حمد

حمدِ باری تعالیٰ
شبِ ازل دمِ اعجاز کُن فکاں تجھ سے
ضمیرِ ہست میں نقشِ طلسمِ جاں تجھ سے
دھڑک رہا ہے اگر دل تو اِذن ہے تیرا
حریمِ جاں میں جو گونجی ہے تو اذاں تجھ سے
حطیمِ فکر جو روشن ہے تیرے نام سے ہے
مرے دہن میں ہے گویا تو یہ زباں تجھ سے
مرے تمام ارادوں میں تیری مرضی ہے
مرے ہر ایک عمل کا ہے امتحاں تجھ سے
تمام فکر و تفکر کی انتہا تُو ہے
تمام حرف و حکایت ہے درمیاں تجھ سے
مکاں کی حد بھی تصور سے میرے باہر ہے
میں کیا کہوں متصور ہے لامکاں تجھ سے
تری رضا سے بشر عرشِ پاک پر پہنچا
زمیں سے تا بفلک طرحِ نردباں تجھ سے
مرے شرف کے لیے کیا یہ مرتبہ کم ہے
فلک پہ جا کے ہو انسان ہمزباں تجھ سے
ترے جہان میں خوشبو تری تو ہے لیکن
نجانے دور ہے کتنا ترا مکاں تجھ سے
مرے خیال کو تجھ سے مفر نہیں ہر گز
زمیں بھی مری تجھ سے ہے، آسماں تجھ سے
میں اپنی کون سی مشکل کروں عیاں تجھ پر
مرے خیال کا در، کون سا نہاں تجھ سے
میں اپنا نفس گزیدہ، سکونِ دل کے لیے
ہجومِ کرب میں مانگوں تو بس اماں تجھ سے
پرتو روہیلہ