افزائی کرنا ہی نبوی طریقہ ہے ۔
جس معاشرے میں عقل پر پہرے بٹھانے کی کوشش کی جاتی ہے وہاں تعمیر کے بجائے تخریب جنم لیتی ہے کیونکہ عقل ایسی چیز ہے کہ جس کو پابند سلاسل نہیں کیا جا سکتا ۔ اس نے بہرحال اپنا راستہ ڈھونڈنا ہوتا ہے اگر مثبت راستے بند کر دئیے جائیں گے تو پھر یہ منفی راہیں تلاش کر لے گی۔ اس لیے جومعاشرے یا ادارے ترقی کے خواہاں ہوتے ہیں وہ ہمیشہ اختلاف رائے کی نہ صرف قدر کرتے ہیں بلکہ اس کو پروان چڑھانے کی سعی بھی کر تے رہتے ہیں۔
اسلامی معاشرے میں اللہ کے بعد صرف پیغمبر کی ذات ایسی ہوتی ہے جس کی غیر مشروط اطاعت کی جاتی ہے ۔ پیغمبر کے حکم کے منشا کے سمجھنے میں تو اختلاف ہو سکتا ہے لیکن اس کے حکم کی اطاعت میں کسی اختلاف کی گنجایش نہیں ہوتی۔عزت ، اطاعت او رمحبت کے حوالے سے پیغمبر کی ذات مسلم معاشرے میں ایک ایسا منفرد مقام رکھتی ہے کہ جس کا تقابل کسی بھی لیڈ ر سے نہیں کیا جا سکتا۔اس عالی مقام اور سٹیٹس کے باوجود پیغمبرﷺ نے نہ صرف لوگو ں سے رائے طلب کی بلکہ بعض مواقع پراپنی رائے کے بر خلاف ان کی رائے پر عمل بھی کیااور بعض تہذیبی اور نجی معاملات میں لوگوں کو یہ آزادی بھی دی کہ وہ چاہیں تو پیغمبر کے مشورے پر عمل کریں اور چاہیں تو نہ۔ ایک صحابیہ نے د رخواست کی کہ انہیں طلاق دلوا دی جائے جبکہ ان کے خاوند انہیں بے حد چاہتے تھے ۔ اس بنا پر حضورﷺ نے صحابیہ سے کہا کہ اگر تم طلاق نہ لو تو بہتر ہے۔ صحابیہ نے کہا کہ یہ آپ کا حکم ہے یا مشور ہ ہے ، آپﷺ نے فرمایا کہ مشورہ ہے ۔ چاہے تو عمل کرو او ر چاہے تو نہ ۔ اس پر صحابیہ نے کہا کہ پھر مجھے اس پر عمل سے معذور سمجھیے ۔ چنانچہ حضور نے طلاق دلوا دی اور اسی طرح کا معاملہ آپ نے تابیر نخل کے معاملے میں کیا اور لوگوں سے کہا کہ تم لوگ کھیتی کے معاملات بہتر سمجھتے ہو۔ تم چاہو تو اپنی رائے کے مطابق کرتے رہو۔ یہی وجہ تھی کہ اسلامی معاشرے میں یہ بات کبھی مسئلہ نہیں بنی تھی کہ حدود اور آداب کی رعایت کرتے ہوئے اولاد ، والدین سے اختلاف کر سکتی ہے یادلیل کی بنیاد پر شاگرد استاد سے اختلاف کر سکتا ہے یا مرید پیر سے اوررعایا حاکم سے اختلاف کر سکتی ہے۔ہماری تاریخ میں اس بات پر تو تنقید یا بحث مل جاتی ہے کہ اختلاف کرتے ہوئے آداب کا خیال نہیں رکھا گیا یا حفظ مراتب کو نظر انداز کر دیا گیا لیکن یہ کبھی نہیں کہا گیا کہ اختلاف رائے کیوں کیا گیا۔اسلامی تہذیب میں جس طرح حفظ مراتب کو ایک بنیادی قدر کی حیثیت حاصل ہے اسی طرح اختلاف رائے اور ا ظہار رائے کی آزادی کو بھی اہم قدر کی حیثیت حاصل رہی ہے ۔
یہ سوال کہ اختلاف رائے کیوں کیا گیا ، مسلمان معاشروں میں بہت بعد کی پیداوار ہے اس کا نہ اللہ اور رسول کے حکم سے کوئی تعلق ہے اور نہ اہل علم کی روایات سے ۔ ہمارے تمام جلیل القدر علما پر یہ بات روز روشن کی طرح عیا ں رہی ہے کہ غیر مشروط سمع و طاعت کا حق صرف پیغمبر کی ذاتِ عالی کے لیے خاص ہے ۔ اور ختم نبوت کی وجہ سے اب یہ حق قیامت تک کسی اور کے لیے خاص نہیں ہو سکتا ۔ اور اگر کوئی ایسی کوشش کی جائے گی تو یہ اصل میں ‘‘چھوٹے چھوٹے پیغمبر ’’ بنانے کی کوشش ہو گی۔ بدقسمتی سے اہل علم کا یہ رویہ ان کے پیروکاروں کی نظروں سے اوجھل ہو گیا اور انہوں نے انہی اہل علم کی آرا کو اتنا مقدس بنا لیاکہ ان سے اختلاف کی گنجایش کو حق و باطل کی جنگ بنا ڈالا۔اسی رویے نے اسلامی تہذیب اور معاشرے میں نہ صرف جمود اور اندھی تقلید کو جنم دیا بلکہ انسانوں کو عقل کل اوردیوتا بنانے کی رسمِ قبیح کو بھی پروا ن چڑھایا۔اور اب صورتِ حالات یہ ہو گئی ہے کہ مسلم معاشروں میں جگہ جگہ قائم مذہبی ، سیاسی ، معاشی ، علمی اورعملی دیوتاؤں کو اپنا مفاد اسی میں نظر آتا ہے کہ اختلاف رائے کو ادب ، محبت اور عشق کے نام پر غیر اسلامی باور کرایا جائے تا کہ ان کی ‘دیوتائی’ بھی قائم رہے اور‘ ‘گلشن’’ کا کاروبار بھی چلتا رہے۔ان حالات میں ہر وہ مسلمان جو اللہ کی رضا کا طالب ، آخرت کی کامیابی اور مسلم معاشروں اور اداروں کی ترقی کا خواہاں ہو،اس پر لازم ہے کہ وہ جہاں بھی ہو بسا ط بھر اس بات کو عام کرے کہ آداب کی رعایت کرتے ہوئے ،اختلاف رائے اسلامی تہذیب کے ماتھے کا جھومر ہے اور اللہ اور اس کے رسول ﷺ کی تعلیم کے عین مطابق ۔ مگر خیا ل رہے کہ اس پیغام اور اس بات کو عام کرنے میں شایستگی اور تہذیب کا دامن ہاتھ سے نہ چھوٹنے پائے ورنہ ہم میں او ر ان ‘دیوتاؤں ’ میں کیا فرق رہ جائے گا۔۔۔!
