kamaal-e zabt ko main khud bhi to azmaaun gi main apne haath se is ki dulhan sajaun gi supurd kar ke use chaandni ke haathon mein main apne ghar ke andheron ko laut aaun gi badan ke karb ko woh bhi samajh na paayega main dil mein roaun gi, aankhon mein muskuraaun gi woh kya gaya rafaqat ke saare lutf gaye main kis se rooth sakun gi, kise manaun gi ab is ka fun to kisi aur se hua mansoob main kis ki nazm akele mein gungunaun gi woh ek rishta be naam bhi nahi lekin main ab bhi us ke ishaaron pe sar jhukaun gi bicha diya tha gulabon ke saath apna wujood woh so ke uthe to khawabon ki raakh uthaun gi samaaton mein ab junglon ki saansein hain main ab kabhi teri awaaz sun na paaun gi jawaaz dhoond raha tha nayi mohabbat ka woh keh raha tha ke main us ko bhool jaun gi