1857 ki jang azadi ke baad angrezon ne musalmano, khas tor par ulema aur mughlia khandan par jo qayamat barpa ki woh tareekh ka alamnak bab hai. Hazaaroon be gunah phansiyo ki bheent chadhaye gaye aur shahzadiyan aur shahzade kasmpresi aur be basi ki azmat naak tasveer ban kar reh gaye. In logon ne apni zindagi ke baqi din kis tarah poore kiye woh alag se ek bab hai. Iss hungame mein baaz log mahez ghalat fehmiyon ki nazr hokar zindagi se haath dhobaithe. Unhi mein se zair nazar kahani ka aik kirdar Yousuf hai. Us ki tafseeli kahani hum kisi aur shumare mein shaair karenge. Yahaan us kahani ka woh dardnaak hissa diya ja raha hai ke jab Yousuf ki aadhe din ki dulhan usay phansi ke liye rukhsat karti hai. Jis zamane mein Delhi par goli bari ho rahi thi aur shehar ke sab bashinde bhaag rahe the us waqt Yousuf ke chacha ne Yousuf ke baap se kaha ke anjaam bura nazar aata hai behtar hai ke Yousuf ka nikah kar diya jaaye ta ke jab hum sab bahar niklein to parde ki diqat na rahe. Yousuf ke baap ne iss raaye ko pasand kiya aur Yousuf ki shadi ho gayi magar nikah hote hi khabar hui ke angrezi fauj Delhi mein dakhil ho gayi aur badshah qile se nikal kar maqbara Humayun mein chale gaye. Yousuf ke waliden aur sab kanbhe wale bhi rathon mein baith kar bhaage aur Sayyed Haji Qutb Sahab pahunchay. Yousuf ne us waqt tak dulhan ka chehra bhi nahi dekha tha. Qutb Sahab mein jahan thahre woh jagah bohot kharab thi aur itni ke is kanbe ka guzara mushkil tha. Dastoor ke mutabiq is pareshani mein bhi dulhan ne sharam o haya ka lehaz rakha. Adhi raat ko jab log so gaye to fauj aayi aur officers ne sab mardon ko giraftar kar liya. Officer ne maloom kar ke Yousuf, us ke baap aur chacha ko saath le gaye. Jis waqt Yousuf rukhsat hua us ki maa be qaraar hogayi. Aur us ne ro ro kar kaha ke yeh meri bees baras ki kamai hai yeh mera akele beta hai is ke baghair zinda nahi rahungi kal us ki shadi hui hai abhi to us ne apni dulhan ka chehra bhi nahi dekha tum usay kahan le jate ho aur kyun le jate ho. Ek fauji ne kaha ke yeh bara baghi mujrim hai is ko phansi di jayegi tum us se akhir ye bar mil lo ab ye dobara tumhare paas nahi aaye ga yeh sun kar Yousuf ki maa to behosh ho kar gir padi. Yousuf ki biwi abhi tak ghunghat nikale sharmayi hui bethi thi fauji ki ye baat sun kar us ne ghunghat utha diya aur dono haath milte hue khadi hogayi. Us ki aankhon se ansuon ka silaab beh nikla. Us ke hont shiddat gham se larr rahe the woh munh se kuch na boli aur hasrat bhari nigahon se Yousuf ko dekhne lagi aur tikti bandh kar barabar dekhti rahi. Yousuf bhi ye manzar dekh kar be tab ho gaya aur mayoos nazron se apni dulhan ko dekhne laga. Woh bhi chup tha aur dulhan bhi chup. Dulhan ki aankhon ka surma ansuon ke sath beh beh kar surkh o safed ruksaron par dhabay laga rahe the aur Yousuf ka chehra bhi yas o haras se zard aur khushk ho chuka tha. Yousuf aur us ke chacha ke haath rassi se bandh diye gaye aur sawar unko lekar rawana hone lage to Yousuf ki dulhan ne bohot dheemi awaaz se kaha "Jao mein ne mehr maaf kiya." Subah ko Yousuf aur us ke chacha ko phansi de di gayi.