chand saal qabal aik seminar ke doraan aik ghair mulki musalman danishwar se aik nojawan ne sawal kiya ke agar kisi waqia ke mutalliq aik hadees aur tareekhi rawayat mein taaruf ho to kisay tarjeeh di jaye gi? bojoh woh sahib nojawan ko tasalli bakhsh jawab nahi de sakte halankeh yeh hamare qadeem ulama aur muhaqiqeen ka mukarrar karda usool mojood hai ke agar masla tashreei nahi balkay tareekhi hai to tareekhi rawayat, rawayat hadees par rajeh hongi. is ko do misalon se samjhein. Imam Muslim ne Abdullah bin Abbas radiallahu anhu se rawayat naqal ki hai ke wafaat ke waqt Rasool Allah sallallahu alaihi wasallam ki umr 65 saal thi. (Muslim, hadees number 2353, bab kam aqam alnabi bimakkah). Nez Imam Muslim hi ne hazrat Aisha, hazrat Muawiyah aur hazrat Abdullah bin Abbas se rawayat naqal ki hain ke wafaat ke waqt Rasool Allah sallallahu alaihi wasallam ki umr 63 saal thi. (Muslim, hadees number 2349, 2350, 2351, 2352) Rasool Allah ki umar ka masla tashreei nahi balkay tareekhi nooaiyat ka hai is liye in mutaradif rawayat hadees mein tarjeeh us rawayat ko di jaye gi jis ki taeed tareekhi rawayat karein gi. Muhqiqeen ke haan yeh masalat mein se hai ke Rasool Allah ki umar 63 baras thi. Ibn Saad, Zahbi aur mutadid muhqiqeen ne aisa hi likha hai. Aik aur misal dekhein: Sahih Muslim mein sanad aali ke sath hazrat Abdullah bin Abbas se rawayat hai ke hazrat Abu Sufyan ke sath musalman mil baithne se gurez karte the to (musalmanon mein izzat pane ke liye) hazrat Abu Sufyan ne Rasool Allah se kaha mere paas teen cheezein hain jo aap ko dena chahta hoon. Aap ne farmaya ''behtar''. Abu Sufyan ne kaha: meri beti Um Habibah jo ahsan al arab wajamalah hain. Main unka nikkah aap se kar doon. Rasool Allah ne farmaya ''theek hai''. Abu Sufyan ne kaha: Muawiyah ko aap apna katib bana lein. Rasool Allah ne farmaya ''theek hai''. Abu Sufyan ne kaha: mujhe kisi fauj ki kaman dein takay main kafiron se isi tarah laroon jis tarah musalmanon se larhta tha. Aap ne farmaya ''behtar''. (Muslim, hadees number 2501, bab man fazaail Abu Sufyan bin Harb) Is hadees ke muqable mein arabab seer o tareekh ka us par ittefaq hai ke hazrat Um Habibah ka nikkah Rasool Allah se us waqt hua jab woh Habshah mein thin aur Abu Sufyan us waqt tak islam nahi laye the. is liye is rawayat hadees ko qubool nahi kiya jaye ga balkay tareekhi rawayat ko is rawayat hadees par tarjeeh hasil hogi. Yeh bhi koi tashreei masla nahi. Phir aakhir alzar hadees usool darayat ke bhi khilaf hai. Rasool Allah ka aam tareeqa yeh tha ke jis ko ahd jahalat mein kisi wajah se fazeelat hasil thi usay ahd islam mein bhi kamahqiq fazeelat di gayi. Abu Sufyan raees quraish Makkah the, aisa mumkin nahi tha ke musalman unko haqarat se dekhte, unke paas baithne ko aar samjhte dar aankeh woh Rasool Allah sallallahu alaihi wasallam ke sasur the. Do ahadees ke darmiyan taarud ko bhi isi usool par hal kiya jaye ga.