1. Baap ke ghar se rukhsati ke waqt ek rishtay daar khatoon ka jumla keh "Aine nahi suna talaaq ho jani ae". Kabhi nahi bhoola balkay mere liye hamesha baais-e-taqat raha. 2. Shadi ke kuch mah baad mein saheli se milne us ke ghar gaye to us ke baray bhai ne mujhe kaha dekhna ab tum metric bhi nahi kar sako gi kahan tum doctori ka sochti ho, shadi ke baad kaun parhta hai. Un ke is jumlay ne mere ander mazeed himmat paida kar di. 3. Ek taleem yafta jahil khatoon ka jumla keh us ke bachay bhi baap ki tarah gongay behre paida honge. Allah ne bohot achay qabil zehin aur out spoken bachay diye mujhe. 4. Mere bachay pehli doosri teesri class mein the to un ke classmates ne kaha ke tum kuch nahi ban sakte kyunke tumhara baap bol nahi sakta bas is jumlay ne bohot sa hosla diya aur Allah ka shukr bachon ne aala taleem hasil ki. 5. Ammi aur abuji ki wafat ke baad abu ji ke ek dost Professor Wahidi se afsos ke liye aaye aur mere sar pe hath rakh kar kaha beta himmat karna aur yeh ghar mat bechna mujhe Ashraf ki fikar hai. Allah ne Professor Alvi sahib ki baat bhi puri ki aur ghar Ashraf ka ho gaya. Ab jab ke shadi shuda zindagi ke ikatis saal guzar gaye. Pehle number wali khatoon ka kuch saal pehle phone aya kaash tum meri bahu hoti. Saheli ka bhai aksar gaon se mareez bhejta hai ke un ki madad kar dena. Taleem yafta jahil khatoon ne barha kaha ke meri tumhare bare mein soch ghalat thi. Woh bachay jo mere bachon ko tanay dete the mushkil se FA B.A kar paaye. Kal kaun kis maqam pe ho kitna kamiyab ho us ki zindagi aaj se kitni mukhtalif ho kuch nahi kaha ja sakta. Yeh apne tajurbaat is liye share kiye ke agar aap kisi ki hosla afzai nahi kar sakte to hosla shikni ka bhi koi haq nahi. Meri tamam kamiyabiyon ki wajah meri aziz tareen ami aur abu ji (sas sasur) hain. Albata nakamiyon ki zimmedar mein khud hoon. Note: Himmat, mehnat aur sabar kisi bhi kamiyabi ka lazmi juz hain. Aur teen kaam mein ne musalsal kiye hain.