وہ باتیں تری وہ فسانے ترے

مصنف : عبدالحمید عدم

سلسلہ : نظم

شمارہ : جولائی 2014

وہ باتیں تری وہ فسانے ترے
شگفتہ شگفتہ بہانے ترے

 

بس اک داغِ سجدہ مری کائنات
جبینیں تری ، آستانے ترے

 

بس اک زخمِ نظّارہ ، حصّہ مرا
بہاریں تری ، آشیانے ترے

 

فقیروں کا جمگھٹ گھڑی دو گھڑی
شرابیں تری ، بادہ خانے ترے

 

ضمیرِ صدف میں کرن کا مقام
انوکھے انوکھے ٹھکانے ترے

 

بہار و خزاں کم نگاہوں کے وہم
برے یا بھلے ، سب زمانے ترے

 

عدم بھی ہے تیرا حکایت کدہ
کہاں تک گئے ہیں فسانے ترے