Wo ek baray hospital mein doctor thay, unho ne bataya ke Imr jinsi mein un ke paas ek bori aurat ko laaya gaya jis ki umr novey pachanwe baras se kam nah thi. Aurat shadeed bemar thi aur us ke bachne ke imkanat bohat kam thay. Us ke saath us ke paanch betay bhi thay jin ki umraen bhi saath satrah baras ke lag bhag thi. Wo sab bohat hi aah o zaari se doctor hazraat ki madad samajh rahe thay. Aur sab se bara ro ro kar un se keh raha tha ke doctor sahab meri maa ko bacha lein, khuda ke liye meri maa ko bacha lein. Doctor sahab kehte hain ke jab wo shakhs buri tarah mere peechay par gaya to maine us se kaha ke bhai maut aur zindagi hamare ikhtiyar mein nahin. Hum to bas ek koshish kar sakte hain aur wo kar rahe hain lekin bazahir imkanat bohat kam hain. Kehte hain ke phir maine us se kaha ke dekho tumhari maa sau baras ke lag bhag hai ab ye kitna arsa aur ji le gi. Ab is umr mein ye tumhare kis kaam ki. Us ne kaha ke doctor sahab aap theek kehte hain ke ab ye hamare liye kya kar sakti hai. Yaqeenan aur tu kuch nahin kar sakti lekin kam az kam ye itna to karti hai na, ke bethi bethi hamare liye duaain karti rehti hai. Doctor sahab kehte hain ke is ki ye baat sun kar main chonk kar reh gaya. Is ki ye baat bilkul theek thi apni maa ke marnay ke baad wo waqiatan is ki duaon ki barkat se mehroom ho rahe thay. Walidain ki duaain aulad ke liye kya ahmiyat rakhti hain is ka sahih aur barwaqt idrak bohat kam bachon ko nasib hota hai aur jab ye idrak nasib hota hai to bohat se lamhaat haathon se waqt nikal chuka hota hai. Zindagi mein kitne hi maqamat aur waqt aise aate hain ke jab bazahir musibat ya mushkil se bachne ka har imkan khatam, saari raahein musaddod aur saare darwaze band ho chuke hote hain lekin phir achanak se ek dar khul jata hai aur insaan khud bhi hairan reh jata hai ke ye raasta kaise nikal aya. Ghaur karein to mehsoos hota hai ke ye dast-e-ghaib asal mein walidain ki duaain thin jo wo har waqt mangte rahte thay. Is haqiqat se ashnaai bhi asal mein is waqt hoti hai jab insaan khud sahib-e-aulad ho jaye. Aulad ke dukh pe insaan jis tarah dukhi ho kar reh jata hai, un ke bimaar ho jaane se insan kis tarah un se barh kar bimaar ho jata hai aur un ke kisi mushkil mein ghar jaane se insaan kis buri tarah mushkil ka shikaar ho jata hai, ye kifiyat byan karne se zyada mehsoos karne ke qabil hai aur alfaaz shayad is ka haq ada kar bhi na sakte. Mujhe bhi is ka sahih ma'no mein idrak tab hi hua jab mere bachay bimaar hue ya jab kisi mushkil mein ghar gaye is waqt kis tarah dil kat kar reh gaya, kis tarah neendain ud kar reh gayin aur kis tarah dukh dard, dua ke lafzon mein dhul gaya, ye wahi jaan sakte hain jo kabhi is kifiyat se guzre hon. Is mein koi shak nahin ke aulad ke liye dua karna walidain ki fitrat ka hissa hai lekin kya in duaon mein se sab bachon ko barabar ka hissa mil jata hai? Shayad aisa nahin. Barish to barasti hai magar kya sab ke pialay bhar jaate hain. Nahin balkay sirf usi ka, jis ka piyala seedha ho. Walidain ki to khwahish hoti hai ke kaash sab bachay hi apne pialay seedhe rakhein magar aam tour par aisa hota nahin kyunke ye baray karam ke hain faisley, ye baray nasib ki baat hai.