Allah ke raza chahne walon aur aish paraston ki abratanak sachi dastan Mera talluq bunyadi tor par sargodha ke dehi ilaqe se hai. Mein jab kabhi Lahore aata, Syed Asad Gilani marhoom yeh keh kar mujhe hijrat par aksate ke sargodhe walay basi akhbarat parhte hain, basi phal khaate hain aur mujhe qail kya karte hain ke chhotey sheher se hijrat karke bare sheher mein aabsana sunnat-e-Rasool (S.A.W) Arabi hai. Hijrat Makka ke baad Nabi Kareem (S.A.W) aur aap ke saathi kisi veeraney mein jaa baste to wahi veerana rashk sad firdaus ban jata lekin Yathrib ko sharaf hijrat bakhsha jana yeh wazeh karne ke liye kafi hai ke bare sheher aasabi marakiz aur kisi tehreek se wabasta afrad ki kamiyabi ka awwaleen zeenah hote hain. Baharhal kuch Gilani sahab ki targeeb se aur kuch duniyawi aghraz ki khatir 1979 mein Lahore aabsa. yahan aakar mujhe do hazar mahana par kiraye ke makaan mein rehna para. Mere malik makaan woh pehla kirdar the jo mujhe bawar kara gaye ke Allah ki zameen par Allah ki makhlooq aik se aik barh kar hai, neez Allah ke bande us ki zameen par ajzana chalne wale hain, woh raton ko masalon ki zeenat hote hain aur din ke doran diyanat aur amanat ke sath rizq halal ki talash mein sargardan nazar ate hain. Mere malik makaan ne 1982 mein watan chhora aur karobar aur mulazmat ke silsile mein Harmain Sharifain wali mubarak zameen ko watan sani bana liya. Mein un ke makaan mein 1984 se 1994 tak maqim raha. Makaan ka salana kiraya 24000 rupe se shuru hokar 60000 rupe tak pahuncha. Mein gawahi deta hoon ke unhone kabhi kiraya wasool nahi kiya. Das barson ka tamam kiraya mere haton mein mukhtalif khairati idaroon ko diya gaya. Mein rasiden hasil karke apne malik makaan ke hawale kar deta tha. Har Shaban mein unka khat balke hukm nama mujhe mosool ho jata: "Das hazar jihad Kashmir fund aur das hazar jihad Afghanistan fund mein jama kara dein. Baqi char hazar jamiat talibat Arabiya ke shaheed flaan nojawan ki walda ko wahari ke patey par mani order kardain." Attiyat bhejte bhejte mujhe Islami taleemi markaz ke patey azbar ho gaye. Baaz auqat woh apne qareebi azha aur aqarib ko bhi yaad rakhte aur tasar dete ke yeh qarz hasna ki mad se hain. Un ka aik hi taqaza hota ke taqseem atiyat ka sara kaam Ramazan ke muqaddas mahine mein takmeel pazeer ho jaye takeh woh kam az kam sattar guna ajro sawab ke mustahiq thareen. Mein apne malik makaan ke jazbe infaq par heran bhi tha aur khush bhi ke duniya mein aise mukhlis log bhi hain. Yeh khayal bhi aata ke mere mamdooh malik makaan Saudi Arabia mein karobar kar rahe hain, wahan riyal kamate hain, is liye tees chalees hazar rupey fi sabeelillah kharch kar dalna un ke liye koi bari baat nahi hai. Mein 1985 mein umrah ke liye Makkah Mukarramah un ke makaan par pahuncha. Unhone intehai khanda peishani se mera istiqbal kiya aur kuch poochhe baghair mera saman khud utha kar balai manzil par le gaye. Mein das roz un ka mehman raha ghlaban december ke aakhri ayyam the. Woh subah nashta, do baje zoharana aur aath nau baje raat ka khana khaate, lekin mere liye bhari nashta paratha waghera tayyar karte aur raat ka khana maghrib ki namaz ke foran baad mery kamre mein pohancha diya jata. Unho ne nah sirf khud mujhe be had izzat o ikram se nawaza balkay un ke chhote chhote bachon ne bhi meri khidmat mein koi kasar utha na rakhi. Meri jaddah rawangi ke waqt mera bhari samaan khud utha kar taxi adday par le gaye aur mujhe mohabbat ke sath rawana kiya. Qayam haram ke doran unho ne mujhe mina, muzdalifah, arafat, jabal noor aur jabal sowr ki ziyarat karai. Khud kar driving karte