Hafiz Muhammad Shabbir 22 May 2020 ko Karachi mein hadse ka shikar hone wali badqismat flight ke musafir thay, maut kitni zalim aur chalak hoti hai Hafiz sahib is haqiqat ki classical misaal hain. Yeh saal bhar se bachne ki koshish kar rahe thay lekin waqt muqarrar unhein kheench khaanch kar flight PK 8303 tak le aya, kaise? Aap unki daastan mulaheza kijiye. Yeh apne khandan ke pehle Hafiz Quran thay, walid ka inteqal 1994 mein ho gaya, khandan mein baray thay lehaza behn bhaiyon ki zimmedari unke kandhon pe aa gayi. Yeh Kuwait chale gaye, wahan mazduri karte rahe, Kuwait se Karachi aaye, mukhtalif kaam kiye aur phir Saudi Arabia chale gaye. Yeh Riyadh ke ek hospital mein accountant thay, 2019 mein Saudi Arabia ke maashi haalat kharab ho gaye to yeh khandan samet America shift hone ki koshish karne lage. Saudi Arabia se bhi America ja sakte thay lekin yeh Pakistan aa gaye aur poora saal American visa ki koshish karte rahe. Sadar Trump ki wajah se America ki policies tabdeel ho gayin, Pakistaniyon ke liye visas mushkil ho gaye lehaza Hafiz sahib ka mamla saal bhar latka raha, taham February mein unhein America ka visa mil gaya. Yeh job visa tha, yeh is par apni family ko bhi America le ja sakte thay. Khandan ne tayyari shuru kar di lekin is doran corona aa gaya, flights aur borders band ho gaye, yun Hafiz Muhammad Shabbir Karachi mein phans gaye. May ke shuru mein ittila mili, Sadar Trump 22 May se job visas par pabandi laga rahe hain jis ke baad yeh log shayad kabhi America na ja saken. Khandan ne faisla kiya yeh 22 May se pehle America pahunch jayen, Hafiz sahib 19 saal se taraweeh parhte thay, Kuwait aur Saudi Arabia mein bhi namaz taraweeh ki imamat karte thay aur yeh is saal bhi taraweeh parhte thay. Unka khandan bhi unke peechay taraweeh parhta tha, yeh is Ramadan mein bhi pandrah din yeh khidmat saraanjham dete rahe. 19 May ko bhi unhone taraweeh parhayi, roza rakha aur yeh Qatar Airway ki flight se Doha rawana gaye. Yeh aur unka visa Karachi airport par clear ho gaya lekin yeh jab Doha pahunchay to unhein airport par rok liya gaya. America corona ki wajah se sirf apne shehriyon ko dakhilay ki ijazat de raha tha, American passport holders ke ilawah koi shakhs America dakhil nahi ho sakta tha, chuna ke Qatar Airways ne unhein offload kar diya. Yeh das ghante Doha airport par bethe rahe, wapsi ki flight ka maloom kya to pata chala ek June tak Karachi ki kisi flight mein koi gunjaish mojood nahi. Qatar ka visa na hone ki wajah se airport se bahir bhi nahi ja sakte thay. Yeh counter par pareshan khade thay, achanak counter clerk ne bataya aaj ek cargo flight Lahore ja rahi hai, cargo flights musafiron ko nahi le jati lekin mein aap ke liye koshish kar sakta hoon, Hafiz Muhammad Bashir ne haan kar di. Counter clerk ne koshish ki aur aap qismat dekhiye cargo flight unhein le jane par raazi ho gayi. Yeh aur unka khandan khush ho gaye lekin unme se koi nahi janta tha yeh jis chance ko khush qismati samajh rahe hain yeh unki zindagi ki sab se badi badqismati sabit hoga. Musafir badi tezi se aakhri manzil ki taraf barh rahe thay. Hafiz Shabbir cargo flight ke akele musafir thay, yeh beharhal Lahore pohanch gaye. Pakistan ke zyadatar airports par musafiron ko 14 din quarantine mein rakha jata hai, yeh bhi rok liye gaye lekin unki report do din mein aa gayi aur yeh negative nikle unhein ghar jane ki ijazat de di gayi. 22 May ko Lahore se Karachi ke liye do flights thin, gyarah baje aur ek baje dono mein seat maujood thi. Yeh gyarah baje ki flight lena chahte thay lekin an jane mein unke munh se ek baje nikal gaya, yun yeh ek baje ki flight mein sawar hue aur yeh flight do baj kar 37 minute par airport se adha kilometer door gir kar tabah ho gayi. Hafiz Muhammad Shabbir neek, paband soom o salat aur aajzi se labri.Z insaan thay lekin maut unhein kheench khaanch kar flight PK 8303 tak le aayi. Agar maut ki zanjeer ka koi ek halka bhi narm ya kam zor par jata to ye saaf bach jaate. Ye agar 19 May ko Karachi Airport par rok laye jaate, unhein Doha mein na roka jaata, unhein Qatar mein ek do din ka transit mil jaata, ye cargo flight mein sawar na hote, ye agar 14 din quarantine mein rah jaate, unka corona result ek adha din late ho jaata ya phir ye ek baje ki flight le lete to ye aaj bhi apne bachon ke