ترے خیال سے لَو دے اٹھی ہے تنہائی

مصنف : ناصر کاظمی

سلسلہ : نظم

شمارہ : نومبر 2014

ترے خیال سے لَو دے اٹھی ہے تنہائی
 شبِ فراق ہے یا تیری جلوہ آرائی


تو کس خیال میں ہے منزلوں کے شیدائی
 اْنھیں بھی دیکھ جِنھیں راستے میں نیند آئی


ٹھہر گئے ہیں سرِ راہ خاک اْڑانے کو
 مسافروں کو نہ چھیڑ اے ہوائے صحرائی


رہِ حیات میں کچھ مرحلے تو دیکھ لئے
 یہ اور بات تری آرزو نہ راس آئی


یہ سانحہ بھی محبّت میں بارہا گزرا
 کہ اس نے حال بھی پوچھا تو آنکھ بھر آئی


دلِ فسردہ میں پھر دھڑکنوں کا شور اْٹھا
 یہ بیٹھے بیٹھے مجھے کن دنوں کی یاد آئی


میں سوتے سوتے کئی بار چونک چونک پڑا
 تمام رات ترے پہلوؤں سے آنچ آئی


کھْلی جو آنکھ تو کچھ اور ہی سماں دیکھا
 وہ لوگ تھے، نہ وہ جلسے، نہ شہرِ رعنائی


وہ تابِ درد وہ سودائے انتظار کہاں
 اْنہی کے ساتھ گئی طاقتِ شکیبائی


پھر اس کی یاد میں دل بے قرار ہے ناصر
 بچھڑ کے جس سے ہوئی شہر شہر رسوائی