Hamari baithak in dino Paower House Chorangi se mutsil Green Belt par thi jahan kisi purane hotel ki baqiyat mein se kuch takht bache rahe gaye the. Mujhe yaad hai woh siyah rang ki langri kutiya is din bari bechain thi baar baar hamari taraf aati jaise kuch kehna chahti ho. Main ne professor se kaha dekho yeh kuch kehna chahti hai, usne bhi ghor kiya to meri taeed ki woh kabhi hamari taraf aur kabhi Green Belt se mutsil footpath ki taraf jaati. Is footpath ke neeche naala tha. Main aur professor qareeb gaye to dekha footpath par mojood gape mein se kutiya ka bacha neeche phansa hua tha. Phir ajeeb manzar hua, tamam ahbab idhar hi mutwajjah ho gaye. Ek rash laga gaya tadbeerein hone lagi, kya karein kaise karein isko bachana hai. Mamta ki maari kutiya ek aas se hamein dekh rahi thi. Doctor Shabir Shakir Lone ne apni belt di, ek resi ka tukra, Nazar Fatmi ne diya, idhar Adeel Ahmad idhar hain, wahan Hassan bin Nazir khara hai ek taraf, Khayyam marhoom mutwajjah hain, qareeb hi Syed Faiyaz Ali bhi hain, Taher Abbas bhi yahin mojood hain. Aur phir hum ne use nikal liya, woh baar baar be tabi se apne bachay ko choom rahi thi, deewana war mohabbat se use chaat rahi thi. Aur phir uska hum se izhar-e-shukr, Khuda ki qasam, us kutiya ke izhar-e-shukr ko bhool nahi sakta. Aaj bhi yeh sab likhte waqt ankhon mein ansoo umad rahe hain. Woh kya tha, kaun si taqat thi jis ne itne logon ko yakdam fa'al kar diya. Mamta, beshak Mamta. Is kutiya ki apne bachay se mohabbat ne itne insanon ko fa'al kar diya, hum jaise mardah dilon ko fa'al kar diya. Woh ruki nahi jhuki nahi, woh insaan nahi thi woh langri thi lekin woh maa thi.