Tilawat-e-Quran ke aadaab (Khurram Murad) Quran Majeed bazahir ek kitaab hai. Kisi aur kitaab se bazahir koi farq bhi mehsoos nahi hota lekin apne taur ki mukhtalif kitaab hai. Iski na koi misaal hai na nazir. Hamein ise kaise parhna chahiye? Is ke liye Quran Majeed hi ne ek lafz istemal kiya hai, woh hai tilawat. Tilawat ke haqeeqi mafoom tak pahunchne ke liye kuch shara'it aur aadaab hain. Yun samjhein ke yeh zade safar hai: - Yeh imaan ho ke yeh Allah ka kalam hai. - Yeh niyat ho, akhlaas se, ke Allah hi se rahnumai lena hai. - Jo azeem-ul-shan khazana aur rahmat hamein mili hai, us par hamare dil mein shukr ke jazbaat hon. - Yeh ittefaq ho ke jo cheez bhi is kitaab mein hai sahih hai, wahi mere liye nafaa' hai, is mein mere liye bhalaai hai, usi mein khair hai. - Tayyar ho ke Quran ki taleemata ke mutabiq apne andar tabdeeli aur tagheer laye. - Quran se faida uthane mein jo khatrat aur andeshe hain un se bachne ke liye shaitan se panah mangi jaye. In chhe zahiri aadaab ke sath kuch bateni aadaab bhi hain: Insaan ka qalb uski androni shakhsiyat hai. Is qalb ko tilawat ke amal mein shareek kiya jaye. Kaise? - Quran ke mutabiq: Quran parha jaye to aankhon mein aansu ajate, dil kanp uthte, rongte khade hojate, imaan barhta hua mehsoos hota aur khushu' mein izafa hojata hai. In kifiyat ka istehzaar ho. - Yeh bhi mustahzar ho ke mein Allah ke samne hoon, uske samne baith kar parh raha hoon. - Yeh sochein ke hum is kalam ko Allah se sun rahe hain. - Yeh ehsas ho ke jo bhi kaha ja raha hai us ka har lafz mere liye hai. Jab koi Quran parhta hai to Allah ta'ala se guftagu aur mukalma karta hai. Allah ke rasool (S.A.W) raat ko namaz mein tilawat karte to sifat ke zikr par Subhanallah kehte. Inaamat ka zikr aata to Alhamdulillah farmate, nematon ka zikr aata to ruk kar un ko mangte. Azaab ka zikr aata to is se panah talab karte. Quran ka adab aur tazeem zaroori hai. Is mein qibla rukh baithna, ba wuzu hona, sar jhuka kar parhna, yeh sab batein shamil hain lekin is adab ko itna na barhaya jaye ke tilawat ko hi tark karde maslan yeh ke wuzu nahi hai aur baghair wuzu ke tilawat nahi hosakti.