سبھی نے عید منائی مرے گلستاں میں
کسی نے پھول پروئے ، کسی نے خار چُنے
بنامِ اِذنِ تکلم ، بنامِ جبرِ سکوت
کسی نے ہونٹ چبائے ، کسی نے گیت بُنے
بڑے غضب کا گلستاں میں جشنِ عید ہوا
کہیں تو بجلیاں کوندیں ، کہیں چنار جلے
کہیں کہیں کوئی فانوس بھی نظر آیا
بطورِ خاص ، مگر قلبِ داغ دار جلے
عجب تھی عیدِ خُمستاں ، عجب تھا رنگِ نشاط
کسی نے بادہ و ساغر ، کسی نے اشک پیے
کسی نے اطلس و کمخواب کی قبا پہنی
کسی نے چاکِ گریباں ، کسی نے زخم سیے
ہمارے ذوقِ نظارہ کو عید کے دن بھی
کہیں پہ سایہِ ظلمت ، کہیں پہ نُور ملا
کسی نے دیدہ و دل کے کنول کِھلے پائے
کسی کو ساغرِ احساس چکنا چور ملا
بہ فیضِ عید بھی پیدا ہوئی نہ یک رنگی
کوئی ملول ، کوئی غم سے بے نیاز رہا
بڑا غضب ہے ، خداوندِ کوثر و تسنیم!
کہ روزِ عید بھی طبقوں کا امتیاز رہا
