تو مالک حیات ہے، اے ربِ کائنات
تو حسن کائنات ہے، اے ربِ کائنات
دنیائے ہست و بود میں ہر شے کو ہے فنا
تجھ کو ہی بس ثبات ہے، اے ربِ کائنات
ہو شانِ کبریائی تری کس طرح بیاں
تیری عظیم ذات ہے، اے ربِ کائنات
تو خالقِ عظیم، اس کی بڑی دلیل
تخلیق شش جہات ہے، اے ربِ کائنات
خوش بختیوں کا اس کی ٹھکانہ ہو کیا بھلا
جس پر بھی تیرا ہاتھ ہے، اے ربِ کائنات
ہم کو غم و مصائبِ دنیا سے کیا خطر
جب تو ہمارے ساتھ ہے، اے ربِ کائنات
نطق و زبان پر تری حمد و ثنا کے بعد
تیرے نبیؐ کی نعت ہے، اے ربِ کائنات
