Billi bhi apne ghar mein sher hoti hai, aisa waqia jis mein ilaqa police ek badmaash ke aage billi ban gayi thi, aur ilaqe ke laawaris log ek badmaash ke reham o karam par the-97 police ki ander ki asal haqeeqat. Kaise hamare mulk mein jungle ka qanoon hai aur idaray kamzor hogaye hain. Ek aankhain khol dene wala waqia. Mein ASHOU Baghdiri (Zila Shakar Pur) mein naya post hua tha, mujhe ek din ek larki ka khat mosool hua. Larki ne likha tha woh Shakar Pur ke ek school mein teacher hai aur woh rozana Baghdiri shehar se public transport mein safar karti hai. Kuch din pehle subah ke waqt Shakar Pur ja rahi thi ke teen canal ke pass ek aadmi ne hamari sawari rok li aur mujhe haath se pakar kar gaadi se neeche utar liya aur gaadi wale ko jaane ka ishara kar diya. Aadmi mujhe canal ke saath hi bane ghar ke ek kamre mein le gaya aur shaam tak meri izzat se khelta raha. Suraj ghuroob se pehle mujhe road par le aya aur Baghdiri jaati hui ek sawari mein mujhe sawar kara diya. Larki ne mazeed likha tha ke mein ek majboor aur ghareeb khandan se talluq rakhti hoon apni izzat ki khatir samne nahi aasakti. Teen canal ke pass rozana yeh tamasha hota hai koi bhi larki samne ane ko tayar nahi. Mein ne aap ko shikayat kardi hai aap hamare rakhwaale hain agar aap ne bhi kuch nahi kya to mein duniya mein kuch bhi nahi kar sakti magar qayamat ke din aap par dawaein zaroor karungi. Khat ke aakhir mein uss nam ke saath sari tafseel likhi thi. Khat milte hi mein pareshan hogaya aisi baatein to sirf dramon aur filmon mein hote dekha tha. Haqeeqat mein aisa ho raha tha is ka mujhe andaza nahi tha aur sach yeh hai ke mein andar se dar gaya tha ke kya waqai hamare mulk mein jungle ka qanoon hai aur criminal log itne mazboot hain ke logon ki shanwai nahi ho rahi jaisa ke mein bata chuka hoon ke meri uss thane mein posting nayi thi aur mujhe muzam ki taqat ke mutalliq kuch bhi pata nahi tha is liye thane ke purane mulazmein se maloomat liye to pata chala ke muzam ek bohat bara badmaash hai aur salon se shehar mein dukaan daarun se bhatta leta hai aur jis dukaan se jo dil kare le jata hai kuch din pehle thane ka Additional ASHOU ek chori ke baad choron ke khud karay uthate hue badmaash ke dairay par pohanch gaya to wahan badmaash ke larkon ne dandoun se police ki aao bhagat ki aur case ke mudai ko zakhmi kar diya. Police ne dairay se bhag kar apni jaan bachayi. Karwai se pehle waqia ki tasdeeq karna lazmi tha. Ilaqe ke log mujhe jaante nahi the mein ne pehle stop tak tangon aur public transport mein safar kiya aur tanga chalanewalon aur musafiron se teen canal se guzarte waqt badmaash ke dairay aur badmaash ke mutalliq ek musafir ki hesiyat se sawalat kiye jis se mujhe tasdeeq hogayi ke larki ne kuch bhi ghalat nahi likha tha badmaash ki dhasht itni thi ke log uss ka zikar karte hue darte the. Teen canal se guzarte hue mein ne kai bar badmaash ko apne saathiyo ke saath ane jaane walon ko ghoorte hue dekha. Purane staff ka kehna tha kam az kam do teen sau ki nafari ke baghair badmaash ke dairay jana fazool hai aur agar kacha haath dala gaya to police ko maar kha kar bhagna padega aur sheher mein ek na rukne wala choriyon ka silsila shuru hojayega aur choriyon ko control na karne ki padeesh mein SHO ka tabadla hojana hai. Mein ne SHO ki tainati ke board ki taraf dekha koi SHO do teen mah se zyada nahi raha tha. Mere paas thane mein pandrah solah police ki nafari thi jo waqt ba waqt badmaash aur us ke karindon se maar kha chuke thi. Mein khat le kar Shakar Pur apne SSP se milne chala gaya aur unko sara maamla bataya, SSP sahab ne saaf inkaar kardiya ke mein nafari nahi de