rahe. mein ne poocha watan wapsi kab hogi. mujhe yeh fikar khaye jarahi thi ke makaan khali karna hoga aur mazafat Lahore mein unki jo pachas ekar zameen mazariat par le rakhi hai, woh bhi chhorni hogi. woh muskuraye aur farmaya: "khatar jama rakho, wapsi ka abhi koi irada nahi. bhale aadmi, yahan se koi musalman az khud wapsi ka soch sakta hai? jab tak mumkin hua haram pak ki namazon aur saadaton se faiz yab hota rahunga. jab mumkin nah raha to yahan ki pakiza yaadein sine se lagaye aap logon ki khidmat mein ahazir honge." Saudia mein barson qayam ke bawajood un ka saz o samaan mamooli hesiyat ka tha. ghair mulki ashya ki chak damak un ke ghar mein nahi thi. woh bohat kuch kamate lekin raah e khuda mein kharch kar dalte the. mere das rozah qayam ke doran teen chaar mehman aur aaye aur meri tarah be taklafi se apna ghar samajh kar daire daal diye. baad mein Pakistan ke doston ne bataya ke tumhare malik makaan ka ghar to hajj ke dinon mein madinatul hajaj ka manzar pesh karta hai. mehmanon ki khurak o rehaish ka ihtimaam to darkinar, malika makaan hajiyon ke kapre dhoney aur istri karne ka farz bhi khud anjam deti hain aur ayyam hajj mein un ke haan kabhi pachas se kam Pakistani mehman nahi hote. tab mujhe yaad aya ke qayam e umrah ke doran rozana dhulay dhulaye kapre mere tekiye par kon rakhta tha. mera malik makaan meri nigah mein ek misali insaan hai. ab woh saal bhar se Pakistan wapas a gaya hai aur is ke baad bhi do teen umra kar chuka hai kyunke us ka dil unhi par noor fazaon mein atka hua hai. us ki umda sehat, noorani chehra, us ki mutaqiyanah zindagi aur amanat o deyanat, us ki is dunya mein bhalaai aur aakhirat ki yaqeeni bhalaai, kis cheez ka tazkira kiya jaye aur kis cheez ka tazkira chhora jaye. us azeem aur anmol kirdar ki azmat ka yeh aalam hai ke mein us ka naam aur pata zahir nahi kar sakta kyunke woh ajr azeem ki khatar Allah taala ke haan gumnaam mohsinon ki saf mein shamil hokar hazir hona chahta hai, taham yeh kiye baghair nahi reh sakta ke woh millat muslim ka ek azeem qadr heera hai aur is millat ka azim wajood unhi jaise heeron aur motiyon ka mairhon minnat hai. Apne is be loos mohsin ki azeem dastan ke sath sath apne ek bad naseeb dost ki dukhi kahani sunane ko bhi ji chahta hai taake nigah e ibret kuch to dekh sake. yeh sahib mere abai gaon se malhaq ek bare gaon ke basi aur bohot bare qabeelay ke fard hain. august 91 92 ki baat hai. ek dopahar woh mere paas mansoore tashreef laye. un ke pass ek FIR ki naqal thi. woh hawai firing ke ilzam mein zamaanat qabal az giraftari chahte the jo bari hi aasan baat thi. mere poochne par unho ne bataya ke woh barah e raast high court is liye aaye hain taake nakami ki surat mein giraftari ka khatra na rahe. mein ne bhari fees mangi. unho ne be parwahi se neelay sabz note mere samne rakhe aur farmaya: "mein ne paanch saal saudi arab mein khoob dolat kamayi hai, is liye fees vees koi masla nahi. zamaanat lazmi tor par honi chahiye." Main ne is nojawan ko dekha to dekhta hi rah gaya. Darmiyana qad, chhirera balkay phireetla badan, gora chitta rang, khoobsurat aankhein, satwaan naak, khoobsurat chamakile dant, safed lathay ka kalaf laga tahamand jo zameen par takhno se neeche ghist raha tha, do ghora boski ka karhai wala kurta, sone ke button aur stadd, galay mein talai zanjeer aur ungliyon mein sone ki mukhtalif nagoon se muzayyan do angoothiyan, is par mustazad haath mein nafees roald gold lighter aur gair mulki cigarettes ka packet tha. Woh cigarette ka kash bari dil jamaee se lagata aur neem wa ankhon ke sath bare la abali andaz se