Ami abu! Mujhe maaf kardena. Mein aap ke kaam nahi aasaka, aap ko khushiyan nahi de saka. Ye aise bachay ke alfaz thay jo bohot hassas tha, samajhdar tha. Naam to maloom nahi, is liye Ahmer farz kar lete hain. Ahmer aise gharane mein paida hua jahan be auladi ka waqfa us ki aamad se toota tha. Waliden ki khushiyan ka kya aalam hoga, woh log bakhubi jaan sakte hain jin ke haan be auladi ke baad aulad ho. Nah Ahmer se pehle aulad thi aur nah us ke baad mazeed aulad hui. Khushiyan ka ye tasalsul zyada deer tak jari nahi raha saka. Ahmer ke barha hone par ye aashkaar hona shuru hua ke us ka jism us ka bojh uthane ki salahiyat se mehroom hai. Jism jaise jaise barhta gaya, ye mehroomi bhi barhti gayi. Sath sath Ahmer ki samajhdari aur hassasiat bhi barhti gayi. Us ke waliden jab kabhi us ki mehroomi par pareshan ho jaate ya un ki ankhon mein aansu aajata to woh be sakhta ye kehne par majboor hojata. Ami abu! Mujhe maaf kardena. Mein aap ke kaam nahi aasaka, aap ko khushiyan nahi de saka. Jab Ahmer pandrah baras ka hua to us ka jism bilkul jawab dena shuru hua, tabiyat kharab rehna shuru hui. Ek din tabiyat kafi kharab thi to abu ne hospital jane ka kaha. Ahmer kehne laga: Abu! Gate ke bahar kafi mehman aaye huye hain. Jabkeh bahar koi bhi mojood nahi tha. Abu ne garage mein hi Ahmer ko kerry dabba mein bithaya. Jaise hi gaadi gate se bahar nikli to Ahmer be sakhta kehne laga: Abu! Mein ne kaha tha na, gate ke bahar kafi mehman aaye huye hain. Ye kehte hi Ahmer ki gardan ek taraf dhalak gayi. Ahmer un mehmanon ke sath rukhsat hochuka tha jo sirf woh dekh raha tha. Ye bilkul suchi kahani hai, sirf Ahmer ka naam farzi hai jaisa ke shuru mein bataya. Ahmer ek aisi mazoori ka shikar tha jo umar ke sath barhti gayi lekin woh sabar raha, shakar raha, maan baap ka farmabardar raha, un ka ehsas karta raha, un ke aansu ponchta raha. Dusri taraf us ke waliden bhi sabar the, shakar the, Ahmer ki surat pandrah saal ki azmaish ke baad kundan ban gaye. Hum mein se kitne log hain jin ki mehroomiyan, mazooriyan Ahmer ya us ke waliden se bohot kam hain lekin har waqt shikwa karte hain, pareshan haal rehte hain, sabr o shukr se door, bas shikayat hi shikayat. Dil mein bhi shikwe, chehre pe bhi shikwe, alfaz aur lehja mein bhi shikwe. Apni zat se bhi nalaan aur apne mutalliqeen se bhi kichay kichay. Ahmer ko jo kuch milne wala tha, woh mehmanon ki aamad wali baat se wazeh hogaya. Ye hi haqeeqi rasta hai. Hum jab tak shikwa shikayat ki resi thamaye rahenge, hamara dil bhi be sukoon aur pareshan rahega. Zindagi mukhtasar hai chahe pandrah saal ho, saath saal ho ya sau saal. Is ka taweel bhi qaleel hai, is ki qadar kijiye aur is se woh kashid karlijiye jo matloob hai.