sakta agar raid ke doran koi police wala mara gaya to mein IG ko kya jawab doon ga. Mein naumeed ho kar thane wapas aya badmaash ke paas 100 ke qareeb karinde the mein akela kya kar sakta tha, thane par ek purana head constable Ghulam Nabi koraayi tha, tainati ke thoreIn dino mein Main ne mehsoos kiya tha ke Ghulam Nabi Koraai mein tadbur aur police ki ghairat thi. Main ne Ghulam Nabi Koraai ko kaha ke woh raat ka khana mere saath khaaye. Main ne socha tha ke khanay ke doran us se mashwara karoon ke badmaash se kis tarah jaan chhurayain aur doosri taraf mein yeh soch raha tha ke lambi chhutti loon takay thane se mera tabadla hojaye. Main ne SSP ke ilawah larki ke khat ka kisi se zikar nahi kiya tha. Khanay ke doran main ne Ghulam Nabi Koraai ko kaha ke pichle dino Additional SHO badmaash se maar kha kar bhag aaya hai sheher mein sare log badmaash ko bhata de rahe hain, aur koi raat khali nahi jis raat chori na ho. Aur subah ko choron ke khore uthate waqt sare khore badmaash ke dairay par jate hain. Main ne Ghulam Nabi ko kaha ke woh mujhe mashwara de ke main kya karoon. Ghulam Nabi ko main ne bataya ke main SSP ke paas gaya tha ke raid ke liye nafari de magar unhone saaf inkaar kiya hai. Un halat mein us thane par main nahi reh sakta aur main chhutti par jane ka soch raha hoon. Ghulam Nabi Koraai ne mujhe kaha ke sir police se bara badmaash koi nahi hai shart yeh ke jab hum khud ko police wala samjhein aur sailoon ki baghair kisi lalach ke madad karein, yahan hum sara din dukaan dari karte hain to is tarah hona hai na. Usne mazeed kaha ke mujhe is thane par 15 saal hogaye hain aur un 15 salon mein aaj tak is badmaash ko haath dalne ka kisi SHO ne socha nahi hai, har SHO maal banakar chala jata hai. Isi liye badmaash mazboot aur thana kamzor hogaya hai, Ghulam Nabi Koraai ne mujhe kaha ke aap chhutti par na jayein hum isi nafari se badmaash ko qabu karte hain. Head constable Ghulam Nabi Koraai ki baaton se meri kuch hosla afzai hui. Usne mujhe kaha main do char dino mein badmaash ke khas karnde ko sheher se baataun ga aur jail mein daal doon ga aur aap ko itla kar doon ga. Aap ne sirf jail ki chabi head moharrir se le kar apne paas rakh leni hai aisa na ho ke badmaash head moharrir se zabardasti apna banda le jaye aur head moharrir ko sakhti se karnde ki mulaqat par pabandi ka hukm de dein. Badmaash police se darta nahi hai woh aap ke paas khud aye ga apna karnda chhurane ke liye. Aap thane ki nafari ko hazir rehne ka hukm kar dein hum badmaash ko pakar kar band kar dein ge, badmaash ke band hote hi us ke sare karnde bhag jayein ge aur mujhe takid ki agar aap ne meri hikmat amli par amal kiya to hum baghair kisi nuksan aur pareshani ke apna kaam kar lein ge. Do din baad mujhe Ghulam Nabi ne aakar bataya ke maine badmaash ke khas karnde ko jail mein daal diya hai. Main ne usi waqt head moharrir ko bulakar jail ki chabi us se le li aur us ko sakhti se hukm diya ke malzim ki mulaqat meri ijazat ke baghair nahi karani aur nafari ko thane par hazir rehne ka hukm de diya. Main aur Ghulam Nabi char din tak badmaash ka thane ane ka intezar karte rahe. Ghulam Nabi ne mujhe bataya ke badmaash ke kuch log deal ke uvez karnde ko chhurane ki baat karne aaye the. Main ne unko bola ke SHO naya hai us ko aap logon ki taqat ka andaza nahi hai aap log SHO ko dhamki aur dhons dilaien SHO aap ka banda chhod dega. Panchwen din mein apne daftar mein baitha tha ke meri kursi ke peechay khirki mein ghore ke hinaane ki awaz aayi. Main ne hairat se mud kar khidki mein dekha ke badmaash ghore se utar raha tha aur us ke sath aya ek ladka ghore ko meri daftar ki khidki ke