مناجات بدرگاہ قاضی الحاجات
یا رب شجرِ فہم میں گل اور ثمر دے
میں جاہل و بے علم ہوں تو علم و ہنر دے
ہر بات میں ہر لفظ میں کچھ ایسا اثر دے
پتھر کا جگر ہو تو اْسے موم سا کردے
اخلاص سے بے لوث محبت ہو سخن میں
پھر حسنِ فصاحت ہو، بلاغت ہو سخن میں
ناقص ہے مرا فہم تو ناقص مری دانش
اے صاحبِ الطاف و کرم کیا مری کوشش
میں ذرہ بے جان ہوں بس تجھ سے ہے جنبش
ہو جائے اگر مجھ پہ ترے فضل کی بارش
میں سب کی نگاہوں میں سمندر نظر آؤں
اربابِ گلستاں میں سخنور نظر آؤں
***
تو چاہے تو ذرے میں بھی صحرا نظر آئے
قطرے میں بھی انساں کو دریا نظر آئے
کوہوں میں چمکتا ہوا ہیرا نظر آئے
ہرِ کاہ میں اک جلوہ زیبا نظر آئے
رائی کو بھی پربت تْو بنا دے تو عجب کیا؟
مجھ جاہلِ مطلق کو نہ بخشے گا ادب کیا؟
***
میں لالہ پرسوز ہوں اس صحنِ چمن میں
اک ہستیء بیکار ہوں دنیائے سخن میں
شامل نہیں میں نسترن و سرو و سمن میں
ناقدریء احباب کا کشتہ ہوں وطن میں
آزاد بے نطق ہوں میں، یارائے بیاں دے
کچھ سازِ عیاں بخش دے کچھ سوزِ نہاں دے
حکیم فاروق اعظم سومرو المتخلص بہ آزاد
***
