raat ke do baj rahe the. dosto ke fathers day ke messages post ho rahe the. abba ji marhoom ki purani tasweer mobile ki memory mein dhoondain, ek acha sa message copy kiya aur neeche abba ji ki tasveer lagayi, message ko dobara achi tarah check kiya kahin koi ghalti to nahi, post kiya, aur so gaya. na jaane raat ka kaun sa pehar tha, abba ji marhoom bohot arsa baad khwab mein aaye, hamesha ki tarah bohot duaain dien aur bole, ''Pater mein jaanta hoon to mujh se bohot pyar karta hai. Mein jaanta hoon ab duniya badal gayi hai aur tu bohot masroof ho gaya hai. Naye aane wale saathi batate hain, ab duniya mein har kaam mobile par hota hai is liye pater jab tujhe har waqt mobile par jhuke dekhta hoon to samajh jaata hoon tu bohot kaam kar raha hai. Pater tujhe to pata hai yahan zyada purane log hain daqianusi khayalat wale, mein lakh yaqeen dilata hoon tu ne mujhe mobile par duaain bhej di hain par woh istehzaai andaaz mein muskura dete hain aur kayi ek tu kehte hain dua to aankhen band kar ke dil se maangi jaati hai ye message likhna kaun si dua hai? Subah mere dost Deen Muhammad ka beta hamesha ki tarah us ki qabar par ja kar phool chadhaye ga, fatiha parhe ga aur us ke pote apne nanhe nanhe haath utha kar us ke liye bakshish ki dua karen ge aur woh saara din seena chura kar ke ghoomay ga aur sab ko dikhata phire ga ke us ki aulad us se milne aayi hai. Pater bas tujh se itna hi kehna tha, subah thora waqt nikal kar mujhe milne aa jana, aur mere pote ko bhi laana phir mein bhi sab ko seena chura kar ke bataunga aaj mera bhi fathers day hai.''