Mustafa Sadiq al-Rafai 1880-1937 ek Lebanese nasal Misri shayar aur adeeb ho gaya hai jo baqaidah tor par taleem mukhtasir primary tak hi hasil kar paya. Typhoid ka shikar hone ki wajah se apni sunnaat se mehroom ho betha. Baqaidah parhne ka silsila munqata hua magar woh apne taur kuch na kuch ilm ke husool mein laga raha. Is ki qabliyat aur adab dosti ka andaza is baat se lagaya ja sakta hai ke is ka likha hua qaumi tarana Misr mein 1923 se 1936 tak raaj raha. Jabkeh is ka Tunis ke liye likha hua qaumi tarana aaj tak raaj hai. Woh beesion adbi kitabon ka muallif hai magar jo shohrat teen jildon par mushtamil is ki kitab "Wahi al-Qalam" ko mili woh kisi aur kitab ko na mili saki. Is ke ham asr aur baad ke ulama iska tazkara adab o ihtiram se karte hain. Zair-e-nazar qissa is ki is kitab Wahi al-Qalam se liya gaya hai. Kisi jagah Abu Nasr al-Sayyad nami ek shakhs, apni biwi aur ek bachay ke sath gurbat aur aflass ki zindagi basar kar raha tha. Ek din woh apni biwi aur bachay ko bhook se nadhal aur bikta rota ghar mein chhod kar khud ghomon se chur kahin ja raha tha ke raah chalte us ka samna ek aalim deen Ahmad bin Muskin se hua, jise dekhte hi Abu Nasr ne kaha; Aye sheikh main dukhon ka mara hun aur ghomon se thak gaya hun. Sheikh ne kaha mere peechay chalo aao, hum dono samandar par chalte hain. Samandar par pounch kar sheikh sahab ne use do rakat nafl namaz parhne ko kaha, namaz parh chuka to use ek jaal dehte hue kaha use Bismillah parh kar samandar mein phenko. Jaal mein pehli baar hi ek bari sari azeem-ul-shan machli phans kar bahar aa gayi. Sheikh sahab ne Abu Nasr se kaha, is machli ko ja kar farokht karo aur hasil hone wale paiso se apne ahle khana ke liye kuch khane peene ka saman khareed lena. Abu Nasr ne sheher ja kar machli farokht ki, hasil hone wale paiso se ek qimay wala aur ek meetha paratha khareeda aur seedha Sheikh Ahmad bin Muskin ke paas gaya aur use kaha ke hazrat in paratho mein se kuch leina qubool kejiye. Sheikh sahab ne kaha agar tumne apne khane ke liye jaal phenka hota to kisi machli ne nahi phansa tha, maine tumhare sath neki goya apni bhalaai ke liye ki thi na ke kisi ajrat ke liye. Tum ye parathe le kar jao aur apne ahle khana ko khilao. Abu Nasr parathe le kar khushi khushi apne ghar ki taraf ja raha tha ke usne raaste mein bhookon mari ek aurat ko rote dekha jis ke paas hi us ka be haal beta bhi baitha tha. Abu Nasr ne apne hathon mein pakre hue parathe ko dekha aur apne aap se kaha ke is aurat aur is ke bachay aur us ke apne bachay aur biwi mein kya farq hai, mamla to ek jaisa hi hai, woh bhi bhookay hain aur yeh bhi bhookay hain. Parathe kis ko de? Aurat ki aankhon ki taraf dekha to us ke behne aansoo na dekha saka aur apna sar jhukha liya. Parathe aurat ki taraf barhate hue kaha yeh lo; khud bhi khao aur apne bete ko bhi khilao. Aurat ke chehre par khushi aur us ke bete ke chehre par muskurahat phail gayi. Abu Nasr ghamgeen dil le kar wapas apne ghar ki taraf ye sochte hue chal diya ke apne bhookay biwi aur bete ka kaise samna kare ga? Ghar jaate hue raaste mein usne ek munadi wala dekha jo keh raha tha; hai koi jo use Abu Nasr se mila de. Logon ne munadi wale se kaha yeh dekho to, yehi to hai Abu Nasr. Us ne Abu Nasr se kaha; tere baap ne mere paas aaj se bees saal pehle tees hazaar dirham amanat rakhe the magar yeh nahi bataya tha ke in paiso ka karna kya hai. Jab se tera walid foot hua hai main dhundhta phir raha hoon ke koi meri mulaqat tujh se kara de. Aaj maine tumhe pa hi liya hai. Yeh lo tees hazaar dirham, yeh tere baap ka maal hai. Abu Nasr kehta hai; main baithay baithaye ameer ho gaya. Mere kayi kayi ghar bane aur meri tijarat phailti chali gayi. Main ne kabhi bhi Allah ke naam par dene mein kanjusi na ki. Ek hi baar main