slaakh se bandh raha hai. Main jaldi se uth kar sath bane head moharrir ke kamre mein gaya aur us ko kaha ke jaldi mein sari nafari jis halat mein hai mere paas pesh kare. (Ghore par ana aur khas tor par ghore ko SHO ki khidki ki slaakhon mein bandhna SHO ko kam dikhane ka aik nafsiyati harba tha, warna ghore ko thane ke kisi darakht se bhi bandha ja sakta tha). Badmaash baghair ijazat mere daftar mein aakar kursi khench kar baith gaya aur mera aadha naam le kar buland awaaz mein kaha ke Niyaz tum ko kaise jurat hui hai ke mera karnde band kar diya hai. Main badmaash ke chehre ko dekh raha tha aur badmaash buland awaZ mein mujhe pareshan karne ke liye apni bakwaas mein laga hua tha, itne mein Ghulam Nabi paanch police walon ko le kar mere daftar ke darwaze par aagaya. Badmaash ek lamba tarranga taqat war insaan tha, hum chh saath logon ne mushkil se usko qabu kar ke zameen par gira diya aur police ka "chhatr" manga kar badmaash ko nanga karke achhi khasi chhatrol karwayi. Badmaash himmat haar chuka tha aur munh se maafi mangne par utar aya ke mujhe maaf kar dein. Sheher mein uska bara raab aur dabdaba tha, mujhe dukaandaron ko bawar karana tha ke badmaashi ki badmaashi khatam hogayi hai. Badmaash ko aurton ka libaas pehna kar aur gadhe par bitha kar Ghulam Nabi aur thane ki dari hui nafari ne pura sheher ghoomaya. Badmaash ko jail mein daal kar humne uske dairay ka rukh kiya wahan se 100 ke qareeb bheenson aur chori ki motor cycles aur chori ka gharailu samaan baghair kisi muzahimat ke trucks mein daal kar thane laye. Pura sheher thane par aagaya aur apni chori ka samaan ki shanakht karne laga. Mein ne wapsi par Ghulam Nabi ko rukhsati ko galey laga kar uske gaal par boosa diya aur uska shukriya ada kiya kyun ke us sari kamiyabi ka sahara Ghulam Nabi ko rawaiye ke sar tha aur uske zimme lagaya ke barqarar shuda chori ka samaan malikon ko apni nigraani mein FIR kaat kar wapas karta jaye. Is tarah badmaash par 30 ke qareeb chori ki barqarari ke sath muqadme banaye gaye. 14 roz tak badmaash aur uske karendo ko rozana raat ko chhatrol ka samna karna parta. Badmaash zameen par aagaya tha, chhatrol ke doran mein ne badmaash se larkiyon ko sawariyon se utar kar apne paas kuch waqt rakhne ka poocha. Badmaash ne iqraar kiya ke woh ghalat kaam karta raha hai, muqadme mein badmaash ke sare karendon ko mufarar kar diya gaya tha. Meri tainati us thane mein taqreeban teen saal rahi, badmaash ne mujhe kafi logon se sifarish karwai ke agar mein ijazat doon to woh muqadmon mein apni zamaanat karwale, usi khadsha tha ke zamaanat par aate hi mein dobara usay naye keson mein band kar doon ga magar mein ne inkaar kar diya ke meri tainati ke doran wapas na aaye. Teen saal baad mera tabadla hogaya to kuch hi dino mein badmaash zamaanat par wapas apne dairay par aagaya, uska pura gang tutt par chuka tha. Badmaash ki apne hi rishtedaron mein dushmani chal rahi thi, aik din unhone us ke dairay par hamla kar diya zalim log andar se bohat buzdil hote hain, badmaash bhi andar se buzdil tha hamla ke waqt bajaye apna dafaa karne ke bajaye woh apni bandook ke saath ek kamray mein jakar chhup gaya, dushmano ne usay dhoond nikala aur goliyan maar kar qatal kar diya qatal se pehle us ne bandook phenk kar qaatilon ko bohat munat samajh kar magar yeh duniya haar manne aur buzdil logon ki nahi hai. Mein ne apni taraf se puri koshish ki thi ke khat likhne wali mazloom larki ki shikayat ka azala karun aur ilaqe ke badmaash ko jur se ukhaar phenka tha aur yeh bhi haqeeqat hai ke Allah Pak ki ghaibi madad thi ke Ghulam Nabi Koraai jaisa farz shanas aur bahadur insaan mere sath tha.