اے خدا مالك زمان و مكاں
تو كہ ہے ماورائے وہم و گماں
حكمرانی میں تیری جن و ملك
دسترس میں تیری زمین و فلك
تو سراپا جلال ہے یا رب
تو مجسم جمال ہے یا رب
چاند تاروں میں روشنی تجھ سے
سب نظاروں میں دل كشی تجھ سے
تو نے ذروں كو روشنی بخشی
خاك كو تو نے زندگی بخشی
تو ہی اول ہے تو ہی آخر ہے
تو ہی پنہاں ہے تو ہی ظاہر ہے
رگ جاں سے قریب تر تو ہے
ہر نفس میں تیری ہی خوشبو ہے
ہر اشارے میں سو كرم پنہاں
رحمتوں كا تری شمار كہاں