shukrane ke tor par hazaar hazaar dirham sadqa de deta tha. Mujhe apne aap par rishk aata tha ke kaise farakhdili se.Sadqa khairaat karne wala ban gaya hoon. Ek baar main ne khwab dekha ke hisaab kitaab ka din aan pohancha hai aur maidan mein tarazu nasb kar diya gaya hai. Munadi karne wale ne awaaz di "Abu Nasr ko laaya jaaye aur us ke gunah aur sawab tole jaayein." Kehta hai; "Puland mein ek taraf meri nekiyan aur doosri taraf mere gunah rakhe gaye to gunahon ka puland bhaari tha. Main ne poocha aakhir kahaan gaye hain mere sadqaat jo main Allah ki raah mein deta raha tha? Tole walon ne mere sadqaat nekiyon ke puland mein rakha diye. Har hazaar hazaar dirham ke sadqa ke neeche nafs ki shahwat, meri khud numai ki khwahish aur riakari ka malma chadha hua tha jis ne in sadqaat ko royi se bhi zyada halka bana diya tha. Mere gunahon ka puland abhi bhi bhaari tha. Main ro pada aur kaha, "Haye re meri nijaat kaise hogi?" Munadi wale ne meri baat ko suna to phir poocha; "Hai koi baqi is ka amal to le aao." Main ne suna ek farishta keh raha tha, "Haan is ke diye hue do prathey hain jo abhi tak mizaan mein nahi rakhe gaye." Woh do prathey tarazu par rakhe gaye to nekiyon ka puland utha zaroor magar abhi na to barabar tha aur na zyada. Munadi wale ne phir poocha; "Hai kuch is ka aur koi amal?" Farishte ne jawaab diya, "Haan is ke liye abhi kuch baqi hai." Munadi ne poocha woh kya? Kaha "Is aurat ke aansu jise us ne apne do prathey diye the." Aurat ke aansu nekiyon ke puland mein daale gaye jin ke pahaar jaise wazan ne tarazu ke nekiyon wale puland ko gunahon ke puland ke barabar la kar khara kar diya. Abu Nasr kehta hai mera dil khush hua ke ab nijaat ho jayegi. Munadi wale ne poocha hai koi kuch aur baqi amal is ka? Farishte ne kaha; "Haan, abhi is bachay ki muskurahat ko puland mein rakna baqi hai jo prathey lete hue us ke chehre par aayi thi." Muskurahat kiya puland mein rakhi gayi nekiyon wala puland bhaari se bhaari hota chala gaya. Munadi karne wala bol utha "Yeh shakhs nijaat pa gaya hai." Abu Nasr kehta hai; "Meri neend se aankh khul gayi." Main ne apne aap se kaha; Agar main ne apne khane ke liye jaal phenka hota to kisi machli ne nahi phansa tha aur apne khane ke liye prathey khareede hote to aaj nijaat bhi nahi hoti. Intezar Khalil ek muneer shakhsiyat ka malik khubro nojawan tha jis ki salahiyaton par kisi ko shak nahi tha. Magar apni is khami ki wajah se, ke kisi kaam se jaldi ukta jana, tees saal ka ho jane ke bawajood bhi zindagi ki haqeeqi kamiyabiyon se kahin door tha. Taleemi maidan mein ek ko chhod kar doosre ilm ke peechhe bhagta raha aur ab mulazmaton ka bhi yehi haal ke kahin tik kar kaam nahi kar pa raha tha. Shadi ke naam se us ka badkarna mazid usi banaya par tha ke woh abhi tak kisi mulazmat ko mustaqil apnane ke liye khud ko zehni tor par tayyar hi nahi kar pa raha tha. Khalil ke maan baap apne bete ki is chalbali tabiyat se khub waqif, har waqt us ke liye pareshan rehte the. Ek din us ke baap ne usse subah subah phone kiya ke aaj hum tere shehar mein aa rahe hain aur wahan ke mashhoor restaurant mein teen baje akhate dopehar ka khana khayenge. Khalil is shehar mein pichle chand mah se raha tha. Is doran us ki walidain se mulaqat bhi nahi hui thi. Walidain se milne ki khushi mein waqt se pehle hi matalooba restaurant chala gaya aur bahar ka manzar khubsoorat dikhane wali ek mez par barajman ho gaya. Bairi ko us ne bata diya ke woh apne walidain ka intezar kar raha hai aur un ke aane par khana talab karega. Teen baje Khalil ne apne walid ko phone kar ke poocha ke aap abhi tak pohanche nahi to us ne jawaab diya ke wo raaste mein hain aur abhi paHuncha hi chahte hain. Saarhay teen bajay ek baar phir Khalil ne phone kar ke walid se tasdeeq ki ke woh raastay