Us zamane mein log is baat ko izzat samajhte the ke poore mohalle ke bachon ko Quran parhay jaye aur bilkul free parhay jaye. Chananche walid sahib marhoom bhi is izzat ko hasil karne mein kisi se peechay na the. Agar wo baqaida qari na the balkay government job pe the lekin Kalam Allah se mohabbat unhein majboor karti thi ke wo bhi is kaam mein hissa daalen. Hum ne bachpan se yeh dekha ke joharhi shaam hoti bachay aana shuru ho jaate kabhi unke kamre mein, kabhi ghar ke sahn mein aur kabhi bahar gali mein taleem o tarbiyat ka yeh silsila shuru ho jaata aur maghrib ke baad tak jari rehta. Kuch bachay jo shaam ko na aa sakte unhein woh subah bula lete ta ke koi is naimat se mehroom na ho jaaye. Jab main is qabil ho a ke Quran Majeed ki taleem ka aghaaz kiya jaaye to walid sahib ne haath pakra aur qareebi masjid mein qari sahib ke paas chhod aaye. Masjid ke waqt bohat mushkil the. Wahan fajr se pehle pohancha hota tha aur phir fajr ke baad kam az kam ek ghanta taleem jari rehti. Phir ghar wapas aakar school ki tayari aur school rawangi. Shaam ko phir qari sahib ke paas aur phir wahan do ghante guzar jaate. Is mushkil time table ki wajah se main bohat jazbaaz hota aur walid sahib se matalba karta ke jab aap itne saare bachon ko ghar par padha rahe hain to mujhe unke saath kyun nahi baithne dete. Walid sahib daant dete aur kehte hain, tumhein qari se hi padhna hai. Aaj itne arse baad jab peechay mur kar dekhta hoon to walid sahib ka yeh ehsaan khoob achhi tarah samajh mein aata hai aur jab bohot se logon ko dekhta hoon ke baze molvi, alim aur alamon ko bhi Quran parhte dekhta aur sunta hoon to besakhta walid sahib ke liye dil se duaen nikalti hain. Aur Allah ka shukr ada karta hoon ke walid sahib ne is waqt meri zad nahi maani. Agar us waqt wo meri baat maan lete aur apne paas bitha lete to aaj hum bhi Quran ko sahi padhne ki naimat se mehroom hote. Walid sahib ko is baat ka ehsas tha ke unka Quran padhna majhool aur ghair maeyari hai is liye wo logon ko mashwara dete the ke apne bachon ko masjid ke qari sahib ke paas bhejein. Logon ki tasahul pasandi aray aati aur woh waqt ki mushkil ki wajah se usi par guzara kar lete ke chalo rasam puri karni hai aur woh yahan bhi ho jaati hai. Is bazahir chhote se waqaye se teen bade bade sabak milte hain. Pehla to yeh ke zindagi mein kitni hi batein aisi hain ke jinhe hum hajm ya wazan ke itibar se bohat halka samajh ke guzar jaate hain magar apne asarat aur natayej ke itibar se woh bohat hi bhari hoti hain. Dusra yeh ke har baat ke samajh mein aane ka ek waqt hota hai is liye kisi baat ko rad karne se pehle kuch intezar kejiye ho sakta hai ke abhi us baat ko samajh mein ane ka waqt na aaya ho. Aisa na ho ke waqt se pehle rad karne ki wajah se baad mein pachtana pare. Aur teesra yeh ke baaz batoon ko agar, mahez is liye maan liya jaaye ke humare walidain kehte hain to Allah un mein aisi khair daal deta hai ke jiska insaan ko waham waguman bhi nahi hota.