dhuwen ke murgole fazaa mein bikherta. Mujhe bhaari fees ke ilawa bhi is nojawan se dilchspi hogai kyunke main us ke naam aur khandan ko ghayabana tor par janta tha. Door paar ki rishtedar bhi thi. Main ne baat barhai aur saudi arab ke hawale se poocha: 'Phir aap to bare khush qismat hain ke dolat duniya bhi haramain shareefain ke jawaar mein rah kar kamaai. Do teen haj aur do teen umra to kahin gaye nahin. Hosakta hai iss se zyada bhi saadat mili ho. Phir haramain shareefain mein namaz panjgana ka azeem sawab jo kisi naseeb wale ki qismat mein hota hai!' Nojawan ne bekhayali se meri guftagu suni aur nagawaar sa ta-assur is ke chehre par namoodar hua. Usne cigarette sulgai, jhatke se lighter band kiya aur der tak dhuan munh mein band rakha aur phir mukhtasir sa jawab diya: 'Main ne koi hajj wajj kiya na koi umrah balkay main ne namaz bhi shayad hi kabhi parhi ho! Main to dolat kamane gaya tha woh datt kar kamai aur barh charh kar kharch ki!' Main us ke munh se yeh jawab sun kar hakka bakka rah gaya. Zyada baat ko barhana main ne munasib nah samjha, taham usse Gojranwala ke Khawaja Abdul Aziz ki badnaseebi ki dastan zabardasti suna dali: 'Khawaja sahib sath baras ki umr mein umr qaid ki saza pakar New Central Jail Multan mein dakhil hue. Ameero kabeer, mota taza insaan andar se toot phoot chuka tha. Ab woh ek tarah se nafsiyati mareez the. Unhone mujhe bataya ke woh 1955, 56 mein hajj par gaye. Hajj se farigh hote hi woh apni aishana zindagi ki taraf laut gaye. Watan wapsi ka intezar bhi nah kar sake, wahi jawaar kaaba ke ek five star hotel mein shabab o sharab ki mehfilain jam gaeen. Watan wapas aaye to badqismati ke andhere saiyon ne aaghera. Nojawan doosri biwi aur us ke ashna ko tesh mein aakar qatl kar dala aur us par unhein umr qaid ki saza hogayi. Pehli biwi se jawan larkon ne aiyash aur badqamash baap ki dolat aur jaidad par qabza kar liya magar us ki khabar leni munasib nah samjhi. 'Ab karod pati Khawaja sahib laawarath qaidi the aur apni saza ke khilaf appeal ke liye wakeel bhi muqarrar nah kar sakte the. Main ne bhesiyat qaidi manshi jail se un ki appeal dair ki. Lekin Khawaja sahib appeal ke faislay ka intezar nah kar sake. Pehle unhein pagal pan ke dore pade. Unhein dimaghi amraz ke hospital muntaqil hona pada jahan un ko reedh ki aage bator bail joota gaya. Woh naz o naim se pale hue the. Yeh mushqat baradasth nah kar sake aur ek saal ke andar unhein dil ka jan lewa dora pada aur woh raahi mulk e adum hogaye. Aibarat ki baat yeh hui ke jawan aulad aur un ki pehli biwi ne un ki lash wasool karne se inkaar kar diya aur woh laawarath qarar pakar kisi gum naam qabar mein daba diye gaye. Neem pagal Khawaja sahib New Central Jail Multan ki park number 7 mein unchi awaz se kehte the ke unhein kaabe ki behurmati ki saza mili hai.'ir="RTL" style="text-align: center;">Hazar ae churah dastaan sakht hain fitrat ki taziriyan Nojawan kahani sun kar muskuraya aur us ne phir se be parwai ke sath cigarette sulgaya aur dhuen ke margholay faza mein chhodte hue kaha: ‘‘Aap meri zimmat ki fikr karein. Aisi dastaanon ko sunane wale duniya mein aur bohot log mojood hain. Aaj duniya bhar ke ek arab musalmano mein se shayad hi ek lakh namazi honge. Tu kya baqi ek lakh kam ek arab jail mein chale gaye hain ya pagal hogaye hain. Yeh qismat ke saude hain. Mujhe dekhein main Saudi Arabia paanch saal man maani zindagi basarkarke aaya hoon aur itni dolat kama laaya hoon ke mere aqraba is ka tasawwur bhi nahi kar sakte, halankay woh haji bhi hain aur namazi bhi. Aap meharbani farmakar meri pakki zimmat karwa dein kyunke mujhe aane wale baldiyati elections ladna hai aur mera mansooba yeh hai ke chairman baldiya muntakhib hojaoon. Yeh akhlaqi dars aap kisi aur ko dein.’’ Baat aayi gayi ho gayi. Main ne dat kar fees wasool ki, aur kharcha darkhwast aur amalon aur ahlkaron ke naam par mazeed bohot kuch liya jo mila kar fees se bhi zyada tha, taham zimmat pakki karwa di kyunke mamooli jurm tha aur zimmat hohi jani thi. Baldiyati elections hoye aur woh nojawan bhari ikhtiyar se jeet gaya kyunke Saudiya se kamai hui dolat ke samne madmuqabil ki sab pesh bandiyan reet ki tarah beh gayeen, taham biradri mein ek mustaqil munaqash ka aghaz ho gaya aur chand roz baad hamare nojawan muntakhib numainde ko mukhalifeen ne sarbazar jooton se peeta, us ke kapre phaar diye aur baal noch daale. Ek hafta baad us bhuprey nojawan ne usi bazaar mein apne madmuqabil ko bandook ke fire se qatal kar diya, us par muqadma chala aur use umr qaid ki saza hogayi. Ab woh ghalebann usi barak number 7 be class ward, New Central Jail Multan mein hai aur us ke mukhalifeen ne us ke baap, bhai aur chachere bhai ko intiqam an qatal kar dala hai. Dono khandaan mukammal tor par tabah barbad hogaye hain. Chand roz qabl mujhe nojawan ka paigham pohncha ke us ki appeal nahi lag rahi, lehaza main zimmat ke liye koshish karun. Paigham bar se pata chala ke Saudi riyal khatam hochuke hain, ab fees ki baat Pakistani rupay ke mutabiq hogi. Agarche qanoon yeh hai ke do saal tak agar appeal ki samahat na ho to appeal karnindah ko zimmat pe raha hone ka haq hai, lekin mujhe yaqeen tha ke us ki zimmat nahi hogi kyunke Khawaja Abdulaziz ki zimmat bhi nahi hui thi, halankay woh Gujranwala ka crorepati buzaaz tha, is liye main ne mazrat kar li. Aaj bhi main apne malik makaan ke khoobsurat banglay ke samne se guzarta hoon to high court pohnchne tak mere samne khushbakhti aur badbakhti ke mutazad manazir ki film chalti rehti hai. Mera malik makaan apne muhkame se hand shake karke khatir raqam wasool kar chuka hai. Biwi bachay us ki aankhon ki thandak hain. Us ki bharpoor sehat aur us ki dilkash zindagi qabil rashk hai. Har ghari nekiyon aur bhalaaiyon ki talash mein rehna use barguzida insaan ke maqam buland ke qareeb se qareeb kar raha hai. Us ki zari zameen Lahore ke muzafat mein shamil hone se paanch chhe guna zyada qeemti hogayi hai. Woh deen ke peechay dor raha hai aur dunya us ke peechay dor rahi hai.Hai. Ye woh fazal hai Allah jise chahta hai ata karta hai. Dosray lamhe mere samne ek abrtnak manzar aamujood hota hai... Khwaja Abdul Aziz ki laawarish laash, ghairon ke hathon tafin aur gumnaam qabar aur teesray lamhe nojawan khubsurat aur banka nojawan meri nazron mein ghoom jata hai jis ke riyal khatam ho chuke hain aur woh jail ki kaal kookri mein shayad umr tamam kar de, lekin us ke samne abhi toba ka darwaza chupt khula hai aur use apna mamla is Rab-e-Ghafoor se tay karna hai jis ki rahimi aur kareemi ka naqsha Miyan Muhammad ne yun khincha hai. Ek gunah mera maan peyo dekhe, deewe des nikala Likh gunah mera maula dekhe parde deyon wala (Mere maan baap meri ek lghzish dekh kar mujhe ghar se nikal dete hain, magar mera Allah laakhon gunah dekh kar bhi meri pardah poshi karta hai.) Taham toba ki tawfiq bhi unhi ko milti hai jo maqbool baragah hon warna aakhri hichki tak aadmi gorkh dhandon mein phansa be ticket maut ki gari mein sawar ho jata hai, halankay shaair intabah kar chuka hai. Be ticketiyaan gaddi maul na chadhna Is gaddi jaana des begaane (Ticket ke baghair gari par hazar swar na hona ke yeh gari ajnabi des jane wali hai!) ..........*..........