darmiyan baith kar hans khel rahe hote magar maut ke musafiron ko kis waqt maut daboch le hum mein se koi nahi jaanta. Hum ye bhi nahi jaante humare rakte hote hue qadam humein kis museebat se bacha rahe hain aur hum jis taraf sarpat dor rahe hain us ke aakhir mein kon sa azaab hamara intezaar kar raha hai. Hafiz Muhammad Shabir sahib bhi jis ittefaq ko apni good luck samajh rahe hain wo aakhir mein kya nikla? Chana cheh aap ye baat play bandh lein, qudrat agar humein bachana chahti hai to ye humein kaali billi bhijwa kar bacha leti hai aur ye agar humein gherna chahti hai to ye phir humein khushqismatiyon ke pehyon par bitha kar bhi apni taraf kheench le gi, ye humein daiin baain nahi hone de gi. Isi ka naam taqdeer hai. Ye maut ki kahani thi, ab aap ek kahani zindagi ki bhi mulaheza kijiye. Flight PK 8303 ke do musafir mojzaana tor par bach gaye, un mein Bank of Punjab ke sadr Zahur Masood bhi thay, ye mulk ke namwar adakar Manoor Saeed ke sahib zade thay, Zahur Masood ke baqol hadse se pehle tayyare mein shor hua, logon ne unchi unchi awaaz mein kalma parhna shuru kar diya, log Allah Ta'ala ko bhi pukar rahe thay aur gardgarak kar duaen bhi kar rahe thay lekin mujh par ulta asar hua. Main sakte mein chala gaya, mujhe is waqt koi kalma, koi dua yaad nahi aa rahi thi, main bas chup chaap apni seat par baitha raha, jahaz crash hua, meri seat jahaz se nikli aur main seat samet hawa mein udta hua ek gari par ja gira, wo gari ek wakeel sahib ki thi, wakeel sahib saide par khade thay jab ke un ki begum gari ke andar bethi thi, main gari ki chhat par tak gaya, mere poore jism mein dard ho raha tha, wakeel sahib ne meri seat belt kholi. Mujhe gari ki chhat se neeche utara aur mujhe le kar hospital ki taraf dor pade. Yun main bach gaya taham Zahur Masood ne ek hairan kun baat batayi. Un ka kehna tha hadse ke waqt meri walda namaz zuhr ada kar rahi thay, ye namaz mein thi jab unhein mere hadse ki itla di gayi. Meri walda ne ye khabar sunne ke bawajood namaz jari rakhi, ye is waqt tak sajday mein padi rahi jab tak unhein ye nahi bata diya gaya ke Allah Ta'ala ne Zahur ko bacha liya hai, Zahur Masood ki walda ka waqia aur seat samet zinda salamat gari ki chhat par girna aur barwaqt aise samajhdar shakhs ka mil jana jo unhein seedha hospital le gaya. Ye waqia haeran kun tha, is liye Allah Ta'ala jab kisi ko bachana chahta hai to wo aise shakhs ko seat samet jahaz se bahar gira deta hai jise musibat ke waqt kalma tak yaad nahi aata aur doosri taraf jab ye kisi ko bulana chahta hai to ye Hafiz Quran Muhammad Shabir jaise muttaqi aur parhezgar shakhs ko cargo flight ke zariye doosre mulk se la kar is flight mein bitha deta hai jis ke nasib mein manzil nahi likhi gayi thi, hamara Allah itna kaar saaz, itna taqatwar hai. Aap ab ek teesri kahani bhi mulaheza kijiye, mere ek dost bhi is flight mein mojood thay, nihayat shandar insaan thay, ye jawani mein Karachi ki ek Parsi larki se shadi karna chahte thay, walid sakht aur tigre thay, wo nahi mane. Waldeen ki marzi se un ki shadi hogayi, khatoon parhi likhi, zehni aur khoobsoorat thay lekin un ka nibha nahi hoska, talaaq hogayi. Doosri shadi hui, wo bhi kaamyaab nahi hoski, walid ka us doran intiqaal hogaya, bees saal baad un ka usi Parsi khatoon se rabita hua.a aur woh aaj tak un ka intezar kar rahi theen. Yeh walida ke paas gaye, apne bhaiyon aur behnon ko raazi kiya, family un ki zidd ke samne haar gayi. Yeh khush ho gaye, yeh un ki zindagi ki sab se badi khushi thi. Faisla hua ke Karachi aayenge, larki ki family se milenge aur Eid ke baad baqaida shadi ho jaye gi. Yeh bhi 22 May ko Lahore se Karachi rawana ho gaye, woh Parsi larki jiska unhone 20 saal intezar kiya tha woh unhe pakarne ke liye Karachi airport aayi lekin yeh Karachi pohanch kar bhi us tak nahi pahunch sakte. Yeh sab ki pohanch se nikal gaye. Main ne do din pehle akhbarat mein un ki mafi ka ilan parha, meri ankhon mein ansoo aa gaye. Be shak hum sab apne Rab ki meherbani ke mohlat ke mohtaaj hain. Yeh jab saans dheeli kar deta hai toh insaan girte hue jahaz se bhi seat samet salamat nikal aata hai aur yeh jab saans kheench leta hai toh phir hamein agli saans ki mohlat nahi milti. Hamare dilon ki dhadkanein hamare dil hi mein manjmand ho jaati hain, ya Allah tera karam hai, ya Allah tera reham hai. ***