mein hi hain na? Char bajay Khalil ne ek baar phir apne walid ko phone kar ke khairiyat poochi to usne kaha; main ne keh diya hai na ke main aur teri maan hum dono raaste mein hain aur aa hi rahe hain. Intezaar ki kofat mein mubtala Khalil ne paanch bajay baap ki bajaye apni maan ko phone karke poocha taake sahi surat-e-haal ki samajh aaye magar uski maan ne bhi wahi jawaab diya jo uske baap ne diya tha ke hum raaste mein hain aur bas pahuncha hi chahte hain. Intezaar ki kofat aur azziat mein mubtala Khalil ki halat dekhni thi. Na woh restaurant chhod kar kahin ja sakta tha aur na hi phone par cheekh chila kar apni kofat ka izhaar kar sakta tha, kyunke yeh koi aur nahi uske maan baap the. Apni tabiyat ke baraks zehar ka karwa ghont bhare wahi mara kya na karta ke musaddaq baitha intezaar karta raha. Isi tarah chhe bajay to uske maan baap restaurant mein dakhil hote dikhaye. Khalil ne apni nagawari ko dabaaye sard mizaji se khade ho kar maan baap se salaam dua li aur chhotte hi poocha; kya hogaya tha aap logon ke saath? Kyun itni der laga di? Uske baap ne nihayat dheeme se lahje mein kaha teri wajah se hamein yeh saari der hui hai. Meri wajah se? Khalil ne apni hairat ko dabaate hue baap se poocha. Baap ne phir se dheeme lahje mein Khalil ko apna wahi jawaab diya haan teri wajah se der hui hai yeh saari. Is baar Khalil ki maan ne dakhal andazi karte hue kaha; chalo beta kya ho gaya ab, aakhir hum pahunch hi gaye hain na? Ho sakta hai tumne koi achha sabak hi seekha ho aaj ki is mulaqat se. Khalil ne poocha ami ji, is kofat se jo maine uthayi hai bhala kaunsa achha sabak nikalta hai mujhe bhi to bataiye? Khalil ke walid ne kaha; bete tum chahte hue bhi aaj restaurant ko chhod kar nahin ja sakte kyunke tum jin logon ke intezaar mein yahan baithay rahe woh koi aur nahi tumhare waliden the, tum baar baar apni jhanjhat ko daba kar hamein phone karte rahe. Chaahne ke bawajood bhi apni aawaz ko uncha nahin kar sake ke samne koi aur nahi tumhare waliden the. Agar tumhara aaj ka maqsad yahan baith kar apne pyare waliden se mulaqat karna tha aur un ke saath baith kar khana khane ki saadat hasil karna tha to tumhein intezaar ki kofat to uthana pari magar tum apne maqsad mein kaamyab rahe. Khalil jo ab tak apne ghuse, uktahat aur jhanjhat ko dabaaye hue tha us baat ka matlab nah samjha aur pooch hi liya ke aba ji mujhe aap ki baat kuch samajh nahin aayi. Khalil ke walid phir goya hue; bete tumhare andar zindagi ke har shuba mein kaamyaabi hone ki poori salahiyaten hain, magar har koshish ke nateejay bar aane tak sabr ke saath ek intezaar ki zaroorat hoti hai jo tumhare andar nahin hai. Sabr ek takleef deh marhala zaroor hota hai magar is ke nateejay meethay phalon ki tarah hote hain. Apne khawabon ki taabeer ke liye is tarah sabr ke saath intezaar karo jis tarah tum ne aaj apne waliden ke khairiyat se pahunch jaane ka kiya hai. Aaj tum chahte hue bhi apne munh se off nah kar sake ke mamla waliden ka tha jin ko nah chhoda ja sakta tha aur nah kuch bola ja sakta tha. Aaj agar tum ne intezaar kiya hai to apni murad bhi to paayi hai. Aaj pehli baar tha ke Khalil sar jhukaaye apne waliden ki baatein is tawajjeh se sun raha tha. Andar se uska dil apni un tamam nakam koshishon ke liye dhaarein maar kar ro raha tha jin ke nateejay ka intezaar kiye baghair apni laabali tabiyat ke haathon majboor woh ek ko chhod doosri ke taluq mein bhagte bhagte thak chuka tha. Kash yeh sab kuch woh bohot pehle seekh pata ke khawab haqiqat bante dekhne ke liye sabr karna seekhna parta hai. Mashhoor scientist Thomas Edison kehta hai zindagani mein nakam hone wale aksar log woh hain jinhon ne apni koshishen us waqt chhodi jab unhe adrEk hi nahi tha ke woh kamiyabi ke kis qadar nazdeek ja pahunchay hain. ***